కొత్త నెంబర్ నుంచి ఎవరు ఫోన్ చేసినా వాళ్ల పేరు కనిపిస్తుంది ట్రూ కాలర్లో. దాంతో ఎవరు ఫోన్ చేస్తున్నారనే విషయం తెలుస్తుంది. ముఖ్యంగా స్పామ్ కాల్స్ తలనొప్పి నుంచి బయటపడేందుకు ఈ ఫీచర్ బాగా పనికొస్తుంది. దాంతో స్పామ్ కాలింగ్ వార్నింగ్ యాప్స్లో పాపులర్ అయింది ట్రూ కాలర్. ఇప్పటివరకు కాల్ డిటెక్షన్ సర్వీస్ అందించిన ఈ యాప్ యూజర్ల సెక్యూరిటీ, కంఫర్ట్ కోసం మరిన్ని కొత్త ఫీచర్లతో రాబోతోంది. వాటిలో స్మార్ట్ ఎస్సెమ్మెస్, కాల్ రీజన్, స్మార్ట్ రిమైండర్స్ వంటివి ముఖ్యమైనవి.
కొన్నిసార్లు స్పామ్, ముఖ్యమైన మెసేజ్లను వేరు చేయడం కష్టం. దీనికోసమే ‘స్మార్ట్ ఎస్సెమ్మెస్’ ఫీచర్ తెస్తోంది ట్రూ కాలర్. ఈ ఫీచర్ ఎనేబుల్ చేసుకుంటే... ఆటోమెటిక్గా ప్రమోషనల్, స్పామ్, డెలివరీస్, పేమెంట్స్, ఇంపార్టెంట్... అనే కేటగిరీలుగా మెసేజ్లు విడిపోతాయి. దాంతో ముఖ్యమైన మెసేజ్లను గుర్తించడం చాలా ఈజీ. ఆన్లైన్ మోసాల బారిన పడకుండా జాగ్రత్తపడొచ్చు.
అర్జెంట్ మెసేజెస్
ఏదైనా చెప్పాలనుకున్న ప్రతిసారి ఫోన్ చేయాల్సిన అవసరం లేకుండా మెసేజ్ పంపుతాం. ట్రూ కాలర్ తెస్తోన్న ‘అర్జెంట్ మెసేజెస్’ ఫీచర్ కూడా అలాంటిదే. ఇందులో ఫ్లాష్ మెసేజ్లు యూజర్ల ఫోన్ స్క్రీన్ మీద పెద్ద అక్షరాల్లో పాప్ అప్ అవుతాయి. అవతలివాళ్లు మెసేజ్ చదివేవరకు అవి అలానే ఉంటాయి. ముఖ్యమైన విషయాలు పంపడానికి ఈ ఫీచర్ చాలా ఉపయోగపడుతుంది. అర్జెంట్ మెసేజ్లు అవతలివాళ్లకు నోటిఫికేషన్లుగా కనిపిస్తాయి.
చాట్ మెసేజ్లని ఎడిట్ చేయొచ్చు
ఆటోకరెక్ట్ ఆప్షన్ ఉండడం వల్ల మెసేజ్ టైప్ చేసేటప్పుడు కొన్నిసార్లు ఒక పదం బదులు మరొక పదం వస్తుంది. దాంతో అనుకున్న పదం కాకుండా వేరొక పదం వెళ్తుంది. దాంతో ఆ మెసేజ్ని డిలీట్ చేసి, మళ్లీ మెసేజ్ పంపాల్సి వస్తుంది. ఈ సమస్య రాకుండా యూజర్ల కోసం సెంట్ మెసేజ్లను ఎడిట్ చేసే ఫీచర్ తీసుకొస్తోంది ట్రూ కాలర్. దీంతో పంపిన మెసేజ్లను ఎప్పుడు కావాలంటే అప్పుడు ఎడిట్ చేయొచ్చు.
100 ఎంబీ ఫైల్స్ పంపొచ్చు
ట్రా కాలర్ ద్వారా కూడా ఇకమీదట ఫైల్స్ షేర్ చేయొచ్చు. అయితే పెద్ద సైజ్వి కాకుండా100 ఎంబీ సైజ్ ఉన్న ఫొటోలు, వీడియోలు, డాక్యుమెంట్స్ పంపొచ్చు.
పాస్వర్డ్ ప్రొటెక్ట్ మెసేజ్
మెసేజ్లకి పాస్కోడ్ లాక్ ఉంటే మరింత సెక్యూరిటీ. అందుకోసం యూజర్లు 4 అంకెల పిన్ సెట్ చేసుకోవాలి. దీంతోపాటు బయోమెట్రిక్ లాక్ కూడా ఇస్తోంది ట్రూ కాలర్.
కాల్ రీజన్
కొన్నిసార్లు ముఖ్యమైనవాళ్లకు అర్జెంట్గా ఫోన్ చేయాల్సి వస్తుంది. కానీ, సరిగ్గా అదే టైంలో అవతలివాళ్ల ఫోన్ బిజీ వస్తుంది. అలాంటప్పుడు ‘కాల్ రీజన్’ ఫీచర్ ఉంటే... ఏ విషయం గురించి ఫోన్ చేశారనేది అవతలివాళ్లకు మెసేజ్గా వెళ్తుంది.
స్పామ్ బ్లాకింగ్
రోబో కాల్స్, టెలిమార్కెటర్స్, స్కామ్స్, ఫ్రాడ్ కాల్స్ని ఆటోమెటిక్గా గుర్తించడమే కాకుండా వాటిని బ్లాక్ చేస్తుంది. బ్యాక్గ్రౌండ్లో పనిచేస్తూ తెలిసిన స్పామర్స్ నుంచి వచ్చే ఇన్కమింగ్ కాల్స్, ఎస్సెమ్మెస్లని పసిగడుతుంది.
స్మార్ట్ రిమైండ్స్
చాలా యూపిఐ పేమెంట్ యాప్స్లో స్మార్ట్ రిమైండ్స్ ఫీచర్ అందుబాటులో ఉంటుంది. ట్రూ కాలర్లో కూడా ఈ ఫీచర్ రానుంది. దీంతో కరెంట్ బిల్, పాలసీల వంటివి కట్టడానికి.. ఎన్ని రోజుల టైం ఉంది? మొబైల్ రీఛార్జ్ ముగిసే రోజుతో పాటు పెండింగ్ బిల్స్ అలర్ట్స్ వస్తాయి.
ట్విట్టర్ సర్కిల్ వస్తోంది
ట్విట్టర్ యూజర్లకు గుడ్న్యూస్. త్వరలోనే ‘ట్విట్టర్ సర్కిల్’ అనే ఫీచర్ రానుంది. ఇది ఇన్స్టాగ్రామ్లో ‘క్లోజ్ ఫ్రెండ్’ ఫీచర్ లాగ పనిచేస్తుంది. ఈ ఫీచర్ వస్తే... కొన్ని ట్వీట్స్ని కొందరితోనే షేర్ చేసుకోనే వీలుంటుంది. అదెలాగంటే.. క్లోజ్ ఫ్రెండ్స్ లిస్ట్ క్రియేట్ చేసుకోవచ్చు. ట్విట్టర్ సర్కిల్లో 150 మంది ఫ్రెండ్స్తో ట్వీట్స్ షేర్ చేసుకోవచ్చు. ఆ గ్రూప్లోని వాళ్లతో షేర్ చేసుకున్న ట్వీట్ కింద ఆకుపచ్చని గీత కనిపిస్తుంది. టెస్టింగ్ స్టేజ్లో ఉన్న ఈ ఫీచర్ని ఈ ఏడాది మే నెలలో కొంతమంది బీటా యూజర్లకు మాత్రమే అందుబాటులోకి తెచ్చింది. ఇప్పుడు ఈ ఫీచర్ అందరికీ అందుబాటులోకి రానుంది.
ట్వీట్స్ని ఎడిట్ చేయొచ్చు
కొన్ని ట్వీట్స్ వల్ల ట్రోలింగ్ బారినడపడతారు చాలామంది. అలాంటప్పుడు ‘ఎడిట్ ట్వీట్’ ఫీచర్ ఉంటే ఆ ట్వీట్ని సరిచేసుకునే ఛాన్స్ ఉంటుంది. యూజర్ల కంఫర్ట్ కోసం ‘ఎడిట్ ట్వీట్’ ఫీచర్ని టెస్ట్ చేస్తోంది ట్విట్టర్. ఈ ఫీచర్ వస్తే... ఇంతకుముందు పోస్ట్ చేసిన ట్వీట్లను కూడా ఎడిట్ చేయొచ్చు. అయితే ‘ట్విట్టర్ బ్లూ’ సబ్స్క్రిప్షన్ తీసుకున్నవాళ్లకే ఈ ఫీచర్ అందుబాటులోకి వస్తుంది. ట్వీట్ని ముఫ్పై నిమిషాల్లోపు ఎడిట్ చేయొచ్చు. చిన్న పొరపాటుని సరిచేయడానికి అంత టైం అక్కర్లేదు. కానీ, ఫలానా ట్వీట్ ఎందుకు చేయాల్సి వచ్చిందని వివరించడానికి లేదా ఆ ట్వీట్ని కొత్తగా రాయడానికి 30 నిమిషాల టైం చాలా ఉపయోగపడుతుంది.
