- ఢిల్లీలో కేంద్ర కమిటీ నియామకం
న్యూఢిల్లీ, వెలుగు: దేశవ్యాప్తంగా బంజారాల సమస్యల పరిష్కారం, అభ్యున్నతి కోసం ఏర్పడిన బంజార భారత్ పదాధికారుల కేంద్ర కమిటీకి అడ్వైజర్లుగా ఎంపీ బలరాం నాయక్, మాజీ ఎంపీ రవీంద్ర నాయక్ నియమితులయ్యారు. శనివారం ఢిల్లీలో జరిగిన సమావేశంలో దేశవ్యాప్తంగా అన్ని రాష్ట్రాల సభ్యులతో కలిపి కోర్ కమిటీ నియామకం జరిగింది.
కమిటీకి జాతీయ అధ్యక్షుడిగా పృథ్వీసింగ్ రాథోడ్, జాతీయ కోఆర్డినేటర్ గా రవి నాయక్, జాతీయ కన్వీనర్గా జేపీ పవార్, మహిళా కన్వీనర్గా నాగమణి నాయక్ నియమితులయ్యారు. వీరితోపాటు 21 మందిని జాతీయ కమిటీ సభ్యులుగా,16 మందిని ప్రత్యేక ఆహ్వానితులుగా నియమించారు.
ఐదుగురితో బంజార భారత్ విద్యార్థి విభాగాన్ని ఏర్పాటు చేశారు. జాతీయ కమిటీలో తెలంగాణకు చెందిన విశ్లావత్ జగన్ నాయక్, ఏపీకి చెందిన భీమా నాయక్ కు అవకాశం కల్పించారు. కాగా, వన్ నాట్– వన్ బంజారా నినాదంతో బంజారా భారత్ గత కొద్ది రోజులుగా ఢిల్లీలోని జంతర్ మంతర్, తెలంగాణ భవన్లో ఆందోళన చేపట్టింది. బంజారాలు అందరూ ఒకే గొడుగు కిందకు రావాలని నాయకులు పిలుపునిచ్చారు.
