తప్పులు ఎవరైనా చేస్తారు. కానీ.. చేసిన తప్పును సరిదిద్దుకున్న వాళ్లే చరిత్రలో మిగిలిపోతారు. పదిమందికి గుర్తుండిపోతారు. ప్లాస్టిక్ విషయంలో ఇప్పటికే పర్యావరణం చాలా పాడైపోయింది. అందులో ఎలక్ట్రానిక్ వేస్ట్ వల్ల ప్రకృతికి వాటిల్లే ముప్పు అంతా ఇంతా కాదు. అందుకే.. ఎలక్ట్రానిక్ వేస్ట్తో ఓ సంచలనాత్మక ఆవిష్కరణకు తెర తీశారు. టోక్యోలో జరగనున్న ఒలింపిక్ విజేతలకు ఈ– వేస్ట్తో తయారు చేసిన పతకాలు ఇస్తారట.
భూమి, నీళ్లు, గాలిని కలుషితం చేసి.. మనం బతకడానికి కాసింత జాగానిచ్చిన ప్రకృతికి చాలా ద్రోహం చేశాం. ఇకనైనా తప్పు సరిదిద్దుకోకపోతే.. భవిష్యత్ కష్టమే. అందుకే.. ఇప్పుడిప్పుడే ప్రపంచ దేశాలన్నీ ప్లాస్టిక్ పని పట్టడానికి పూనుకున్నాయి. ఒక్కో దేశం ఒక్కో మార్గంలో ప్లాస్టిక్ వేస్టును తగ్గించేందుకు, తిరిగి వాడేందుకు, నాశనం చేసేందుకు ప్రణాళికలు వేస్తూ అమలు చేస్తున్నాయి. అందులో భాగంగానే ఈ సారి ఒలింపిక్స్లో ఈ– వేస్ట్తో పతకాలు తయారు చేస్తున్నారు.
టోక్యోలో 2020లో జరిగే ఒలింపిక్స్లో విజేతలకు ఇచ్చే పతకాల విషయంలో నిర్వాహకులు చక్కటి నిర్ణయం తీసుకున్నారు. ‘బి బెటర్ టుగెదర్ ఫర్ ప్లానెట్ అండ్ పీపుల్’ అనే కాన్సెప్ట్తో ఎకో ఫ్రెండ్లీ ఒలింపిక్స్ నిర్వహించాలని నిర్ణయం తీసుకున్నారు. 2020 ఒలింపిక్స్, పారా ఒలింపిక్స్లో విజేతలకు ఎలక్ట్రానిక్ వ్యర్థాలను రీసైకిల్ చేసిన పతకాలను అందిస్తారు. దీని కోసం.. జపాన్ ప్రజల నుంచి ఈ– వేస్ట్ని సేకరించారు. కొంతమంది ఈ ప్రాజెక్ట్ కోసం తమ కొత్త ఎలక్ట్రానిక్ వస్తువులను కూడా డొనేట్ చేశారు. మూడేళ్ల క్రితమే ఈ నిర్ణయం తీసుకున్న జపాన్ ప్రభుత్వం 2017 ఏప్రిల్ నెల నుంచి ఈ ఏడాది మార్చి నెల వరకు ఈ వేస్ట్ని సేకరించింది. టోక్యో ఒలింపిక్స్, పారా ఒలింపిక్స్ రెండింటిలో విజేతలకు ఇవ్వాల్సిన పతకాలు బంగారు, వెండి, కాంస్య పతకాలు కలిపి ఐదువేల పతకాలు అవసరం. వాటన్నింటినీ ఈ– వేస్ట్తోనే తయారుచేస్తున్నారు.
ఈ ప్రాజెక్ట్కు ‘టోక్యో మెడల్ ప్రాజెక్ట్’ అని పేరు పెట్టారు. ఇందులో 1741 పట్టణాలు పాల్గొన్నాయి. అంటే.. జపాన్లోని 90 శాతం పట్టణాలు ఈ ప్రాజెక్ట్లో పాలు పంచుకున్నాయి. ఆయా పట్టణాల మున్సిపాలిటీలు దాదాపు 78 వేల 985 టన్నుల ఈ – వేస్ట్ని పోగు చేశాయి. ఇందులో 6.21 మిలియన్ల వేస్టేజ్ కేవలం మొబైల్ ఫోన్లదే. ఫోన్ల తయారీకి కేంద్రమైన జపాన్ దేశంలోనే ఇంతలా మొబైల్ ఈ– వేస్టేజ్ బయటపడితే.. ఇక ప్రపంచ దేశాలన్నింటిలో ఎంత వేస్టేజ్ బయట పడుతుందో! ఇలా ఈ వేస్టుతో పతకాలు చేయడం ఇది తొలిసారేం కాదు. 2016 రియో ఒలింపిక్స్ అప్పుడు కూడా రీసైకిల్డ్ మెటల్స్తో పతకాలు రూపొందించి విజేతలకు అందించారు.
ప్రతిష్టాత్మకంగా భావిస్తున్న ఈ మెడల్స్ అన్నింటినీ ‘జునిచి కావానిషి’ అనే డిజైనర్ రూపొందించారు. టోక్యో ఈ– వేస్ట్ మెడల్ డిజైన్ కోసం నిర్వహించిన పోటీల్లో 400 మందిలో జునిచి కావానిష్ మొదటి స్థానంలో నిలిచాడు. వచ్చే ఏడాది జులై 24న ప్రారంభం కానున్న టోక్యో ఒలింపిక్స్ ప్రపంచ దేశాలకు కొత్తదనం చూపించబోతున్నాయి.
