రైలు కంపార్ట్‌మెంట్‌లో ఓ మహిళా కానిస్టేబుల్ గాయపడి రక్తపు మడుగులో పడి ఉన్న ఘటనపై అలహాబాద్ హైకోర్టు.. రైల్వే ప్రొటెక్షన్ ఫోర్స్‌పై తీవ్ర ఆగ్రహం వ్యక్తం చేసింది. ప్రధాన న్యాయమూర్తి ప్రిటింకర్ దివాకర్, జస్టిస్ అశుతోష్ శ్రీవాస్తవతో కూడిన ద్విసభ్య ధర్మాసనం RPF తన విధులను నిర్వర్తించడంలో విఫలమైనందుకు మందలించింది. సెప్టెంబర్ 13లోగా తమ దర్యాప్తు పురోగతి నివేదికను అందజేయాలని ప్రభుత్వ రైల్వే పోలీసులను (జీఆర్పీ) ఆదేశించారు.
"ప్రస్తుత సంఘటన భారతీయ రైల్వే చట్టంలోని కొన్ని నిబంధనలను పూర్తిగా ఉల్లంఘించడాన్ని స్పష్టంగా చూపిస్తుంది. అంతేకాకుండా, ప్రయాణీకుల రక్షణ కోసం రూపొందించిన నియమాలు, నిబంధనలను అమలు చేయడంలో రైల్వే రక్షణ దళం కూడా తమ విధులు, బాధ్యతలను నిర్వర్తించడంలో పూర్తిగా విఫలమైంది. ప్రస్తుత సంఘటన మహిళలపై నేరం మాత్రమే కాదు, మొత్తం సమాజానికి వ్యతిరేకంగా ఉంది. ఇది మొత్తం మహిళలను మానసికంగా నాశనం చేస్తుంది" అని కోర్టు తెలిపింది.
సరయూ ఎక్స్‌ప్రెస్‌లో మహిళా కానిస్టేబుల్‌పై దాడికి సంబంధించి వాట్సాప్ లో ఓ వార్త వైరల్ కావడంతో సెప్టెంబర్ 3న సాయంత్రం ప్రధాన న్యాయమూర్తి దివాకర్ తన ఇంటి వద్ద సాయంత్రం సెషన్‌లో స్వయంగా చర్య తీసుకున్నారు. తాను, జస్టిస్ శ్రీవాస్తవతో కూడిన ధర్మాసనాన్ని ఏర్పాటు చేయాలని ఆదేశించిన ఆయన, కేంద్రానికి, ఆర్పీఎఫ్‌కి నోటీసులు అందజేయాలని ఆదేశించారు.
ఆగస్టు 30న అయోధ్య స్టేషన్‌లో సరయూ ఎక్స్‌ప్రెస్ రైలు కంపార్ట్‌మెంట్‌లో అపస్మారక స్థితిలో ఉన్న మహిళా కానిస్టేబుల్ ముఖంపై పదునైన ఆయుధంతో దాడి చేసినట్టుగా.. కనిపించింది. అనంతరం ఆమెను లక్నోలోని కేజీఎంసీ ఆసుపత్రిలో చేర్పించారు, ప్రస్తుతం ఆమె పరిస్థితి నిలకడగా ఉందని జీఆర్పీ తెలిపింది. కానిస్టేబుల్ సోదరుడి రాతపూర్వక ఫిర్యాదుతో, IPC సెక్షన్లు 332 (ప్రభుత్వ ఉద్యోగిని వారి డ్యూటీ నుంచి నిరోధించడానికి స్వచ్ఛందంగా హాని కలిగించడం), 353 (ప్రభుత్వ ఉద్యోగిని వారి విధులను నిర్వర్తించకుండా నిరోధించడానికి దాడి లేదా నేరపూరిత శక్తి), 307 కింద(హత్యా ప్రయత్నం) FIR నమోదు చేశారు. అయితే ఇప్పటి వరకు లైంగిక వేధింపులకు సంబంధించి ఎలాంటి ఆధారాలు లేవని పోలీసులు తెలిపారు. తదుపరి విచారణ కొనసాగుతోంది.
