మేడారం జాతరకు జాతీయ హోదా కల్పించలేమని కేంద్రమంత్రి కిషన్ రెడ్డి అన్నారు. దేశంలో ఏ జాతరకు జాతీయ హోదా ఇవ్వలేదన్నారు. నవంబర్ 29న హన్మకొండలోని సెంట్రల్ ఆర్కాలజీ అధికారుల తో కలిసి వెయ్యి స్థంబాల ఆలయాన్ని సందర్శించారు. అభివృద్ధి పనులు ఆలస్యంపై అధికారుల తీరుపై అసహనం వ్యక్తం చేశారు.
ఈ సందర్భంగా మాట్లాడిన కిషన్ రెడ్డి.. వరంగల్ కు కేంద్ర ప్రభుత్వం ప్రాధాన్యత ఇస్తోందన్నారు. హెరిటేజ్ సిటీ, స్మార్ట్ సిటీకి నిధులు ఇచ్చామన్నారు. వెయ్యి స్తంభాల ఆలయంలో మండపం పునర్నిర్మాణం చేశామని చెప్పారు. భద్రాచలం రూ. 50 కోట్లు , రామప్పను రూ.150 కోట్లతో అభివృద్ది చేస్తున్నామన్నారు. ప్రసాద్ స్కీమ్ లో రామప్ప, భద్రాచలం, జోగులాంబ ఆలయాన్ని డెవలప్ మెంట్ చేస్తున్నామని తెలిపారు. మేడారం జాతర విషయాన్ని కేంద్ర ట్రైబల్, టూరిజం మంత్రి దృష్టికి తీసుకెళ్తామని చెప్పారు కిషన్ రెడ్డి.
ఆసియా ఖండంలోనే అతిపెద్దదైన మేడారం సమ్మక్క, సారలమ్మ జాతరను ప్రతి రెండు సంవత్సరాలకు ఒకసారి మాఘ పౌర్ణమి రోజుల్లో జరుపుతారు. మేడారం జాతరను.. జాతీయ పండుగగా ప్రకటించాలని తెలంగాణ ప్రభుత్వం కేంద్రాన్ని కోరుతున్న విషయం తెలిసిందే. రాష్ట్ర ప్రభుత్వం నుంచి కేంద్రానికి ఇప్పటివరకు చాలాసార్లు ప్రతిపాదనలు వెళ్ళినా ఇంతవరకు జాతీయ హోదా లభించలేదు.
జాతరకు 900 ఏండ్ల చరిత్ర
కోయ గిరిజనుల ఉనికి కోసం పోరు సల్పిన సమ్మక్క, సారలమ్మ జాతర ఓరుగల్లును పాలించిన ప్రతాప రుద్ర చక్రవర్తి కాలం నుంచి కొనసాగుతున్నట్లు స్థలపురాణాలు చెబుతున్నాయి. జాతరకు 900ఏండ్ల చరిత్ర ఉంది. ఆ కాలంలో మేడారం ప్రాంతాన్ని పగిడిద్దరాజు పరిపాలించేవాడు. ఆయన కాకతీయుల సామంతరాజు. ఆయన సతీమణి సమ్మక్క. పగిడిద్దరాజు సమ్మక్క దంపతులకు సారలమ్మ, నాగులమ్మ , జంపన్న అనే ముగ్గురు సంతానం. ఆ కాలంలో వరుసగా మూడు నాలుగేండ్ల పాటు అనావృష్టి ఏర్పడటంతో ప్రజలు పన్నులు కట్టలేని స్థితికి చేరుకున్నారు.
పగిడిద్దరాజు కప్పం చెల్లించేందుకు నిరాకరించడంతో ప్రతాపరుద్ర చక్రవర్తి గిరిజనులను అణచి వేయడానికి సైనికులను పంపాడు. పగిడిద్దరాజు అతని కుమార్తెలు నాగులమ్మ, సారలమ్మ అల్లుడు గోవిందరాజులతో కలిసి కాకతీయ సైన్యాన్ని మేడారం సరిహద్దులోని సంపెంగ వాగు వద్ద నిలువరించి వీరోచితంగా పోరాడి వీర మరణం పొందినారు. కుమారుడు జంపన్న సంపెంగ వాగులో దూకి ఆత్మహత్య చేసుకున్నాడు.
