కర్నాటక హైకోర్టుకు 101 పేజీల రిపోర్టు సమర్పించిన కేంద్రం
బెంగళూరు: సోషల్ మీడియా దిగ్గజం ట్విట్టర్ సంస్థ కావాలనే మన దేశ చట్టాలను ఉల్లంఘిస్తోందని, దానికి మన చట్టాలంటే విలువ లేదని కేంద్రం మండిపడింది. దేశ భద్రతకు సంబంధించిన అంశాల్లో ట్విట్టర్ ఏ రకంగా పనికొస్తలేదని మండిపడింది. రాజకీయ ట్వీట్లను తొలగించాలని, వెరిఫై చేయని ఖాతాలను బ్లాక్ చేయాలని ప్రభుత్వం ఒత్తిడి చేస్తోందంటూ ట్విట్టర్ కంపెనీ కర్నాటక హైకోర్టులో పిటిషన్ వేసింది.
అలా చేయడం వాక్ స్వాతంత్ర్యాన్ని దెబ్బతీసినట్లే అవుతుందని చెప్పింది. ఇందుకు వివరణ ఇస్తూ కేంద్ర సమాచార మంత్రిత్వ శాఖ 101 పేజీల రిపోర్టును కోర్టుకు శుక్రవారం సమర్పించింది. ధృవీకరించని ఖాతాలను తీసేయాలని మాత్రమే ట్విట్టర్ను ఆదేశించామని, రాజకీయ ట్వీట్లను తొలగించాలని చెప్పలేదని రిపోర్టులో వివరించింది. తాము నోటీసు ఇచ్చాకే పిటిషనర్ ట్విట్టర్ ప్లాట్ఫాంలో తనకు అనుకూలంగా మార్పులు చేసుకున్నారని ఆరోపించింది. కాగా, ఈ నెల 8న విచారణ జరపనున్నట్లు కోర్టు తెలిపింది.
