సిడ్నీ(ఆస్ట్రేలియా): సరదాగా సర్ఫింగ్ చేయడానికి సముద్రం లోకి వెళ్లిన భార్యాభర్తలకు భారీ షార్క్ ఒకటి షాకిచ్చింది. వారిపై దాడిచేసి, భార్య కాలును దొరకబుచ్చుకుంది. దీంతో భార్యను కాపాడుకునేందుకు ఆ భర్త ఏకంగా షార్క్తోనే ఫైట్ చేసిండు. ఆస్ట్రేలియాలోని పోర్ట్ మాక్వెరీ లో ఈ ఘటన వివరాలను అక్కడి పోలీసులు మీడియాకు చెప్పారు. పోర్ట్ మాక్వెరీ టౌన్ లో మార్క్ రాప్లే అనేటాయన తన భార్యతో కలిసి బీచ్ కు వెళ్లాడు. ఇద్దరూ కలిసి సముద్రంలో సర్ఫింగ్ చేస్తుండగా.. దాదాపు పది అడుగుల పొడవున్న భారీ షార్క్ ఒకటి దాడి చేసింది. ఫస్ట్ టైం తప్పించుకున్నా .. రెండోసారి అటాక్ చేసినపుడు రాప్లే భార్య కాలు షార్క్ నోటికి చిక్కింది. దీంతో ఆమె ప్రాణభయంతో కేకలు వేస్తుండగా.. రాప్లే వేగంగా రియాక్ట్ అయిండు. షార్క్ మీద కలబడి, పిడిగుద్దులు కురిపించిండు. భార్యను కాపాడుకోవాలనే ఉద్దేశంతో ప్రాణాలకు తెగించి, ఫైట్ చేసిండు. రాప్లే దాడితో బెదిరిపోయిన షార్క్.. ఆయన భార్య కాలును విడిచి పరారైంది. అక్కడికి దగ్గర్లోనే సర్ఫింగ్ చేస్తున్న మరో వ్యక్తి ఈ సంఘటనను చూశాక మార్క్ రాప్లేను హీరో అని మెచ్చుకున్నడు. రాప్లే మాత్రం.. ఆ టైంలో ఎవరైనా అదేపని చేస్తారని సింపుల్ గా తీసేసిండు. కాగా, షార్క్ దాడిలో గాయపడ్డ రాప్లే భార్యకు ఫస్ట్ ఎయిడ్ చేసి, ఎయిర్ ఆంబులెన్స్ లో ఆస్పత్రికి తరలించినట్లు పోలీసులు వివరించారు.
