డెహ్రాడూన్: భారతదేశం 2047 నాటికి సూపర్పవర్‌‌‌‌‌‌‌‌‌‌‌‌‌‌‌‌గా ఎదుగుతుందని ఇస్రో మాజీ చైర్మన్ సోమనాథ్ పేర్కొన్నారు. స్పేస్‌ టెక్నాలజీ, మాన్యుఫాక్చరింగ్‌ రంగంలో ప్రపంచానికే సరఫరాదారుగా మారుతుందని చెప్పారు. భారత శాస్త్రవేత్తలు, యువత ఈ లక్ష్య సాధనలో కీలక పాత్ర పోషిస్తారని తెలిపారు.
ఉత్తరాఖండ్‌‌‌‌‌‌‌‌లోని డెహ్రాడూన్‌‌‌‌‌‌‌‌లో నిర్వహించిన అఖిల భారతీయ విద్యార్థి పరిషత్‌ (ఏబీవీపీ) 71 వ సదస్సు ప్రారంభోత్సవం సందర్భంగా సోమనాథ్ మాట్లాడారు. సైన్స్, ఆధ్యాత్మికత ఒకదానికొకటి విరుద్ధం కాదని.. రెండూ కలిసి మానవాళికి దిశానిర్దేశం చేస్తాయని చెప్పారు. నమ్మకం, వాస్తవికత రెండూ ఒకదానితో ఒకటి ముడిపడి ఉంటాయని, అవి కలిస్తేనే గొప్ప ఫలితాలు సాధ్యమని వివరించారు.
మన రుషులు, సాధువులు కేవలం ధ్యానం చేస్తూ కూర్చోలేదని, గణితం, ఖగోళశాస్త్రం, లోహశాస్త్రం, వాస్తుశిల్పం, వైద్యశాస్త్రాన్ని అన్వేషించారని, ఆధునిక విజ్ఞానశాస్త్రానికి కూడా ఆశ్చర్యం కలిగించే పరిశోధనలు చేశారని చెప్పారు. ఆధ్యాత్మికత అంటే శాస్త్రాన్ని వ్యతిరేకించడం కాదని, శాస్త్రానికి దిశను, లక్ష్యాన్ని, నీతిని ఇచ్చే శక్తి అని అన్నారు. ఆ రెండూ కలిసినప్పుడే భారత్ మళ్లీ విశ్వగురువు అవుతుందని అన్నారు.
చంద్రయాన్-3 ద్వారా చంద్రుని దక్షిణ ధృవాన్ని చేరుకున్న ప్రపంచంలోనే మొట్టమొదటి దేశంగా భారత్ నిలిచిందని గుర్తుచేశారు. అలాగే, ఆదిత్య ఎల్1 ద్వారా సూర్యుడి వైపు కూడా మనం అడుగులు వేశామని తెలిపారు. మన దేశాన్ని ప్రపంచం భిన్నంగా చూడటం ఇదే మొదటిసారి అని, మనం ప్రజాస్వామ్య స్థిరత్వానికి మూలస్తంభాలుగా ఉండటం వల్లే ఇది సాధ్యమైందని తెలిపారు.
కేంద్ర ప్రభుత్వం ఇప్పుడు అణు రంగంలోకి ప్రైవేట్ సంస్థలను అనుమతించబోతున్నదని, ఇది యువతకు కొత్త అవకాశాలను సృష్టిస్తుందని చెప్పారు.
