కూసుమంచి, వెలుగు : పాలేరు మేరీ మాత క్షేత్రంలో ఆసియా ఖండంలోనే అతిపెద్ద 76 అడుగుల మేరీమాత విగ్రహాన్ని గురువారం ఆవిష్కరించారు. పాలేరు ఫాదర్ కొమ్ము అంటోని మత గురువుగా 25 సంవత్సరాలు పూర్తి చేసుకోవడంతో సిల్వర్ జూబ్లీ వేడుకగా నిర్వహించారు. తొలుత పాలేరు చెక్పోస్ట్ నుంచి మేరీ మాత క్షేత్రం వరకు కళారూపాలతో శోభాయాత్ర నిర్వహించారు. జిల్లాలోని వివిధ ప్రాంతాల నుంచి వచ్చినవారు డప్పు, కోలాటం, కొమ్ము నృత్యాలతొ శోభాయాత్ర ఆకట్టుకుంది.
ఈ సందర్భంగా ఫాదర్ కొమ్ము అంటోని, ఖమ్మం పీఠాధిపతి డాక్టర్ సగిలి ప్రకాశ్, నల్గొండ బిషప్ కరణం ధమన్, వరంగల్ బిషప్ డాక్టర్ ఉడుముల బాల, ఖమ్మం విశ్రాంత బిషప్ మైపన్ పాల్, వరంగల్ ప్రొవెన్షియల్ సుపీరియర్ సిస్టర్ బిజీ జోసఫ్ ను ప్రత్యేక వాహనంలో ఊరేగించారు. అనంతరం క్షేత్రం ప్రత్యేక ముఖద్వారాన్ని, ఏసుప్రభు, మరియమాత, మేరీ మాత విగ్రహాలను అతిధులు ఆవిష్కరించారు. ఈ వేడుకల్లో ఉత్సవాల కమిటీ కన్వీనర్ కొమ్ము ప్రసాద్, తెలంగాణ, ఆంధ్ర ప్రదేశ్ కు చెందిన వందమంది మత గురువులు, వేలాదిమంది భక్తులు పాల్గొన్నారు.
