IND W vs BAN W: మహిళల ఆసియా కప్ 2026 టోర్నీలో అత్యంత ఉత్కంఠభరితమైన నాకౌట్ యుద్ధానికి సమయం ఆసన్నమైంది. గ్రూప్ స్టేజ్లో తిరుగులేని విజయాలతో చెలరేగిన భారత మహిళల క్రికెట్ జట్టు, నేడు (సెప్టెంబర్ 10, గురువారం) జరగనున్న తొలి సెమీఫైనల్ పోరులో బంగ్లాదేశ్తో ఢీకొట్టనుంది. దుబాయ్ ఇంటర్నేషనల్ క్రికెట్ స్టేడియం వేదికగా రాత్రి 8:00 గంటలకు ఈ బిగ్ ఫైట్ ప్రారంభం కానుంది. 2004 నుంచి ప్రతిసారి ఫైనల్కు చేరిన ఏకైక జట్టుగా రికార్డు సృష్టించిన ఇండియా, ఈసారి కూడా గెలిచి ఎనిమిదోసారి ఆసియా కప్ ట్రోఫీని ముద్దాడాలనే పట్టుదలతో బరిలోకి దిగనుంది.
బంగ్లాపై ప్రతీకారం తీర్చుకోనున్న హర్మన్ సేన:
ఈ హై-వోల్టేజ్ సెమీఫైనల్ పోరు కేవలం ఫైనల్ బెర్త్ కోసమే కాదు, పాత కసి తీర్చుకోవడానికి కూడా భారత్కు లభించిన గోల్డెన్ ఛాన్స్. 2018 ఆసియా కప్ ఫైనల్లో భారత్కు షాక్ ఇచ్చి బంగ్లాదేశ్ తొలిసారి ఛాంపియన్గా నిలిచిన సంగతి తెలిసిందే. ఆ ఓటమికి బదులు తీర్చుకోవాలని ఇండియన్ నారీ సేన కసితో ఉంది. అంతర్జాతీయ T20ల్లో ఇరు జట్ల రికార్డులను పరిశీలిస్తే భారత్దే పూర్తి ఆధిపత్యం. ఇప్పటివరకు ఆడిన 24 మ్యాచ్ల్లో భారత్ 21 సార్లు గెలవగా, బంగ్లాదేశ్ కేవలం 3 సార్లే విజయం సాధించింది. ఈ ఏడాది జూన్లో జరిగిన మ్యాచ్లోనూ టీమిండియా 5 వికెట్ల తేడాతో బంగ్లాపై నెగ్గింది.
►ALSO READ | హిట్మ్యాన్ పంచ్కు చీఫ్ సెలెక్టర్ ఔట్.. రోహిత్ టీ-షర్ట్ చూసి అగార్కర్ మైండ్ బ్లాకింగ్!
అజేయంగా దూసుకొచ్చిన భారత్.. బంగ్లాకు కష్టమే!
ఈ టోర్నీలో భారత జట్టు సునాయాసంగా సెమీస్కు దూసుకొచ్చింది. గ్రూప్- ఏలో పాకిస్థాన్, హాంగ్కాంగ్, థాయ్లాండ్లను క్లీన్స్వీప్ చేసి పాయింట్ల పట్టికలో టాప్లో నిలిచింది. మరోవైపు గ్రూప్-బీలో ఉన్న బంగ్లాదేశ్ జట్టు ఇండోనేషియా, యూఏఈలపై గెలిచినప్పటికీ, శ్రీలంక చేతిలో దెబ్బతిని రెండో స్థానంతో సెమీస్ బెర్త్ దక్కించుకుంది. దీంతో ఫామ్పరంగా భారత్ను అడ్డుకోవడం బంగ్లాకు అసాధ్యమనే చెప్పాలి.. కాగా, రెండో సెమీఫైనల్లో సెప్టెంబర్ 11న శ్రీలంక, పాకిస్థాన్ జట్లు తలపడనున్నాయి.
లైవ్ టెలికాస్ట్, ఓటీటీ స్ట్రీమింగ్ వివరాలు ఇవే:
* మ్యాచ్ వేదిక: దుబాయ్ ఇంటర్నేషనల్ క్రికెట్ స్టేడియం
* మ్యాచ్ సమయం: రాత్రి 8:00 గంటలకు (IST)
* టీవీ లైవ్ టెలికాస్ట్: సోనీ స్పోర్ట్స్ నెట్వర్క్ (Sony Sports Network)
* ఓటీటీ లైవ్ స్ట్రీమింగ్: సోనీ లివ్ (Sony LIV) యాప్, వెబ్సైట్
