- హైదరాబాద్లో ఎంఐఎం వర్సెస్ బీజేపీ
- మెదక్ మినహా ఎక్కడా ప్రభావం చూపని బీఆర్ఎస్
- గులాబీ ఓట్లు బీజేపీ, కాంగ్రెస్కు షిఫ్ట్
- పలుచోట్ల బీజేపీకి తెర వెనుక బీఆర్ఎస్ సపోర్ట్!
హైదరాబాద్, వెలుగు: రాష్ట్రంలో సోమవారం జరిగిన లోక్సభ ఎన్నికల్లో కాంగ్రెస్, బీజేపీ మధ్యే హోరాహోరీ పోరు నడిచింది. రాజ్యాంగం, రిజర్వేషన్లు, దేశభద్రత, హిందుత్వ తదితర జాతీయ అంశాలే ఎజెండాగా ఈ లోక్ సభ ఎన్నికలు జరగడంతో బీఆర్ఎస్ పెద్దగా ప్రభావం చూపలేదని, ఆ పార్టీ మూడోస్థానానికే పరిమితమైందని పోలింగ్సరళిని బట్టి స్పష్టమవుతోంది. ఆదిలాబాద్, వరంగల్, మహబూబ్నగర్లాంటి నియోజకవర్గాల్లో బీఆర్ఎస్ లీడర్లు తెరవెనుక బీజేపీకి సపోర్ట్ చేసినట్టు తెలిసింది. రాష్ట్రంలో17 ఎంపీ సీట్లు ఉండగా15 సీట్లలో కాంగ్రెస్, బీజేపీ మధ్య ప్రధాన పోటీ నెలకొనగా, ఒక్క మెదక్ లో మాత్రమే కాంగ్రెస్, బీజేపీ, బీఆర్ఎస్ నడుమ ముక్కోణపు పోటీ కనిపించింది.
ఇక హైదరాబాద్ లో ఎంఐఎం, బీజేపీ నడుమ హోరాహోరీ నడిచింది. హైదరాబాద్ లో ఎంఐఎం ప్రభావం తగ్గించేందుకు ఈసారి బీజేపీ బలమైన నేతను బరిలోకి దించింది. పార్టీ అభ్యర్థి మాధవీలతను వ్యూహాత్మకంగా ప్రమోట్చేసిన బీజేపీ హైకమాండ్, ఓల్డ్ సిటీలో దూకుడుగా ప్రచారం నిర్వహించింది. హైదరాబాద్ లో ప్రధాని సభతో పాటు ఓల్డ్ సిటీలో అమిత్ షా రోడ్ షో నిర్వహించడం, హిందూ ఓట్లు పోలరైజ్అయ్యేలా చర్యలు తీసుకోవడంతో ఒక దశలో పతంగి పార్టీ కలవరపాటుకు లోనైంది.
కాంగ్రెస్ వర్సెస్ బీజేపీ
ఈ సారి లోక్ సభ ఎన్నికలు వివిధ జాతీయ అంశాల చుట్టే తిరిగాయి. మోదీ, అమిత్షా లాంటి నేతలు తమ ప్రసంగాల్లో దేశభద్రత, ఉగ్రదాడులు, రామాలయం, హిందుత్వ లాంటి అంశాలను ప్రస్తావిస్తూ ఓట్లడిగారే తప్ప స్థానిక సమస్యలను ఎక్కడా టచ్చేయలేదు. మొదటి రెండు దశల పోలింగ్తర్వాత మోదీ అనూహ్యంగా కాంగ్రెస్పై ఘాటైన విమర్శలు చేశారు. హస్తం పార్టీ అధికారంలోకి వస్తే హిందువుల ఆస్తులను లాక్కుని ముస్లింలకు పంచి పెడుతుందంటూ ప్రధాని చేసిన వ్యాఖ్యలు దేశవ్యాప్తంగా కలకలం రేపాయి.
దీనికి కౌంటర్ గా సీఎం రేవంత్ రెడ్డి రిజర్వేషన్ల అంశాన్ని తెరపైకి తెచ్చారు. ఈ సారి మోదీ కేంద్రంలో అధికారంలోకి వస్తే ఎస్సీ, ఎస్టీ, బీసీ రిజర్వేషన్లను ఎత్తేస్తారని రేవంత్ ఆరోపించారు. అందుకే మోదీ 400 సీట్లను అడుగుతున్నారని లాజిక్తో కొట్టారు. ప్రజాస్వామ్యాన్ని, రాజ్యాంగాన్ని, రిజర్వేషన్లను రక్షించుకోవాలంటే కాంగ్రెస్ పార్టీని గెలిపించాలని ఓటర్లకు కాంగ్రెస్ నేతలు విజ్ఞప్తి చేశారు. రాహుల్, ప్రియాంక, ఖర్గే లాంటి జాతీయస్థాయి నేతలు కూడా ఇదే అంశాన్ని ఎత్తుకున్నారు. బీజేపీ విద్వేష రాజకీయాల వల్ల హైదరాబాద్కు కంపెనీలు రాకుండా పోయే ప్రమాదముందని, బీజేపీ పాలిత ఉత్తరప్రదేశ్లో పెట్టుబడులు రాకపోవడానికి ఇదే కారణమని చివరి రెండు రోజుల ప్రచారంలో రేవంత్ గట్టిగా చెప్పారు. తద్వారా ఈ ఎన్నికలు కాంగ్రెస్వర్సెస్ బీజేపీగా మారిపోయాయి.
ఎజెండా లేని బీఆర్ఎస్
ఐదు నెలల కింద జరిగిన అసెంబ్లీ ఎన్నికల్లో ఓటమిపాలైన బీఆర్ఎస్.. పార్లమెంట్ ఎన్నికలకు తగినట్టు సిద్ధం కాలేదు. తమ అభ్యర్థులను ఎంపీలుగా గెలిపించి, ఢిల్లీకి పంపితే రాష్ట్రానికి ఏమి చేస్తామో ఆ పార్టీ పెద్దలు చెప్పలేకపోయారు. పార్టీకి మేనిఫెస్టో లేక, ప్రచారాస్త్రాలు లేక కేవలం ఐదు నెలల కాంగ్రెస్పాలనను విమర్శించడమే పనిగా పెట్టుకున్నారు.
ఓవైపు నియోజకవర్గాల్లో లీడర్లు, కేడర్ చేజారుతున్నా పట్టించుకోకుండా కేవలం కేసీఆర్ నిర్వహించిన బస్సు యాత్ర పైనే ఆశలు పెట్టుకున్నారు. తాజా పోలింగ్సరళిని బట్టి ఒక్క మెదక్ లో మాత్రమే బీఆర్ఎస్ జాతీయ పార్టీలైన బీజేపీ, కాంగ్రెస్కు గట్టిపోటీ ఇచ్చింది. అక్కడ కూడా రైతులు, మహిళలు, బీసీలఓట్లు కాంగ్రెస్ కు పడగా, యూత్, అర్బన్ ఓట్లన్నీ బీజేపీకి పడినట్టు తెలుస్తోంది. ఇక హరీశ్రావు ప్రాతినిధ్యం వహిస్తున్న సిద్దిపేట, కేసీఆర్ ప్రాతినిధ్యం వహిస్తున్న గజ్వేల్ లో కూడా ఇదే పరిస్థితి కనిపించింది.
