సిద్దిపేట, వెలుగు: గ్లోబల్ సమ్మిట్ పేరిట సీఎం రేవంత్ రెడ్డి భూములు అమ్ముకునేందుకు ప్రయత్నిస్తున్నాడని మాజీ మంత్రి హరీశ్రావు ఆరోపించారు. దీక్షా దివస్ సందర్భంగా శనివారం సిద్దిపేట పట్టణంలో భారీ బైక్ ర్యాలీ నిర్వహించిన అనంతరం పార్టీ ఆఫీస్ లో జరిగిన మీటింగ్లో మాట్లాడారు. ఏపీ రాష్ట్రం కృష్ణానది నీళ్ల పంపకంపై తెలంగాణ ఉద్యమాన్ని కించపరిచేలా ట్రిబ్యునల్ ముందు మూడు రోజులుగా వాదిస్తున్నా మంత్రి ఉత్తమ్ కుమార్ రెడ్డి, సీఎం రేవంత్ రెడ్డి నోరు మెదపకపోవడం ఏమిటని ప్రశ్నించారు.
తెలంగాణ ఉద్యమం రాజకీయ ప్రేరేపితమని ఏపీ అధికారులు కృష్ణ ట్రిబ్యునల్ ముందు వాదిస్తున్నారన్నారు. మూడు కోట్ల ప్రజల ఆత్మగౌరవాన్ని కించపరిచేలా వ్యవహరిస్తున్నారని విమర్శించారు. పీసీసీ చీఫ్ మహేశ్ కుమార్ గౌడ్ మూర్ఖంగా మాట్లాడుతున్నాడని, ఆయన చిల్లర మాటలు మానుకుంటే మంచిదని హితవు పలికారు. కేసీఆర్ తెలంగాణ సాధించకుంటే ఆయన టీపీసీసీ అధ్యక్షుడయ్యేవాడా? అని ప్రశ్నించారు. కేసీఆర్ దీక్ష ఫలితంగానే డిసెంబర్ 9న ప్రకటన వెలువడిందని గుర్తు చేశారు.
జీవిత కాలంలోనే లక్ష్యాన్ని సాధించిన ఘనత కేసీఆర్ కే దక్కిందని ప్రణబ్ ముఖర్జీ తన ఆత్మకథలో రాసిన విషయాన్ని ప్రస్తావించారు. అంతకుముందు ప్రజా గాయకుడు అందెశ్రీ మృతికి రెండు నిమిషాలు మౌనం పాటించి నివాళులు అర్పించారు. అమరుల ఫ్యామిలీలను సన్మానించి ఎమ్మెల్యే క్యాంప్ ఆఫీస్ వద్ద పైలాన్ ను ఆవిష్కరించారు. పార్టీ జిల్లా అధ్యక్షుడు, దుబ్బాక ఎమ్మెల్యే కొత్త ప్రభాకర రెడ్డి, ఎమ్మెల్సీలు దేశపతి శ్రీనివాస్, యాదవరెడ్డి పాల్గొన్నారు.
