మోర్తాడ్, వెలుగు : సీఎం కేసీఆర్ పాలనలో ఎన్నో మానవీయ పథకాలను ప్రవేశాపెడుతున్నారని ఆర్ అండ్ బీ మినిస్టర్ వేముల ప్రశాంత్ రెడ్డి తెలిపారు. వేల్పూర్ మండల కేంద్రంలోని ప్రైమరీ స్కూల్ లో శుక్రవారం ‘సీఎం బ్రేక్ ఫాస్ట్’ కార్యక్రమాన్ని ప్రారంభించారు. ఈ సందర్భంగా ఆయన మాట్లాడుతూ ఒకప్పుడు 200 రెసిడెన్షియల్ పాఠశాలలు ఉంటే ఆ సంఖ్యను సీఎం కేసీఆర్ 1000 పైగా చేశారని చెప్పారు.
పేదవారు కూడా ప్రపంచంతో పోటీ పడేలా మంచి విద్యను అభ్యసించాలని కార్పొరేట్ స్కూళ్లకు ధీటుగా గవర్నమెంట్ స్కూళ్లలో ఇంగ్లీష్ మీడియం ఏర్పాటు చేశామన్నారు. ఊరు మన బడిలో భాగంగా పలు స్కూళ్లను బాగుచేసుకొని డిజిటల్ క్లాస్ రూమ్స్ ఏర్పాటు చేసుకున్నామని తెలిపారు. మధ్యాహ్న భోజన పథకంలాగే స్టూడెంట్స్కు పౌష్టికాహారం అందించేందుకు సీఎం బ్రేక్ ఫాస్ట్ కార్యక్రమాన్ని ప్రారంభించినట్లు చెప్పారు.
తానూ ఇదే స్కూల్లో చదువుకున్నానని, నేడు మంత్రి హోదాలో ఇక్కడే సీఎం బ్రేక్ ఫాస్ట్ కార్యక్రమంలో పాల్గొనడం ఆనందంగా ఉందన్నారు. వేల్పూర్ స్కూల్లో 640 మంది విద్యార్థులకు , నిజామాబాద్ జిల్లా వ్యాప్తంగా 1.46 లక్షల మంది స్టూడెంట్స్కు సీఎం బ్రేక్ ఫాస్ట్ అందనుందని చెప్పారు. అనంతరం విద్యార్థినులకు శానిటరీ నాప్కిన్స్ అందజేశారు.
పలు స్కూళ్లలో...
నిజామాబాద్/కామారెడ్డి/ఆర్మూర్/బాన్సువాడ/మాక్లూర్, వెలుగు : జిల్లాలోని ఆయా స్కూళ్లలో పలువురు అధికారులు, లీడర్లు సీఎం బ్రేక్ ఫాస్ట్ కార్యక్రమాన్ని ప్రారంభించారు. బాన్సువాడ మండలం ఇబ్రహీంపేటలోని స్కూల్లో స్పీకర్ పోచారం శ్రీనివాస్రెడ్డి, కామారెడ్డి మున్సిపాల్టీ పరిధిలోని దేవునిపల్లి హైస్కూల్లో విప్ గంప గోవర్ధన్, పిట్లం మండలం బోయవాడలోని స్కూల్లో ఎమ్మెల్యే హన్మంతుషిండే, జడ్పీ చైర్పర్పన్దఫేదర్ శోభ, కలెక్టర్ జితేష్ వి పాటిల్,
రామారెడ్డి మండలం ఇసన్నపల్లిలో ఎమ్మెల్యే జాజాల సురేంధర్, ఆర్మూర్ టౌన్ లోని రాంమందిర్ హైస్కూల్ లో ఎమ్మెల్యే, పీయూసీ చైర్మన్ ఆశన్నగారి జీవన్ రెడ్డి, నిజామాబాద్లో కలెక్టర్ రాజీవ్గాంధీ హన్మంతు మాట్లాడారు. ముందు చూపుతో ప్రవేశ పెట్టిన సీఎం బ్రేక్ ఫాస్ట్ పథకం స్టూడెంట్స్ కు వరమన్నారు.
