మహబూబాబాద్/ జయశంకర్భూపాలపల్లి/ ములుగు/ కాశీబుగ్గ, వెలుగు: మున్సిపల్ ఎన్నికలు ప్రశాంతంగా నిర్వహించడానికి అన్ని పార్టీల నేతలు సహకరించాలని కలెక్టర్లు కోరారు. మంగళవారం మహబూబాబాద్, భూపాలపల్లి, ములుగు, వరంగల్కలెక్టరేట్లలో ఆయా జిల్లాల కలెక్టర్లు అద్వైత్ కుమార్ సింగ్, రాహుల్ శర్మ, దివాకర, సత్యశారద ఓటర్ జాబితాపై అన్ని రాజకీయ పార్టీల ప్రతినిధులతో సమావేశం నిర్వహించారు.
ఈ సందర్భంగా వారు మాట్లాడుతూ అర్హులైన ప్రతి ఒక్కరి పేరు జాబితాలో ఉండేలా, అనర్హులను జాబితాలో నుంచి తొలగించేలా నిర్మాణాత్మక సూచనలు ఇవ్వాలని కోరారు. అభ్యంతరాలు ఉంటే గడువులోగా సమర్పించాలని, ఫీల్డ్ స్థాయిలో విచారణ చేపట్టి చర్యలు తీసుకుంటామని తెలిపారు. కార్యక్రమాల్లో అడిషనల్ కలెక్టర్లు, వివిధ శాఖల అధికారులు, రాజకీయ నాయకులు తదితరులు పాల్గొన్నారు.
