- చేనేత ఐక్య వేదిక రాష్ట్ర అధ్యక్షుడు రాపోలు వీర మోహన్
సిద్దిపేట, వెలుగు: చేనేత సంఘాలకు వెంటనే ఎన్నికలు నిర్వహించి వృత్తిపై ఆధార పడ్డ కార్మికులను ప్రభుత్వం ఆదుకోవాలని చేనేత ఐక్య వేదిక రాష్ట్ర అధ్యక్షుడు రాపోలు వీర మోహన్ డిమాండ్ చేశారు. శనివారం సిద్దిపేటలోని మార్కండేయ దేవాలయంలో జరిగిన జిల్లా సమావేశానికి ముఖ్య అతిథిగా హాజరయ్యారు. అనంతరం మాట్లాడుతూ దేశంలో ఏ రాష్ట్రంలో లేని విధంగా చేనేత కార్మికులకు జియో టాగ్ వర్తింపజేయడం తగదని వెంటనే జియో టాగ్స్ రద్దు చేయాలని కోరారు. చేనేత కార్మికులకు ప్రభుత్వం నుంచి వచ్చే అన్ని పథకాలు వర్తింపజేయాలని విజ్ఞప్తి చేశారు.
నేత వృత్తితో సంబంధం లేకుండా ప్రతి పద్మశాలికి 50 ఏళ్లకే ఆసరా పెన్షన్ ఇవ్వాలని కోరారు. చేనేత సంఘాలకు క్యాష్ క్రెడిట్ అందించి నేత కార్మికులు తయారు చేసిన వస్త్రాలను టెస్కో ద్వారా కొనుగోలు చేసి రాష్ట్రమంతా టెస్కో షోరూములు విస్తరింప చేయాలన్నారు. ప్రతి నేత కార్మికుడికి లక్ష రూపాయల బ్యాంకు లోను మంజూరు చేసి జాకార్డ్ మగ్గాలకు సబ్సిడీలు అందించాలని కోరారు. సమావేశంలో సిద్దిపేట జిల్లా అధ్యక్షుడు శ్రీనివాస్, పట్టణ పద్మశాలి సంఘం అధ్యక్షుడు రాజేశం, సిరిగది బాలరాజ్ పాల్గొన్నారు.
