ఇప్పుడు బీ-టౌన్ నుంచి టీ టౌన్ దాకా బాలీవుడ్ స్టార్స్ విక్కీ కౌశల్, కత్రినా కైఫ్ పెళ్లి వేడుక గురించే మాట్లాడుకుంటున్నారు. రాజస్తాన్లోని బర్వారా కోటలో ఉన్న ‘సిక్స్ సెన్సెస్’ రిసార్ట్లో వీళ్ల పెళ్లి జరగనుంది. మెహందీ ఫంక్షన్తో పెండ్లి తంతు మొదలవుతుంది. పెండ్లికూతురు కత్రినా కైఫ్కి మెహందీ పెట్టేందుకు వెళ్లింది ఎవరో తెలుసా?... సెలబ్రిటీ మెహందీ ఆర్టిస్ట్ వీణ నగ్డా. దాదాపు 30 ఏండ్లుగా మెహందీ ఆర్టిస్ట్గా ఉన్న నగ్డాకి ‘బాలీవుడ్ మెహందీ క్వీన్’ అని పేరుంది.
‘బిగ్ ఫ్యాట్ వెడ్డింగ్స్’ నుంచి చాలామంది బాలీవుడ్ స్టార్స్ పెండ్లి వేడుకల్లో మెహందీ పెట్టింది నగ్డా. పెండ్లిండ్లు అనేకాదు... పండుగ, కమర్షియల్ యాడ్స్ లేదంటే సినిమా షూటింగ్... ఫంక్షన్ ఏదైనా సరే మెహందీ అనగానే బాలీవుడ్ సెలబ్రిటీలకి ముందుగా గుర్తొచ్చేది నగ్డానే. డెస్టినేషన్ వెడ్డింగ్ అయినా కూడా ఆమెతో మెహందీపెట్టించుకునేందుకు ఇష్టడపతారు బాలీవుడ్ బ్యూటీలు. అందుకే.. మూడేండ్ల క్రితం దీపిక పదుకోన్కి మెహందీ వేయడానికి ఇటలీకి వెళ్లింది. అంతేకాదు వరుణ్ ధావన్, నటాషా దలాల్ల పెండ్లిలో, సోనమ్ కపూర్కి మెహందీ వేసింది తనే. పెండ్లి కూతురికి మెహందీ పెట్టడమే కాకుండా నెయిల్ పాలిష్, బ్లాక్ మెహందీ, స్టోన్ లేదా డైమండ్ మెహందీవేయడంలో స్పెషలిస్ట్ కూడా. తనకి వచ్చిన ఆర్ట్ని ఇంట్రెస్ట్ ఉన్నవాళ్లకి నేర్పిస్తుంది కూడా. ఇప్పటి వరకూ మెహందీ డిజైనింగ్లో
50 వేలమంది స్టూడెంట్స్కి ట్రైనింగ్ ఇచ్చింది.
బాలీవుడ్కి వచ్చిందిలా
బాలీవుడ్ డైరెక్టర్ ఫరా ఖాన్ తన పెండ్లికి నగ్డాతో మెహందీ పెట్టించుకుంది. నగ్దా మెహందీఆర్ట్ గురించి తెలుసుకున్న డైరెక్టర్లు ఆమెని తమ సినిమాల్లో మెహందీ పెట్టేందుకు పిలిచేవాళ్లు. అలా ఇప్పటివరకూ ‘కభీ ఖుషీ కభీ గమ్’, ‘కల్ హో నహో’, ‘పాటియాల హౌస్’, ‘ఏ జవానీ హై దీవానీ’ వంటి సినిమాల్లో హీరోయిన్లకి మెహందీ పెట్టింది నగ్డా. అంతేకాదు‘ఏ దిల్ హై ముష్కిల్’ సినిమాలోని ‘చెన్నా మేరేయా’ పాటలో రణ్బీర్ కపూర్కి మెహందీ పెట్టింది కూడా తనే. బాలీవుడ్లో ఆమె మెహందీ ఆర్ట్కి బోల్డెంతమంది ఫ్యాన్స్ ఉన్నారు. డింపుల్ కపాడియా, మాధురి దీక్షిత్, శిల్పా షెట్టిల నుంచి ఈతరం హీరోయిన్లు అనన్యా పాండే నుంచి అలియా భట్ వరకు అందరూ వీణ దగ్గర మెహందీ పెట్టించుకున్నవాళ్లే.
పార్టీలు, ఫంక్షన్లతో మొదలు
“మాది ముంబై. మిడిల్ క్లాస్ జైన్ కుటుంబంలో పుట్టాను. టెన్త్ క్లాస్ ఫస్ట్క్లాస్లో పాస్ అయినా కూడా మావాళ్లు నన్ను చదివించలేదు. దాంతో ఇంట్లో ఉంటూనే చీరల మీద ఎంబ్రాయిడరీ వేయడం, మెహందీపెట్టడం నేర్చుకునేదాన్ని. మెహందీఆర్టిస్ట్గా నా జర్నీ అప్పుడే మొదలైంది. పార్టీలు, ఫంక్షన్లకి మెహందీపెట్టడానికి వెళ్లేదాన్ని. అలా ఒకరోజు అంబానీల ఇంట్లో ఎంగేజ్మెంట్ పార్టీకి వెళ్లాను. నా మెహందీఆర్ట్ వాళ్లకి బాగా నచ్చింది. దాంతో పెండ్లికి మెహందీపెట్టడానికి కూడా నన్నే పిలిచారు. అప్పటి నుంచి ఆర్డర్లు రావడం మొదలైంది. ఆ తర్వాత బాలీవుడ్లోనూ ఎంట్రీ ఇచ్చాను” అంటూ ఒకప్పటి రోజుల్ని గుర్తు చేసుకుంది. నగ్డా.
