- ఎస్పీ చీఫ్ అఖిలేశ్ యాదవ్
లక్నో: ఎలక్టోరల్ రోల్స్ స్పెషల్ ఇంటెన్సివ్ రివిజన్ (సర్)పై ఎన్నికల కమిషన్, బీజేపీ తొందరపడి వ్యవహరిస్తున్నాయని సమాజ్ వాదీ పార్టీ (ఎస్పీ) చీఫ్ అఖిలేశ్ యాదవ్ ఆరోపించారు. ఓటర్ల హక్కులను దెబ్బతీసేందుకు ఈ రెండు కలిసి పని చేస్తున్నాయని తెలిపారు. ఈ మేరకు లక్నోలో నిర్వహించిన ప్రెస్ కాన్ఫరెన్స్లో అఖిలేశ్ యాదవ్ మాట్లాడారు.
“సర్ ప్రక్రియను నిర్వహించడానికి బీజేపీ తొందరపడుతుంది. బీజేపీ, ఎన్నికల సంఘం ఈ విషయంలో ఒక్కటిగా పని చేస్తున్నాయి. యూపీలో ఇప్పుడు పెళ్లిళ్ల సీజన్. ప్రజలు ప్రయాణాలు చేయడంలో లేదా పెళ్లి ఏర్పాట్లలో బిజీగా ఉంటారు.
ఇలాంటి టైంలో సర్ ప్రక్రియను సమంజసం కాదు” అని చెప్పారు. ఫారమ్లు టెక్నికల్గా సంక్లిష్టంగా ఉన్నప్పటికీ పారిశుధ్య కార్మికులను బూత్ లెవెల్ ఆఫీసర్లకు సహాయకులుగా నియమించడాన్ని అఖిలేశ్ యాదవ్ తప్పుబట్టారు. ‘‘ఫారమ్లు అత్యంత టెక్నికల్ గా ఉన్నాయి. బీఎల్ వోలే వాటిని సరిగ్గా పూర్తి చేయలేకపోతున్నారు.
పారిశుధ్య కార్మికులు ఈ బాధ్యతలను ఎలా నిర్వహిస్తారు” అని ప్రశ్నించారు. సర్ ప్రక్రియ అనేది ప్రణాళికబద్ధమైన కుట్ర అని దీని ద్వారా అధికార పార్టీ రాజ్యాంగ హక్కులను బలహీనపరచాలని చూస్తుందని ఆరోపించారు.
