లాస్ ఏంజెల్స్ కౌంటీ రైల్వే లైన్.. ఇది దొంగలకు అడ్డాగా మారిపోయింది. గూడ్స్ రైలు వచ్చిందంటే కంటెయినర్ను పగలకొట్టి.. అందులోని పార్శిల్స్ను ఎత్తికెళ్తారు. 2021లో ఇలా పార్శిల్స్ను ఎత్తుకెళ్లడం ద్వారా దాదాపు 37 కోట్ల రూపాయల నష్టం వచ్చిందని యూనియన్ ఫసిఫిక్ తెలిపింది. లాస్ఏంజెల్స్ కౌంటీ రైల్వే.. ప్యాసింజర్లతో ఉండే బిజీ రూట్. దీంతో గూడ్స్తో వెళ్లే రైళ్లను ఈ మార్గంలో చాలా సేపు నిలిపివేస్తారు. ఇదే అదునుగా దొంగలు చెలరేగి పోతున్నారు. తాజాగా లాస్ ఏంజెల్స్లో ఓ భారీ చోరీ జరిగింది. పోస్టల్ శాఖ పార్శిల్స్తో పాటు.. అమెజాన్, ఫెడ్ ఎక్స్, టార్గెట్, యూపీఎస్ లాంటి ఈ-కామర్స్ కంపెనీల పార్శిల్స్ చోరీకి గురయ్యాయి. అంతే కాదు చోరీ తర్వాత ఆ బాక్సులను పట్టాలపైనే పడేసి.. వాటిలో చాలా వరకు డబ్బాలను కాల్చిపడేశారు.
లాస్ ఏంజెల్స్ రైల్వే రూట్లో దొంగతనాలు ఈ మధ్య కాలంలో జరుగుతున్నవి కాదు. 2020 డిసెంబర్ 2020 నుంచి ఈ తరహా దొంగతనాలు 160 శాతం మేర పెరిగాయని యూనియన్ ఫసిఫిక్ చెబుతోంది. గత అక్టోబర్ 2020తో పోలిస్తే.. అక్టోబర్ 2021లో ఈ దొంగతనాల శాతం 356 శాతం పెరిగిందని యూనియన్ ఫసిఫిక్ తెలిపింది. కరోనా టైం నుంచి ఈ నేరస్తులు చెలరేగిపోతున్నారు. పార్శిల్స్ ను మోసుకెళ్లడం కష్టమవుతుందనే ఉద్దేశంతో వాటిని అక్కడే చించేసి.. అందులోని వస్తువులను తీసుకెళ్తున్నారు. తక్కువ ధరకు బయట అమ్మేస్తున్నట్లు అధికారులు తెలిపారు. కోవిడ్-19 కిట్స్, ఫర్నీచర్, మందులు.. చోరీకి గురవుతున్న వాటిలో ఎక్కువగా ఉన్నాయి. తాజాగా క్రిస్మస్, న్యూఇయర్ టైమ్లో ఈ తరహా చోరీలు ఎక్కువగా జరిగినట్లు అధికారులు గుర్తించారు. దీంతో యూనియన్ ఫసిఫిక్ ఆ రైల్వే రూట్లో భద్రత కట్టుదిట్టం చేసింది. డ్రోన్ పర్యవేక్షణతో పాటు అదనపు భద్రతా సిబ్బందిని ట్రాక్లపై కాపలా పెట్టింది. అయినా కూడా దొంగతనాలు మాత్రం తగ్గడంలేదు.
For More News..
