తీర ప్రాంతాలు, కావేరి డెల్టాలో దంచికొట్టిన వానలు
స్తంభించిన సాధారణ జనజీవనం .. నేలకొరిగిన చెట్లు.. లక్ష ఎకరాల్లో పంట నష్టం
రంగంలోకి ఎన్డీఆర్ఎఫ్, ఎస్డీఆర్ఎఫ్ బృందాలు
చెన్నై: శ్రీలంకలో బీభత్సం సృష్టించిన ‘దిత్వా’ తుఫాను శనివారం తమిళనాడులోకి ప్రవేశించింది. తుఫాను ప్రభావంతో కోస్తా ప్రాంతాలు, కావేరి డెల్టాలో భారీ వర్షాలు కురిశాయి. డెల్టా జిల్లాలైన నాగపట్టణం, తిరువారూరు, తంజావూరు, మలియదుతిరాయ్, పుదుకోట్టి, కరైకాల్, కరూరు, పెరంబలూరు, అరియాలూరు, రామంతాపురం, తిరుచిరాపల్లిలో వానలు దంచికొట్టాయి. దీంతో ఆ జిల్లాల్లో జనజీవనం స్తంభించింది. వర్షాలకు తోడు భారీగా గాలులు వీస్తుండడంతో పలు జిల్లాల్లో చెట్లు నేలకూలాయి. 16 పశువులు చనిపోయాయి. వర్షాల వల్ల లక్ష ఎకరాల్లో పంటలు మునిగిపోయాయి. తుఫాను రాకతో స్టాలిన్ సర్కారు అప్రమత్తమైంది. ఇప్పటికే 16 ఎస్డీఆర్ఎఫ్, 12 ఎన్డీఆర్ఎఫ్ బృందాలను కోస్తా జిల్లాలకు తరలించారు. మరో 10 బృందాలను తరలించనున్నామని రాష్ట్ర విపత్తు నిర్వహణ శాఖ మంత్రి కేకేఎస్ఎస్ఆర్ రామచంద్రన్ తెలిపారు. ఎయిర్ ఫోర్స్, కోస్ట్ గార్డ్లను సైతం అప్రమత్తం చేశామని చెప్పారు. శనివారం చెన్నైలో మీడియాతో మంత్రి మాట్లాడారు. ఇప్పటివరకూ తుఫాను ప్రభావంతో కురిసిన వర్షాల వల్ల ఎలాంటి ప్రాణనష్టం జరగలేదని, 16 పశువులు మాత్రం చనిపోయాయని ఆయన వెల్లడించారు. ‘‘పరిస్థితిని ఎప్పటికప్పుడు సమీక్షిస్తున్నాం. ఎలాంటి పరిస్థితినైనా ఎదుర్కోవడానికి ప్రభుత్వం సిద్ధంగా ఉంది. పలు జిల్లాల్లో 6 వేల రిలీఫ్ క్యాంపులు ఏర్పాటు చేశాం. వేటకు వెళ్లవద్దని మత్స్యకారులను హెచ్చరించాం” అని మంత్రి పేర్కొన్నారు.
స్కూల్స్, కాలేజీలకు సెలవు.. ఫ్లైట్లు రద్దు
దిత్వా తుఫాను నేపథ్యంలో ముందుజాగ్రత్త చర్యగా స్కూళ్లు, కాలేజీలకు ప్రభుత్వం సెలవు ప్రకటించింది. సీఎం స్టాలిన్ శనివారం వీడియో కాన్ఫరెన్స్ లో అధికారులతో ఆయన సమావేశం నిర్వహించారు. ప్రజలు అప్రమత్తంగా ఉండాలని, అనవసరంగా బయటకు వెళ్లవద్దని సీఎం విజ్ఞప్తి చేశారు.
చెన్నై ఎయిర్ పోర్టు అధికారులు 54 విమాన సర్వీసులను రద్దు చేశారు. వచ్చే 3, 4 రోజుల్లో భారీ నుంచి అతిభారీ వానలు కురిసే అవకాశం ఉందని ఐఎండీ అధికారులు తెలిపారు. ఈ నేపథ్యంలో ఆరెంజ్ అలర్ట్ జారీ చేశారు.
శ్రీలంకకు భారత్ సాయం
కొలంబో: దిత్వా తుఫాన్తో అతలాకుతలమైన శ్రీలంకకు భారత ప్రభుత్వం సాయం ప్రకటించింది. మొత్తం 21 టన్నుల రిలీఫ్ మెటీరియల్తో పాటు 80 మంది ఎన్డీఆర్ఎఫ్ సిబ్బందిని పంపించింది. వరద బాధితులను ఆదుకోవడానికి 8 టన్నుల పరికరాలను కూడా పంపించినట్లు కేంద్ర ప్రభుత్వ వర్గాలు తెలిపాయి. కాగా, దిత్వా తుఫాను ధాటికి శ్రీలంకలో చాలా ప్రాంతాలు నామారూపాల్లేకుండా పోయాయి. ఇండ్లు, రోడ్లు, బ్రిడ్జిలు నేలమట్టమయ్యాయి. తుఫాన్ ప్రభావంతో లంకలో 123 మంది చనిపోగా.. వందల సంఖ్యలో జనం గల్లంతయ్యారు. దేశంలో ఎక్కడికక్కడ జనజీవనం స్తంభించిపోయింది. ఈ క్రమంలో దిత్వా తుఫాను కారణంగా తలెత్తిన పరిస్థితిని దృష్టిలో ఉంచుకుని శ్రీలంక అధ్యక్షుడు అనుర కుమార దిస్నాయకే దేశమంతటా అత్యవసర పరిస్థితిని ప్రకటించారు. ఈ మేరకు శనివారం గెజిట్ విడుదల చేశారు.
