నాగర్ కర్నూల్ టౌన్, వెలుగు: నాగర్ కర్నూల్ మెడికల్ కాలేజీలో జూనియర్లను నలుగురు సీనియర్లు ర్యాగింగ్ చేసిన ఘటన ఆలస్యంగా వెలుగులోకి వచ్చింది. ర్యాగింగ్కు పాల్పడిన నలుగురు మెడికోలను హాస్టల్ నుంచి ఏడాది, కాలేజీ నుంచి రెండు నెలల పాటు సస్పెండ్ చేసినట్లు మెడికల్ కాలేజీ ప్రిన్సిపాల్ రమాదేవి తెలిపారు. ఈ నెల 4న నలుగురు సీనియర్లు కలిసి జూనియర్లను ర్యాగింగ్ చేశారు. ఈ నెల 7న జూనియర్ విద్యార్థి యాంటీ ర్యాగింగ్ కమిటీకి ఈ వ్యవహారంపై ఫిర్యాదు చేశారు.
ఈ నెల 10న విచారణ అనంతరం ర్యాగింగ్కు పాల్పడిన నలుగురు సీనియర్ మెడికోలను కాలేజీ నుంచి 2 నెలలు, హాస్టల్ నుంచి ఏడాది పాటు సస్పెండ్ చేశారు. ఇదిలాఉంటే జూనియర్లపై ర్యాగింగ్కు పాల్పడిన ఓ స్టూడెంట్ గత ఏడాది ర్యాగింగ్ కు గురైనబాధితుడు కావడం గమనార్హం. సీనియర్లు తనను ర్యాగింగ్ చేశారని గతంలో అతడు పోలీస్స్టేషన్లో ఫిర్యాదు కూడా చేశాడు. గత ఏడాది ఇలాగే ఆరుగురు సీనియర్లు ర్యాంగింగ్కు పాల్పడ్డారు. ర్యాగింగ్కు పాల్పడే వారి పట్ల కఠినంగా వ్యవహరించాలని పేరెంట్స్ కోరుతున్నారు.
