- అర్ధరాత్రి వరకు కొనసాగిన ప్రక్రియ
- నేటి నుంచి రెండో విడత షురూ..
సిద్దిపేట, మెదక్, సంగారెడ్డి, వెలుగు: ఉమ్మడి మెదక్జిల్లాలో మొదటి దశ ఎన్నికలు జరగనున్న పంచాయతీల్లో చివరిరోజు పెద్దసంఖ్యలో నామినేషన్లు దాఖలయ్యాయి. ఉదయం నుంచే క్లస్టర్సెంటర్ల వద్ద బారులు దీరిన అభ్యర్థులు సర్పంచ్, వార్డు మెంబర్ స్థానాలకు పోటాపోటీగా నామినేషన్లు దాఖలు చేశారు. సాయంత్రం 5 గంటల వరకు వచ్చిన అభ్యర్థులను అనుమతించిన ఆఫీసర్లు వారి నుంచి అర్ధరాత్రి దాకా నామినేషన్లు తీసుకున్నారు.
సిద్దిపేట జిల్లాలో శనివారం రాత్రి పది గంటల వరకు అధికారులిచ్చిన ప్రాథమిక సమాచారం ప్రకారం.. మర్కుక్ మండలంలో సర్పంచ్ స్థానాలకు 86 మంది, వార్డులకు 334, ములుగు మండలంలో సర్పంచ్ స్థానాలకు 115 మంది, వార్డు లకు 420, జగదేవ్ పూర్ మండలంలో సర్పంచ్ స్థానాలకు 110, వార్డులకు 370, గజ్వేల్ మండలంలో సర్పంచ్ స్థానాలకు 167, వార్డులకు 549 నామినేషన్లు దాఖలయ్యాయి. జగదేవ్ పూర్ మండలంలోని కొండాపూర్, అనంతసాగర్, పలుగు గడ్డ, వర్గల్ మండలంలో గుంటిపల్లి, చాంద్ ఖాన్ మక్త గ్రామాల్లో ఒక్కో నామినేషన్ దాఖలు కాగా తునికి మక్త గ్రామంలో మాత్రం భార్యాభర్తలిద్దరూ నామినేషన్ వేశారు.
రాయపోల్ మండలం పెద్ద ఆరేపల్లి గ్రామపంచాయతీలో సర్పంచ్ పదవితో పాటు 8 వార్డులకు ఒక్కో నామినేషన్ మాత్రమే దాఖలయ్యాయి. పెద్దారపల్లి గ్రామానికి సర్పంచ్ గా కర్రోళ్ల దివ్య, కొత్తపల్లిలో పదవికి శ్యామల ఒక్కరే నామినేషన్ దాఖలు చేశారు. ఈ పంచాయతీలు ఏకగ్రీవం అయినప్పటికీ అధికారికంగా ప్రకటించాల్సి ఉంది. జిల్లా గ్రామపంచాయతీ ఎన్నికల సాధారణ పరిశీలకులు హరిత క్షేత్రస్థాయిలో పర్యటించి నామినేషన్ల ప్రక్రియను పరిశీలించారు.
మెదక్ జిల్లాలో.సర్పంచ్ స్థానాలకు 733 నామినేషన్లు
మెదక్ జిల్లాలో సర్పంచ్, వార్డ్ మెంబర్ స్థానాలకు పెద్ద సంఖ్యలో నామినేషన్లు దాఖలయ్యాయి. మొదటి విడతలో ఆరు మండలాల్లోని 160 సర్పంచ్ స్థానాలకు, 1,402 వార్డు మెంబర్ స్థానాలకు ఎన్నికలు జరుగుతున్నాయి. ఈ మేరకు మూడు రోజుల్లో కలిపి శనివారం రాత్రి 11 గంటల వరకు అందిన సమాచారం ప్రకారం సర్పంచ్ స్థానాలకు 733 నామినేషన్లు, వార్డు మెంబర్ స్థానాలకు 2,125 నామినేషన్లు దాఖలయ్యాయి. రాత్రి 11 గంటల తర్వాత ఇంకా నామినేషన్ల ప్రక్రియ కొనసాగుతోంది. దీంతో సంఖ్య మరింత పెరిగే అవకాశం ఉంది. రెండో విడత ఎన్నికలకు ఆదివారం నుంచి నామినేషన్ల స్వీకరణకు అధికారులు ఏర్పాట్లు చేశారు. డిసెంబరు 2వ వరకు కొనసాగనుంది.
సంగారెడ్డి జిల్లాలో 1,855 నామినేషన్లు
సంగారెడ్డి జిల్లాలో మొదటి విడత ఎన్నికల నేపథ్యంలో శనివారం సర్పంచ్ స్థానాలకు 1,855 నామినేషన్లు దాఖలయ్యాయి. వార్డు స్థానాలకు 3,215 నామినేషన్లు అందాయి. రాత్రి 11 గంటల వరకు ప్రాథమికంగా అందిన సమాచారం మేరకు ఆయా నామినేషన్లు దాఖలయ్యాయి. జిల్లా వ్యాప్తంగా మొత్తం 613 గ్రామ పంచాయతీలు, 5,370 వార్డు స్థానాలు ఉండగా మొదటి విడతలో సంగారెడ్డి డివిజన్ లోని 7 మండలాల పరిధిలో 136 పంచాయతీలు, 1,246 వార్డు స్థానాలకు ఎన్నికలు జరగనున్నాయి.
