గుండె జబ్బులతో ఏటా లక్షలాది మంది చనిపోతున్నారు. కొందరికి గుండె మార్పిడి చేయాల్సి వస్తోంది. కానీ, గుండె దొరకడం అంటే మామూలు మాట కాదు కదా. అట్లాంటి అవసరం ఉన్న వాళ్ల కోసమే గుండె మొత్తాన్ని త్రీడీ ప్రింట్ తీసే కొత్త పద్ధతిని అమెరికాలోని కార్నెజీ మిలన్ యూనివర్సిటీ సైంటిస్టులు అభివృద్ధి చేశారు. గుండె మొత్తాన్ని త్రీడీ ప్రింట్ తీసేయొచ్చట. మనిషి శరీర నిర్మాణంలో కీలకమైన కొలాజెన్ అనే ప్రొటీన్తో గుండెను త్రీడీ ప్రింట్ తీయొచ్చని సైంటిస్టులు చెప్పారు. ఈ టెక్నిక్ను ఫ్రీఫార్మ్ రివర్సిబుల్ ఎంబెడ్డింగ్ సస్పెండెడ్ హైడ్రోజెల్స్ (ఫ్రెష్) అని పిలుస్తున్నారు. కణాలు, కొలాజెన్ను వాడుకుంటూ గుండె గోడలు, వెంట్రికిల్ ను ప్రింట్ తీశామని, అవి పూర్తిగా పనిచేస్తున్నాయని సైంటిస్టులు చెబుతున్నారు.
‘‘రోగి గుండె ఎంఆర్ఐ డేటా ఆధారంగా ఆ రోగికి సరిపోయే గుండెను కచ్చితత్వంతో ప్రింట్ చేయగలిగాం” అని చెప్పారు. అన్ని సందర్భాల్లోనూ అవయవ దాతలు దొరకరు కాబట్టి, కృత్రిమ అవయవాలు తయారు చేసుకోవాల్సిన అవసరం ఏర్పడుతోందని చెబుతున్నారు. ఫ్రెష్ త్రీడీ టెక్నిక్ ద్వారా కొలాజెన్ గట్టిపడేలా ఓ జెల్ను కలిపి పొరలుపొరలుగా గుండెలా త్రీడీ ప్రింట్ తీశారు. తర్వాత రూం టెంపరేచర్ వద్దే ఆ ప్రింట్ తీసిన గుండెకు అంటిన జెల్ను కరిగించేశారు. దానిని వేడి చేసినా ప్రింట్ తీసిన గుండెకి ఎలాంటి డ్యామేజ్ జరగలేదు. పెద్ద సంఖ్యలో కృత్రిమంగా అవయవాలను తయారు చేయడానికి ఇదో మంచి టెక్నిక్ అవుతుందని సైంటిస్టులు భావిస్తున్నారు. ఒక్క కొలాజెన్తో కాకుండా ఫైబ్రిన్, ఆల్జినేట్, హయాలురోనిక్ యాసిడ్ వంటి మృదువైన జెల్స్తోనూ వాటిని త్రీడీ ప్రింట్ తీయొచ్చని అంటున్నారు. అంతేకాదు, అందరికీ అందేలా ఓపెన్సోర్స్ డిజైన్ను తయారు చేశారు.మెడికల్ ల్యాబులు, స్కూళ్లలో సైన్స్ క్లాసులకూ వాటిని వాడుకునే అవకాశం కల్పించారు. వాటి ధర కూడా చాలా తక్కువే ఉంటుందని చెబుతున్నారు.