- తామే దాడి చేశామన్న ఉక్రెయిన్
ఇస్తాంబుల్/కీవ్: నల్ల సముద్రం గుండా వెళ్తున్న రెండు రష్యన్ ఆయిల్ ట్యాంకర్లపై డ్రోన్ దాడులు జరిగాయి. తుర్కియే తీరానికి సమీపంలో శుక్రవారం మధ్యాహ్నం జరిగిన ఈ దాడుల్లో రష్యాకు చెందిన ‘కైరోస్’, ‘విరాట్’ ఆయిల్ ట్యాంకర్లలో పెద్ద ఎత్తున పేలుడు జరిగి, మంటలు, పొగలు ఎగిసిపడ్డాయి.
వెంటనే ఆ నౌకల్లోని సిబ్బంది ‘మేడే కాల్’ ద్వారా ఎమర్జెన్సీ సంకేతాలు పంపారని.. తమ సిబ్బంది వెళ్లి సహాయక చర్యలు చేపట్టారని ఈ మేరకు తుర్కియే రవాణా శాఖ మంత్రి అబ్దుల్ కాదిర్ ఉరలోగ్లూ శనివారం మీడియాకు వెల్లడించారు. ఆ రెండు నౌకల్లో మంటలను తమ సిబ్బంది ఆర్పివేశారని, సిబ్బంది అంతా క్షేమంగా ఉన్నారని తెలిపారు.
అయితే, విరాట్ ఆయిల్ ట్యాంకర్పై శనివారం మరోసారి డ్రోన్ అటాక్ జరిగి పెద్ద ఎత్తున పేలుడు సంభవించిందని, ఆ నౌక తీవ్రంగా ధ్వంసమైందన్నారు. అయినప్పటికీ నౌకలోని సిబ్బంది అంతా క్షేమంగానే ఉన్నారని పేర్కొన్నారు. ఆ రెండు ట్యాంకర్లపై బయటి నుంచి మెరైన్ డ్రోన్ లేదా మైన్ లేదా రాకెట్ దాడి జరిగి ఉండొచ్చని భావిస్తున్నట్టు వివరించారు.
కాగా, అమెరికా, ఇతర దేశాల ఆంక్షల నేపథ్యంలో వేరే దేశాల జెండాలతో వివిధ దేశాలకు ఆయిల్ ను సరఫరా చేసేందుకు రష్యా వందలాది నౌకలతో ‘షాడో ఫ్లీట్’ను నడుపుతోంది. ఈ రెండు ట్యాంకర్లు కూడా ఆ ఫ్లీట్లో భాగంగా ఉన్నాయని అంతర్జాతీయ మీడియా సంస్థలు తెలిపాయి.
