హైదరాబాద్, వెలుగు: రాష్ట్రంలో డిగ్రీ కాలేజీల్లో ఈసారి రికార్డు స్థాయిలో అడ్మిషన్లు జరిగాయి. ఏకంగా రెండున్నర లక్షల మంది స్టూడెంట్లు వివిధ కోర్సుల్లో చేరారు. రాష్ట్ర ఏర్పాటు తర్వాత ఈ స్థాయిలో అడ్మిషన్లు నమోదు కావడం ఇదే తొలిసారి. రాష్ట్రంలో1,040 డిగ్రీ కాలేజీల్లో 4,24,703 సీట్లున్నాయి. వీటిలో ఈ అకడమిక్(2021–22) ఇయర్లో 2,49,899 అడ్మిషన్లు నిండాయి. ప్రస్తుతం ప్రైవేటు కాలేజీల్లో స్పాట్ అడ్మిషన్లు కొనసాగుతుండటంతో, మరో 5 వేల అడ్మిషన్లు పెరగొచ్చని అధికారులు చెప్తున్నారు. నిరుడు స్టేట్ వైడ్ గా 4,24,315 సీట్లుంటే, 2.25 లక్షల సీట్లు మాత్రమే భర్తీ అయ్యాయి. కరోనా వల్ల ఈ ఏడాది ఇంటర్మీడియట్లో ఫీజు కట్టిన స్టూడెంట్లందరినీ సర్కార్ పాస్ చేసింది. దీంతో ఇటు ఇంజినీరింగ్ తో పాటు డిగ్రీలోనూ భారీగా అడ్మిషన్లు పెరిగాయి. ఉమ్మడి జిల్లా కేంద్రాల్లోని సర్కారు డిగ్రీ కాలేజీల్లో దాదాపు అన్నీ సీట్లు భర్తీ అయ్యాయి. హైదరాబాద్లోని సర్కారు అటానమస్ కాలేజీల్లోనూ ఇదే పరిస్థితి. ఈసారి 4 కాలేజీల్లో కొత్తగా ప్రారంభించిన బీఏ ఆనర్స్ కోర్సుకు అంతగా ఆదరణ రాలేదు. చివరి విడత కౌన్సెలింగ్లో ఈ కోర్సును ప్రకటించడంతో చాలామంది ఈ కోర్సును ఎంచుకునే చాన్స్ లేకుండా పోయింది. డిగ్రీలో కొత్త కోర్సుల పెంపుతో అడ్మిషన్లు పెరిగాయని ఉన్నత విద్యామండలి చైర్మన్ లింబాద్రి తెలిపారు. బీఏ ఆనర్స్కోర్సులకు వచ్చే ఏడాది నుంచి మంచి డిమాండ్ ఉంటుందని ఆయన పేర్కొన్నారు.
