వనపర్తి టౌన్, వెలుగు: రోజురోజుకు సాంకేతికపరంగా అనేక మార్పులు వస్తున్నాయని, వాటికి అనుగుణంగా విద్యార్థులు సైన్స్ లో కొత్త ఆలోచనలకు పదును పెట్టాలని కలెక్టర్ ఆదర్శ్ సురభి సూచించారు. శుక్రవారం వనపర్తి మండలం చిట్యాల బీసీ గురుకుల పాఠశాలలో నిర్వహిస్తున్న 53వ జిల్లా స్థాయి బాల వైజ్ఞానిక ప్రదర్శన, ఇన్స్పైర్ అవార్డుల కార్యక్రమాన్ని కలెక్టర్ ప్రారంభించారు. ఈ సందర్భంగా ఆయన మాట్లాడుతూ విద్యార్థులు చిన్నప్పటి నుంచి కొత్త ఆలోచనలపై దృష్టి సారించాలని సూచించారు.
సైన్స్ తో ప్రకృతిలో దాగి ఉన్న నిజాలను తెలుసుకోవచ్చని చెప్పారు. సమాజంలోని సమస్యల పరిష్కారానికి సైన్స్ మార్గం చూపిస్తుందని, అది సృజనాత్మక ఆలోచనలతోనే సాధ్యమవుతుందన్నారు. అనంతరం సైన్స్ టీచర్లతో రూపొందించిన బుక్ను కలెక్టర్ ఆవిష్కరించారు. విద్యార్థులు తయారు చేసిన ఎగ్జిబిట్స్ ను కలెక్టర్ పరిశీలించి వివరాలు అడిగి తెలుసుకున్నారు. డీఈవో అబ్దుల్ ఘని, జిల్లా సైన్స్ అధికారి శ్రీనివాసులు, తహసీల్దార్ రమేశ్ రెడ్డి, ఎంఈవో మద్దిలేటి, ప్రిన్సిపాల్ ప్రశాంతి పాల్గొన్నారు.
ఎన్నికల నిర్వహణలో ఆర్వోల పాత్ర కీలకం
వనపర్తి: గ్రామ పంచాయతీ నామినేషన్ల స్వీకరణలో పొరపాట్లు జరగకుండా చూసుకోవాలని, ఎన్నికల నిర్వహణలో రిటర్నింగ్ అధికారుల పాత్ర కీలకమని కలెక్టర్ ఆదర్శ్ సురభి తెలిపారు. శుక్రవారం కలెక్టరేట్లో గ్రామ పంచాయతీ రెండు, మూడో దశ ఎన్నికల నామినేషన్ల స్వీకరణపై ఎన్నికల సాధారణ పరిశీలకుడు మల్లయ్య బట్టు, వ్యయ పరిశీలకుడు శ్రీనివాసులుతో కలిసి రిటర్నింగ్ అధికారులతో సమావేశం నిర్వహించారు.
అభ్యర్థులు నామినేషన్లను జాగ్రత్తగా పరిశీలించాలని, అన్ని వివరాలను భర్తీ చేయాలని వారికి తెలియజేయాలన్నారు. నామినేషన్లను జాగ్రత్తగా పరిశీలించాలని సూచించారు. రిటర్నింగ్ అధికారులు ఎలాంటి పక్షపాతం లేకుండా వ్యవహరించాలని, ఎన్నికల సంఘం నిబంధనల ప్రకారం నడుచుకోవాలన్నారు. అడిషనల్ కలెక్టర్ యాదయ్య, డీపీవో తరుణ్, డిప్యూటీ సీఈవో రామ మహేశ్వర్, డీటీవో శ్రీనివాసులు పాల్గొన్నారు.
