హాస్పిటల్స్ లో తనిఖీలు.. నోటీసులు..నెల గడిచినా చర్యల్లేవ్

•      నెల గడిచినా చర్యలు శూన్యం 
•       హాస్పిటల్స్​లో అడ్డగోలుగా సిజేరియన్లు
•      ఒకరిద్దరే నార్మల్..అందరికీ సిజేరియనే
•      ప్రైవేట్​కు ధీటుగా సర్కారు హాస్పిటల్స్​
•      ప్రైవేట్ లో 83.85 శాతం సిజేరియన్స్​
•      సర్కారు హాస్పిటల్స్​లో 55 శాతం

యాదాద్రి, వెలుగు : యాదాద్రి జిల్లాలో సిజేరియన్ల సంఖ్య పెరిగిపోయిందని హడావుడిగా ప్రైవేట్​హాస్పిటల్స్​ను అధికారులు తనిఖీ చేశారు. వచ్చినవారిలో ఒకరిద్దరు నార్మల్​ డెలివరీ అయితే, మిగిలిన గర్భిణులకు సిజేరియన్​చేస్తున్న కొన్నింటిని గుర్తించి నోటీసులు అందజేశారు. నోటీసులు అందించి.. నెల గడుస్తున్నా వాటిపై ఎలాంటి చర్యలు తీసుకున్న దాఖలాలు లేవు. 

ప్రైవేట్​లో 83. 85 శాతం.. 

ప్రైవేట్ హాస్పిటల్స్​కి వచ్చిన గర్భిణులను కొందరు డాకర్లు ఏటీఎంగా భావిస్తున్నట్టు కన్పిస్తోంది. డెలివరీకి వచ్చిన వారిలో 84 శాతం మందికి సిజేరియన్​చేసి బిడ్డలను బయటకు తీస్తున్నారని హెల్త్​డిపార్ట్​మెంట్​లెక్కలు చెబుతున్నాయి. పేషెంట్​వస్తే చాలు రకరకాల టెస్టులు చేయడం, డెలివరీ సమయానికి వారిని భయాందోళనకు గురిచేస్తున్నారు. నార్మల్​కోసం ప్రయత్నం చేస్తం కానీ.. లేటయితే తల్లీబిడ్డకు ఏమైనాప్రమాదం జరిగితే మాకు సంబంధం లేదంటూ భయపెడుతున్నట్టు తెలుస్తోంది. దీంతో గర్భిణులు ఆపరేషన్లకు సిద్ధపడుతున్నారు.

ఒక్కో ఆపరేషన్​కు ఆస్పత్రి స్థాయిని బట్టి.. రూ.15 వేల నుంచి రూ.60 వేల వరకు తీసుకుంటున్నారు. కొందరు డాక్టర్ల పైసల కక్కుర్తి కారణంగా సిజేరియన్​చేయించుకున్న మహిళలు ఇతరత్రా  అనారోగ్య సమస్యలు ఎదుర్కోవాల్సి వస్తోంది. ఈ ఏడాది జనవరి నుంచి మే నెలాఖరు వరకు ప్రైవేట్​ ఆస్పత్రుల్లో 675 మంది డెలివరీ కాగా, ఇందులో 566 (83.85 శాతం) మందికి సిజేరియన్​చేశారు. కేవలం 109 మంది మాత్రమే నార్మల్​ డెలివరీ అయ్యారు. 

ఒక్కరే నార్మల్..

గడిచిన ఆరు నెలల్లో జిల్లాలోని పలు మండలాల్లో ఒక్కరిద్దరు గర్భిణులు మాత్రమే నార్మల్ డెలివరీ కాగా, మిగిలిన వారందరికీ సిజేరియన్​చేసి బిడ్డలను బయటకు తీశారు. రాజాపేట మండలంలోని పలు ప్రైవేట్​ హాస్పిటల్స్​కు 39 మంది గర్భిణులు వస్తే వారిలో ఒక్కరు మాత్రమే నార్మల్​డెలివరీ అయ్యారు. మిగిలిన 38 మందికి సిజేరియన్​చేశారు. తుర్కపల్లి మండలంలో 48 మంది గర్భిణులు అక్కడి హాస్పిటల్స్​కు వస్తే వీరిలో 46 మందికి సిజేరియన్​చేయడం గమనార్హం. 

ప్రభుత్వాస్పత్రుల్లోనూ..

ప్రభుత్వాస్పత్రుల్లో గతంతో పోలిస్టే  సిజేరియన్ల సంఖ్య పెరిగింది. ప్రైవేట్​కు ధీటుగా ఆపరేషన్లు చేసేస్తున్నారు. ప్రతి వంద మందిలో 55 మందికి ఆపరేషన్లు చేస్తున్నారు. నార్మల్​డెలివరీ చేయాలంటే ఎక్కువ సమయం కేటాయించాల్సి ఉంటుంది. డాక్టర్లు స్థానికంగా ఉండరు కాబట్టి.. వెయిట్​చేయడమెందుకని ఆపరేషన్​చేస్తున్న సంఘటనలు ఉన్నాయి.

కొందరు గర్భిణులు నొప్పులు తట్టుకోలేక ఆపరేషన్​ చేయాలని ఒత్తిడి తెస్తున్నారు. మరికొందరైతే ముహూర్తాలు చూసుకొని ఆపరేషన్​ చేయించుకుంటున్నారు. ఈ ఏడాది జనవరి నుంచి మే 31 వరకు 1268 మంది డెలివరీ అయితే, ఇందులో 700 మందికి సిజేరియన్​ చేశారు. 568 (55 శాతం) మంది నార్మల్ డెలివరీ అయ్యారు.

నెల క్రితం నోటీసులు ఇచ్చినా..

యాదాద్రి జిల్లాలో సిజేరియన్ల సంఖ్య పెరిగిందని లెక్కలు తేలడంతో జిల్లా వైద్యారోగ్యశాఖ భువనగిరి, చౌటుప్పల్​డివిజన్ల పరిధిలోని 16 హాస్పిటల్స్​ను గత నెలలో తనిఖీ చేసింది. ఈ సందర్భంగా గర్భిణులను రిపోర్ట్​తోపాటు కేస్​షీట్లను పరిశీలించారు. వీటిలో సిజేరియన్​ఎందుకు చేయాల్సి వచ్చిందో సరైన కారణాలు పొందుపర్చలేదు. దీంతో 12 హాస్పిటల్స్​రూల్స్​కు విరుద్ధంగా సిజేరియన్​చేశారని అధికారులు నోటీసులు అందజేశారు. ఈ నోటీసులకు ఇప్పటివరకు ప్రైవేట్​హాస్పిటల్స్​నిర్వాహకులు సమాధానం ఇవ్వలేదని సమాచారం. అయినప్పటికీ వాటిపై ఇప్పటివరకు ఎలాంటి చర్యలు తీసుకోలేదు.