- పెండింగ్ వేతనాలు, బెనిఫిట్స్ కోసం 14 నెలలుగా పోరాటం
- మొండిగా వ్యవహరిస్తున్న శాలివాహన ప్లాంట్ మేనేజ్మెంట్
- భూముల ధరలు పెరగడంతో రియల్ ఎస్టేట్ వెంచర్పై దృష్టి
- న్యాయం చేయాలని వేడుకుంటున్న కార్మికులు
మంచిర్యాల, వెలుగు: మంచిర్యాలలోని శాలివాహన గ్రీన్ ఎనర్జీ, బయోమాస్ పవర్ ప్లాంట్ను మూసివేయడంతో అందులో పనిచేస్తున్న కార్మికులు రోడ్డున పడ్డారు. వారికి రావాల్సిన పెండింగ్ వేతనాలు, బెనిఫిట్స్కోసం 14 నెలలుగా పోరాడుతున్నా మేనేజ్మెంట్మొండిగా వ్యవహరిస్తోంది. నాడు వేలల్లో ఉన్న భూముల ధరలు నేడు కోట్లకు పెరగడంతో ప్లాంట్ను తొలగించి రియల్ఎస్టేట్వెంచర్ చేసేందుకు సిద్ధమైనట్టు ఆరోపిస్తున్నారు.
ప్లాంట్యజమాని మల్క కొమురయ్య ఓవైపు తమకు అన్యాయం చేస్తూ మరోవైపు ఓ జాతీయ పార్టీ నుంచి ఎంపీగా పోటీ చేసేందుకు ప్రయత్నిస్తున్నారని, సొంత సంస్థలో పనిచేస్తున్న వారినే పట్టించుకోని ఆయనను ఎంపీగా గెలిపిస్తే ప్రజలకు ఏం సేవలు చేస్తాడని కార్మికులు ప్రశ్నిస్తున్నారు. వెంటనే తమకు రావాల్సిన వేతనాలను చెల్లించడంతో పాటు బెనిఫిట్స్ను అందించాలని డిమాండ్ చేస్తున్నారు.
పీపీఏ ముసిగిందనే సాకుతో మూసివేత..
మంచిర్యాలలోని రంగంపేటలో 6 మెగావాట్ల సామర్థ్యంతో 2002లో శాలివాహన గ్రీన్ ఎనర్జీ, బయోమాస్పవర్ప్లాంట్ను ప్రారంభించారు. ఒక మెగావాట్కు రూ.4 కోట్ల చొప్పున మొత్తం రూ.24 కోట్ల పెట్టుబడితో ప్లాంట్ను ఏర్పాటు చేశారు. రైస్మిల్లుల నుంచి వెలువడే ఊక, సింగరేణి బొగ్గు, కర్రపొట్టు, ఆయిల్పామ్పొట్టుతో కరెంట్ఉత్పత్తి చేసి ప్రభుత్వానికి సప్లై చేశారు.
ముడి ఇంధనాల రేట్లు పెరగడంతో పాటు కొరత ఏర్పడడం, ప్రభుత్వం నుంచి సకాలంలో బిల్లులు రాకపోవడం, 2022 డిసెంబర్6తో పవర్ పర్చేజ్ అగ్రిమెంట్(పీపీఏ) ముగిసిందనే సాకుతో మేనేజ్మెంట్పవర్ ప్లాంట్ను శాశ్వతంగా మూసేసింది. అయితే, పీపీఏ పొడిగించుకుంటే మరో పదేండ్ల పాటు ప్లాంట్నడపడానికి ఎలాంటి ఇబ్బందులూ లేవని కార్మికులు పేర్కొంటున్నారు. అయినప్పటికీ యాజమాన్యం ఉద్దేశపూర్వకంగానే ప్లాంట్ను మూసేసి తమను రోడ్డుపాలు చేసిందని ఆవేదన వ్యక్తం చేస్తున్నారు.
రియల్ ఎస్టేట్ వెంచర్పై దృష్టి
పవర్ ప్లాంట్కు దాదాపు 40 ఎకరాల భూములు ఉండగా, యాజమాన్యం ఇప్పటికే 10 ఎకరాలను అమ్ముకున్నట్టు సమాచారం. మిగిలిన 30 ఎకరాల్లో 11 ఎకరాల విస్తీర్ణంలో ప్లాంట్ఉంది. ఈ భూములు మంచిర్యాల జిల్లా కేంద్రాన్ని ఆనుకుని ఉండడంతో మంచి డిమాండ్ఏర్పడింది. ఆ చుట్టుపక్కల ప్రాంతాల్లోని రియల్ ఎస్టేట్ వెంచర్లలో ప్లాట్లు హాట్ కేకుల్లా అమ్ముడుపోతున్నాయి.
Also Read: కేసీఆర్..! నల్గొండకు వచ్చే ముందు .. ముక్కు నేలకు రాసి రా : కోమటిరెడ్డి వెంకట్రెడ్డి
రోజురోజుకు కొత్త కాలనీలు విస్తరిస్తున్నాయి. దీంతో ఇక్కడ ఎకరం రూ.5 కోట్లకుపైగా పలుకుతోంది. ఒడిదుడుకుల మధ్య ప్లాంట్ను నడపడం కంటే భూముల అమ్మకం ద్వారా ఏకకాలంలో భారీగా లబ్ధిపొందవచ్చనే ఆలోచనలో మేనేజ్మెంట్ ఉన్నట్టు కార్మికులు ఆరోపిస్తున్నారు. కాగా, గతంలో ప్లాంట్ కోసం ఎకరం భూమిని రూ.30 వేల నుంచి రూ.40 వేలకే ఇచ్చిన రైతులు.. ఈ పరిస్థితుల నేపథ్యంలో తమ భూములను తిరిగి ఇవ్వాలని డిమాండ్ చేస్తున్నారు.
ఆందోళన ఉధృతం చేస్తాం
శాలివాహన పవర్ ప్లాంట్ను మూసేసి 14 నెలలు కావస్తోంది. కార్మిక చట్టాల ప్రకారం చెల్లించాల్సిన క్లోజింగ్ బెనిఫిట్స్, పెండింగ్ వేతనాలు చెల్లించడం లేదు. అసిస్టెంట్ లేబర్ కమిషనర్ ఏర్పాటు చేసిన జాయింట్ మీటింగ్లో బెనిఫిట్స్ చెల్లించాలని ఆదేశించినా పట్టించుకోవడం లేదు. ప్లాంట్ నిర్మాణం కోసం ఆనాడు రైతుల దగ్గర రూ.30 నుంచి రూ.40 వేలకు ఎకరం చొప్పున తీసుకున్నరు.
ఇప్పుడు ఎకరానికి రూ.5 కోట్ల దాకా పలుకుతోంది కాబట్టి ప్లాంట్ను మూసేసి రియల్ఎస్టేట్ వెంచర్ చేయాలనుకుంటున్నరు. కార్మికులకు నష్టం చేస్తున్న మల్క కొమురయ్య ఓ జాతీయ పార్టీ నుంచి ఎంపీగా పోటీ చేసి ప్రజలను ఏం ఉద్దరిస్తారో చెప్పాలె. ఇప్పటికైనా స్పందించకుంటే ఆందోళన ఉధృతం చేస్తాం.
- కుంటాల శంకర్, పవర్ప్లాంట్కార్మిక సంఘం అధ్యక్షుడు
కార్మికుల బతుకులు ఆగం
శాలివాహన గ్రీన్ ఎనర్జీ, బయోమాస్ప్లాంట్పై ప్రత్యక్షంగా, పరోక్షంగా సుమారు 300 కుటుంబాలు ఆధారపడి జీవిస్తున్నాయి. రెగ్యులర్ ఉద్యోగులు, వర్కర్లు సుమారు 100 మంది ఉండగా, వీరికి రూ.20 వేల నుంచి రూ.30 వేల జీతాలు చెల్లించారు. ట్రాక్టర్లు, లారీలు, ఇతర పనుల్లో మరో 200 మంది వర్కర్లు పని చేసేవారు. వీరంతా 20 ఏండ్లుగా చాలీచాలని జీతాలతో నెట్టుకొస్తున్నారు.
రెగ్యులర్గా శాలరీస్ ఇవ్వకున్నా ప్లాంట్నే నమ్ముకుని జీవిస్తున్నారు. 2022 డిసెంబర్ నుంచి పవర్ ప్లాంట్ను క్లోజ్చేయడంతో వారంతా రోడ్డున పడ్డారు. చాలా మంది రిటైర్మెంట్కు దగ్గర్లో ఉండడంతో ఈ వయసులో ఎట్ల బతకాలని వాపోతున్నారు. ప్లాంట్క్లోజింగ్ తోపాటు ఉద్యోగులు, వర్కర్లకు లేబర్యాక్టుల ప్రకారం సెటిల్మెంట్ జరగాల్సిఉన్నప్పటికీ యాజమాన్యం ఇవేమీ పట్టించుకోవడం లేదని మండిపడుతున్నారు.
