బీజింగ్: మూడో ఎయిర్క్రాఫ్ట్ క్యారియర్ను చైనా లాంచ్ చేసింది. అత్యాధునికమైన, పూర్తిగా స్వదేశీ పరిజ్ఞానంతో ఈ నౌకను రూపొందించింది. ఇండో -పసిఫిక్ రీజియన్లో నేవీ సామర్థ్యాన్ని పెంచుకోవడంలో భాగంగా బీజింగ్ ఈ ఎయిర్క్రాఫ్ట్ క్యారియర్ను అందుబాటులోకి తెచ్చింది. షాంఘై షిప్యార్డ్లో జరిగిన కార్యక్రమంలో ఫుజియాన్ ఎయిర్క్రాఫ్ట్ క్యారియర్ను అధికారులు లాంచ్ చేశారు. వాస్తవానికి పీపుల్స్ లిబరేషన్ ఆర్మీ నేవీ(పీఎల్ఏఎన్) 73వ వార్షికోత్సవంలో భాగంగా ఏప్రిల్ 23న దీనిని లాంచ్ చేయాలె. కానీ కరోనా కారణంగా షాంఘైలో లాక్డౌన్ విధించడంతో రెండు నెలల పాటు ఇది వాయిదా పడింది. దీనిని చైనా స్టేట్ షిప్ బిల్డింగ్ కార్పొరేషన్ లిమిడెట్ రూపొందించింది. ఇది 80 వేల టన్నుల బరువు ఉంటుంది. చైనా తూర్పు తీరంలోని ఫుజిన్ ప్రావిన్స్ పేరునే ఈ ఎయిర్క్రాఫ్ట్ క్యారియర్కు పెట్టారు. చైనా మొదటి ఎయిర్క్రాఫ్ట్ క్యారియర్ లియోనింగ్ను 2012లో అందుబాటులోకి తెచ్చింది. రెండో ఎయిర్ క్రాఫ్ట్ క్యారియర్ షాన్డాంగ్ను 2019లో లాంచ్ చేసింది. ఫుజిన్ మూడోది. వీటన్నింటిలోనూ అత్యాధునికమైనది. మొత్తంగా ఐదు ఎయిర్క్రాఫ్ట్ క్యారియర్లను సిద్ధం చేసుకోవాలని భావిస్తోంది. ఇందులో భాగంగా తదుపరి ఎయిర్క్రాఫ్ట్ క్యారియర్ను న్యూక్లియర్ సామర్థ్యంతో సిద్ధం చేసేందుకు సన్నాహాలు చేస్తోంది.
