ప్రపంచంలోనే అత్యంత ‘చిన్న’ది ఆ పాప. 245 గ్రాముల బరువుతోనే పుట్టింది. కష్టం.. బతకదు అని డాక్టర్లు చెప్పారు. కానీ, ఆ తల్లిదండ్రులు హాస్పిటల్లోనే ఉంచి అన్ని జాగ్రత్తలు తీసుకున్నారు. చిన్నారిని బతికించుకున్నారు. ఆ పాప పేరు సేబీ. అమెరికాలోని కాలిఫోర్నియాలో ఉంటారు ఆ చిన్నారి తల్లిదండ్రులు. అయితే గత ఏడాది డిసెంబర్లో నెలలు నిండకముందే సేబీ పుట్టింది. ప్రీ ఎక్లాంప్సియా (హై బీపీ)తో ఆమె తల్లికి ముందే ఆపరేషన్ చేయాలని డాక్టర్లు చెప్పారు.
దీంతో 23 వారాల మూడు రోజులకు ప్రపంచాన్ని చూసింది. యాపిల్ పండంత సైజులోనే పుట్టింది. దీంతో బతకలేదని కాన్పు చేసిన శాన్డియాగో లోని షార్ప్ మేరీ బిర్చ్ హాస్పిటల్ ఫర్ వుమెన్ అండ్ న్యూబార్న్ డాక్టర్లు చెప్పారు. తల్లిదండ్రుల పట్టుదలతో ఐదు నెలలు కంటికి రెప్పలా డాక్టర్లు, తల్లిదండ్రులు కాచుకున్నారు. ఇప్పుడు ఆ చిన్నారి బరువు 2.2 కిలోలు. సేబీని అని డాక్టర్లే పేరు పెట్టారు.
