చెట్ల కొమ్మలు, చెరువు గట్ల మీద పక్షుల్ని చూసినా, వాటి సవ్వడుల్ని విన్నా మనసుకి తెలియని హాయి కలుగుతుంది. అందుకనే చాలామంది వీకెండ్లో పక్షుల్ని చూసేందుకు జూ పార్క్ లేదా బర్డ్ శాంక్చురీలకి వెళ్తుంటారు. అక్కడ నీళ్ల మీద ఎగురుతున్న రంగురంగుల పక్షుల్ని చూస్తూ, వాటి ఫొటోలు తీస్తూ మురిసిపోతారు. అలాగే హైదరాబాద్కు దగ్గర్లో ఉన్న అమీన్పూర్ చెరువు వీకెండ్ టూర్కి బాగుంటుంది. సంగారెడ్డి జిల్లాలో ఉన్న ఈ ప్లేస్కి వెళ్తే పొలాలు, చెరువు గట్ల పొంటి పక్షుల గుంపుని చూస్తూ పెరిగిన చిన్నప్పటి రోజులు గుర్తుకొస్తాయి.
మనరాష్ట్రంలో ఇక్రిశాట్ క్యాంపస్ తర్వాత రకరకాల పక్షులు ఎక్కువగా కనిపించే ప్లేస్ అమీన్పూర్ చెరువు. ఈ ప్రాంతాన్ని 2016లో ‘బయోడైవర్సిటీ హెరిటేజ్ సైట్’గా గుర్తించారు. విశేషం ఏంటంటే... మనదేశంలో మొదటి బయోడైవర్సిటీ హెరిటేజ్ సైట్ ఇదే. ఈ చెరువుని మూడొందల ఏండ్ల కిందట పంటపొలాలు, గార్డెన్లకు నీళ్లు ఇచ్చేందుకు తవ్వించారు. అంత పెద్ద అమీన్పూర్ చెరువు ఇప్పుడు ఐదు చిన్న చెరువులుగా అయింది.
వలస పక్షులకి కేరాఫ్
జూలై నుంచి అక్టోబర్ నెలల మధ్య వలస పక్షులతో ఎంతో సందడిగా ఉంటుంది ఈ చెరువు. తలమీద నల్లని గీతలు ఉండే బాతులు, ఫ్లెమింగో, పెలికాన్, కింగ్ఫిషర్ వంటి పక్షుల్ని చూసేందుకు చాలామంది వెళ్తుంటారు. బర్డ్ లవర్స్, నేచర్ ఫొటోగ్రాఫర్స్ వాటి ఫొటోలు తీసేందుకు పోటీపడుతుంటారు. ఆవాసం ఏర్పాటు చేసుకున్న పక్షులతో పాటు వలస పక్షులు కలిపి దాదాపు 171 రకాల పక్షులు ఉంటాయి ఈ చెరువులో. ఇక్కడ రంగురంగుల సీతాకోకచిలుకల్ని చూస్తుంటే మైమరచిపోవాల్సిందే. అయితే... దాదాపు వంద ఎకరాల్లో విస్తరించిన ఈ చెరువులో కొంత భాగం ఆక్రమణకు గురైంది. దగ్గర్లోని ఇండ్లు, ఫ్యాక్టరీల నుంచి వ్యర్థాలు వచ్చి చేరడంతో ఈ చెరువు కలుషితం అవుతోంది. చేపలు తగ్గిపోవడంతో వాటిని తిని బతికే పక్షులు ఇప్పుడు రావట్లేదు. అందుకని ఈ చెరువుని శుభ్రం చేసి, మళ్లీ వలస పక్షులకి కేరాఫ్గా మార్చే ప్రయత్నం చేస్తోంది గవర్నమెంట్.
