పొలిటికల్ లీడర్షిప్ అనేది ప్రజల నుంచి నేరుగా అధికారంలోకి వస్తుంది కాబట్టి, తమ పార్టీ ఐడియాలజీకి అనుగుణమైన నిర్ణయాలు తీసుకుంటుంది. వాటిని అమలు చేయడం, జనాలకు చేరవేయడం వంటివి ప్రభుత్వాధికారుల ప్రధాన బాధ్యత. ఈ టీమ్ని నడిపించే బాధ్యత యూనియన్ పబ్లిక్ సర్వీస్ కమిషన్ (యూపీఎస్సీ) ద్వారా ఎంపికయ్యే సివిల్ సర్వెంట్లపై ఉంటుంది. స్థూలంగా ఇదీ సెటప్.
దేశంలో చాలామంది సివిల్ సర్వీసెస్ అధికారులు రకరకాల కారణాలతో రాజీనామాలిచ్చేయడాన్ని మోడీ సర్కారు సీరియస్గా పరిశీలిస్తోంది. దీనిపై పర్సనల్ అండ్ ట్రైనింగ్ డిపార్టుమెంట్ (డీఓపీటీ) కూడా రూల్స్ కఠినం చేయాలనుకుంటోంది. సివిల్ సర్వీసెస్కి సంబంధించిన నియామకాలు, బదిలీలు, వాళ్ల సర్వీసు బుక్ను డీఓపీటీయే చూస్తుంది. వచ్చే వారంలో సమావేశమై ఈ రాజీనామాల బెడదపై చర్చించబోతోంది. ప్రస్తుతమున్న రూల్స్ ప్రకారం ఎవరైనా అధికారి అర్థంతరంగా రాజీనామా చేస్తే… అతను ఏమైనా బకాయిలున్నా, ప్రభుత్వం అతనికి విదేశాల్లో ట్రైనింగ్ ఇప్పించినా ఆ మొత్తాన్ని ప్రభుత్వానికి తిరిగి చెల్లించాలి. అలాగే, ప్రొబేషనరీ టైమ్లో గనుక ఉద్యోగాన్ని వదులుకోవాలనుకుంటే అతనిపై ట్రైనింగ్కోసం పెట్టిన ఖర్చు కూడా వాపసు చేయాలి. కొన్నేళ్ల క్రితం వరకు ఖర్చు రాబట్టడమనేది చాలా కచ్చితంగా అమలయ్యేది.
పోయిన నెలలో ముగ్గురు ఐఏఎస్ ఆఫీసర్లు ఉద్యోగాలకు రాజీనామా చేశారు. అరుణాచల్, గోవా, మిజోరాం, యూనియన్ టెరిటరీ (ఏజీఎంయూటీ) క్యాడర్ అధికారులు కణ్ణన్ గోపీనాథన్ (2012 బ్యాచ్), కషీష్ మిట్టల్ (2011), కర్ణాటక క్యాడర్కి చెందిన శశికాంత్ సెంథిల్ (2009) వేర్వేరు కారణాలతో రిజైన్ చేశారు. వీరిలో కణ్ణన్, సెంథిల్లు ‘దేశంలో రాజకీయ పరిస్థితి బాగోలేదు. స్వేచ్ఛకు అవకాశం లేకుండా పోయింది’ అని తమ రాజీనామాలకు కారణం చెప్పారు. కషీష్ మిట్టల్ మాత్రం తనను నీతి ఆయోగ్ నుంచి తప్పించి అరుణాచల్ ప్రదేశ్లో పోస్టింగ్ ఇవ్వడాన్ని కారణంగా చూపెట్టారు. వీళ్లు కాకుండా సీనియర్మోస్ట్ ఐఏఎస్ ఆఫీసర్, ఫైనాన్స్ సెక్రటరీగా పనిచేస్తున్న సుభాష్ గర్గ్ వాలంటరీ రిటైర్మెంట్ స్కీమ్(వీఆర్ఎస్)కి అప్లయి చేశారు. తనను ఫైనాన్స్ నుంచి విద్యుత్ శాఖకు ట్రాన్స్ఫర్ చేయడం చిన్నతనంగా గర్గ్ భావించారు.
ఈ రాజీనామాలపై ఇప్పటికే అధికార బీజేపీ, ప్రతిపక్ష పార్టీల మధ్య మాటల యుద్ధం సాగుతోంది. ఫ్రీడమ్ లేదంటున్నవాళ్లు లెఫ్ట్ పార్టీలతో సంబంధాలున్నవాళ్లేనని బీజేపీ ఆరోపిస్తుంటే… సివిల్ సర్వెంట్లపై మోడీ సర్కారు వత్తిడి పెంచిందని కాంగ్రెస్ ఆరోపిస్తోంది.
పొలిటికల్ కామెంట్లు ఎలా ఉన్నా… ఈ రాజీనామాలపై సివిల్ సర్వీస్ అధికారుల్లోనూ ఏకాభిప్రాయం లేదు. రిజైన్ చేసినవాళ్లను వెనక్కి పిలవడమనేది మోడీ సర్కారు ఇష్టాయిష్టాలపై ఆధారపడి ఉంటుందని కొందరు అంటున్నారు. మరికొందరుమాత్రం ఇష్టం లేనివాళ్లతో పనిచేయించలేమని అంటున్నారు. ‘రూల్స్ని కఠినం చేస్తే ఏమవుతుంది? వెళ్లిపోవాలనుకున్నవాళ్లతో పనులు చేయించగలరా? దీనివల్ల ప్రయోజనమేమిటి?’ అంటున్నారు. సర్వీసు రూల్స్కూడా ఇదే చెబుతున్నాయి. ‘ఎవరైనా ఆఫీసర్ సర్వీసు నుంచి తప్పుకోవాలని రాజీనామా చేస్తే ఆమోదించాల్సిందే. అలాంటివాళ్లను వెనక్కి తీసుకున్నా ప్రయోజనముండదు’ అని స్పష్టంగా రూల్ ఉన్నట్లు సీనియర్ ఐఏఎస్ అధికారులు చెబుతున్నారు. ‘ఈ ఇష్యూని లైట్గా తీసుకోకూడదు. రాజీనామాల్ని ఆపడం సరికాదు. మొత్తం మీద సివిల్ సర్వెంట్ల మొరాలిటీని పెంచడం ముఖ్యం. రూల్స్ స్ట్రిక్ట్ చేస్తే ఏం లాభం?’ అన్నారు రఘునందన్ అనే రిటైర్డ్ ఆఫీసర్. ఈ సమస్యపై వచ్చే వారంలో ఒక గట్టి నిర్ణయానికి డీఓపీటీ రానుంది.
