బీటెక్ అర్హతతో ఎయిర్ ఫోర్స్ లో గెజిటెడ్ ఆఫీసర్ ఉద్యోగాలు...

ఇండియన్ ఎయిర్ ఫోర్స్ (ఐఏఎఫ్) గ్రూప్–ఏ గెజిటెడ్ ఆఫీసర్ కొలువుల భర్తీకి సంబంధించి ఎయిర్ ఫోర్స్ కామన్ అడ్మిషన్ టెస్ట్ (ఏఎఫ్‌సీఏటీ 1/2027) నోటిఫికేషన్ వెలువడింది. ఈ నోటిఫికేషన్ ద్వారా ఫ్లయింగ్, గ్రౌండ్ డ్యూటీ (టెక్నికల్, నాన్-–టెక్నికల్) విభాగాల్లో ఖాళీలను భర్తీ చేయనున్నారు. అభ్యర్థులు డిసెంబర్ 11 వరకు ఆన్​లైన్ ద్వారా అప్లై చేసుకోవచ్చు.

మొత్తం ఖాళీలు: 284.

విభాగాల వారీగా ఖాళీలు

• ఫ్లయింగ్ బ్రాంచ్ (36): షార్ట్ సర్వీస్ కమిషన్ 28 (పురుషులు), 8 (మహిళలు).  
• గ్రౌండ్ డ్యూటీ టెక్నికల్ (124): ఏరో నాటికల్ ఇంజినీర్ ఎలక్ట్రానిక్స్– ఏఈ (ఎల్) 88,  ఏరో నాటికల్ ఇంజినీర్ మెకానికల్ ఏఈ (ఎల్) 88.
• గ్రౌండ్ డ్యూటీ నాన్ – టెక్నికల్ (108): వెపన్ సిస్టమ్స్ 30, అడ్మినిస్ట్రేషన్ 53, లాజిస్టిక్స్ 11, అకౌంట్స్ 8, ఎడ్యుకేషన్ 4, మెటియరాలజీ 2. 
• గేట్ స్కోర్ ఎంట్రీ – గ్రౌండ్ డ్యూటీ టెక్నికల్ (16): ఏఈ (ఎల్) – ఎలక్ట్రానిక్స్ 11, ఏఈ (ఎం) – మెకానికల్ 5.  

విద్యార్హతలు

• ఫ్లయింగ్ బ్రాంచ్:  ఇంటర్మీడియట్ (10+2) స్థాయిలో గణితం, ఫిజిక్స్ సబ్జెక్టుల్లో చదివి ఉండాలి. గుర్తింపు పొందిన విశ్వవిద్యాలయం నుంచి మూడేళ్ల డిగ్రీ కోర్సు పూర్తిచేసి ఉండాలి. లేదా  బీఈ/ బి.టెక్ పూర్తిచేసి ఉండాలి.
• ఇన్​స్టిట్యూషన్ ఆఫ్ ఇంజినీర్స్ లేదా ఏరో నాటికల్ సొసైటీ ఆఫ్ ఇండియా నిర్వహించే సెక్షన్ 'ఏ', 'బీ' పరీక్షల్లో ఉత్తీర్ణులైన వారూ అప్లై చేసుకోవడానికి అర్హులు.
• ఏరోనాటికల్ ఇంజినీర్ - ఎలక్ట్రానిక్స్ (ఏఈ (ఎల్): ఇంటర్మీడియట్ (10+2) స్థాయిలో ఫిజిక్స్, మ్యాథమెటిక్స్ సబ్జెక్టులు చదివి ఉండాలి. దీంతోపాటు ఎలక్ట్రానిక్స్, ఎలక్ట్రికల్, ఎలక్ట్రానిక్స్ అండ్ కమ్యూనికేషన్, కంప్యూటర్ సైన్స్, ఆర్టిఫిషియల్ ఇంటెలిజెన్స్, డేటా సైన్స్, ఇన్ఫర్మేషన్ టెక్నాలజీ, ఇనుస్ట్రుమెంటేషన్, రోబోటిక్స్ సంబంధిత ఇంజినీరింగ్ స్పెషలైజేషన్లు చేసిన వారు అర్హులు. 
• బీఎస్సీ ఫిజిక్స్​తోపాటు ఎంఎస్సీ ఎలక్ట్రానిక్స్ పూర్తిచేసి ప్రత్యామ్నాయ ప్రొఫెషనల్ ఇంజినీరింగ్ పరీక్షలు పాసైన వారూ అప్లై చేసుకోవచ్చు.
• ఏరో నాటికల్ ఇంజినీర్ - మెకానికల్ (ఏఈ(ఎం): ఇంటర్మీడియట్ స్థాయిలో ఫిజిక్స్, మ్యాథ్స్ చదివి ఉండాలి. సంబంధిత విభాగంలో బీఈ/ బి.టెక్ పూర్తిచేసి ఉండాలి.  

గ్రౌండ్ డ్యూటీ నాన్- టెక్నికల్: ఇంటర్మీడియట్ (10+2) స్థాయిలో ఫిజిక్స్, మ్యాథమెటిక్స్ సబ్జెక్టులు చదివి ఉండాలి. అలాగే, సంబంధిత విభాగంలో గ్రాడ్యుయేషన్,  బీఈ/ బి.టెక్, పోస్ట్ గ్రాడ్యుయేషన్ పూర్తిచేసి ఉండాలి.  

వయసు: (2028, జనవరి 1 నాటికి)

• ఫ్లయింగ్ బ్రాంచ్: 20 నుంచి 24 ఏళ్ల మధ్యలో ఉండాలి. డీజీసీఏ జారీ చేసి చెల్లుబాటులో ఉన్న కమర్షియల్ పైలెట్ లైసెన్స్ కలిగి ఉంటే వారి వయోపరిమితిని 26 సంవత్సరాల వరకు సడలిస్తారు. 
• మిగతా పోస్టులకు 20 నుంచి 26 ఏళ్ల మధ్యలో ఉండాలి.  ఎలాంటి వయో సడలింపులు ఉండవు.
• సెలెక్షన్ ప్రాసెస్: ఆన్​లైన్ రాత పరీక్షలో అర్హత సాధించిన అభ్యర్థులను ఎయిర్ ఫోర్స్ సెలెక్షన్ బోర్డ్ (ఏఎఫ్ఎఫ్​బీ) పరీక్షలకు ఆహ్వానిస్తారు. ఈ దశలో అభ్యర్థుల సామర్థ్యాన్ని అంచనా వేసేందుకు ఆఫీసర్ ఇంటెలిజెన్స్ రేటింగ్ (ఓఐఆర్), సైకలాజికల్ టెస్ట్‌, గ్రూప్ టాస్క్‌, ఇంటర్వ్యూలను నిర్వహిస్తారు. 
• ఫ్లయింగ్ బ్రాంచ్ అభ్యర్థులు అదనంగా కంప్యూటరైజ్డ్ పైలెట్ సెలెక్షన్ సిస్టమ్ (సీపీఎస్ఎస్) పరీక్షలో అర్హత సాధించడం తప్పనిసరి. 
•  మరిన్ని  వివరాలకు వెబ్​సైట్ afcat.edcil.co.inను సందర్శించండి.

ఏఎఫ్​సీఏటీ ఎగ్జామ్ ప్యాటర్న్

ఆన్​లైన్ పద్ధతిలో నిర్వహించే ఎగ్జామ్​లో ప్రశ్నలు మల్టిపుల్ చాయిస్ రూపంలో ఉంటాయి. మొత్తం 100 ప్రశ్నలు 300 మార్కులకు ఎగ్జామ్ ఉంటుంది. 120 నిమిషాల్లో పూర్తిచేయాలి. పరీక్ష కేవలం ఇంగ్లిష్ మాధ్యమంలో మాత్రమే ఉంటుంది. ప్రతి సరైన సమాధానానికి 3 మార్కులు ఇస్తారు. ప్రతి తప్పు సమాధానానికి 1 మార్కు కోత విధిస్తారు.

ఎన్​సీసీ స్పెషల్ ఎంట్రీ – 2027

• అర్హతలు: అభ్యర్థులు ఏఎఫ్‌సీఏటీ రిజిస్ట్రేషన్ తేదీకి ముందు నిర్దిష్ట రెండేళ్ల కాలపరిమితిలోపు  ఎన్‌సీసీ ఎయిర్ వింగ్ సీనియర్ డివిజన్ 'సి' సర్టిఫికెట్ కలిగి ఉండాలి.
• రాత పరీక్ష మినహాయింపు: ఎన్‌సీసీ ప్రత్యేక ప్రవేశానికి అర్హత సాధించిన అభ్యర్థులకు ఏఎఫ్‌సీఏటీ రాత పరీక్ష నుంచి మినహాయింపు ఉంటుంది. వీరిని నేరుగా ఎయిర్ ఫోర్స్ సెలెక్షన్ బోర్డ్ (ఏఎఫ్ఎస్ బీ) పరీక్షలకు ఆహ్వానిస్తారు.
• అప్లికేషన్: ఆన్​లైన్ ద్వారా.
• అప్లికేషన్ ప్రారంభం: నవంబర్ 12. 
• అప్లికేషన్  ఫీజు: ఏఎఫ్​సీఏటీ ఎంట్రీ అభ్యర్థులు రూ. 649 చెల్లించాలి. ఎన్​సీసీ స్పెషల్ ఎంట్రీ, గేట్ స్కోర్ ఎంట్రీ అభ్యర్థులకు ఫీజు ఉండదు.
• లాస్ట్ డేట్: డిసెంబర్ 11. 
• ఎగ్జామినేషన్ తేదీ: 2027, జనవరి 31.
• ట్రైనింగ్ ప్రారంభం: 2028, జనవరి  మొదటివారం

గేట్ స్కోర్ ఎంట్రీ – 2027

• అర్హత: ఏరోనాటికల్ ఇంజినీర్ - ఎలక్ట్రానిక్స్, ఏరోనాటికల్ ఇంజినీర్ - మెకానికల్ విభాగాలకు దరఖాస్తు చేసుకోవచ్చు.
• విద్యార్హత: అభ్యర్థులు నిర్దేశిత ఇంజినీరింగ్ విభాగాల్లో బీఈ/ బి.టెక్  పూర్తిచేసి ఉండాలి. అలాగే, సంబంధిత గేట్ సబ్జెక్టులో కచ్చితంగా అర్హత సాధించి ఉండాలి.
• గేట్ స్కోర్ కాలపరిమితి: 2024, జనవరి 1 నుంచి 2027, డిసెంబర్ 31 మధ్య కాలానికి చెల్లుబాటు అయ్యేలా ఉండాలి.
• ఎంపిక విధానం: అభ్యర్థులు దరఖాస్తు చేసుకునే సమయంలో తమ గేట్ స్కోర్ వివరాలు, దానికి సంబంధించిన విద్యార్హత ధ్రువపత్రాలను సమర్పించాల్సి ఉంటుంది.ఈ ఎంట్రీకి దరఖాస్తు చేసుకున్న అభ్యర్థులను నిర్ణీత షార్ట్​లిస్టింగ్ విధానం ఆధారంగా ఎయిర్ ఫోర్స్ సెలెక్షన్ బోర్డ్ (ఏఎఫ్ఎస్ బీ) పరీక్షలకు ఎంపిక చేస్తారు.

సిలబస్

• జనరల్ అవేర్‌నెస్: చరిత్ర, భూగోళశాస్త్రం, కరెంట్ అఫైర్స్, భారతీయ రాజకీయ వ్యవస్థ, ఆర్థిక వ్యవస్థ, రక్షణ రంగం, సైన్స్ అండ్ టెక్నాలజీ, క్రీడలు, పర్యావరణం.
• ఇంగ్లిష్ వెర్బల్ ఎబిలిటీ: అభ్యర్థుల ఇంగ్లిష్ భాషా నైపుణ్యాలను పరీక్షించేందుకు కాంప్రహెన్షన్, పద సంపద, సమానార్థకాలు, వ్యతిరేక పదాలు, వ్యాకరణం, వాక్య సవరణ, జాతీయాలు, క్లోజ్ టెస్ట్, వాక్యాల అమరిక.
• సంఖ్యా సామర్థ్యం:  శాతాలు, సరాసరి, లాభనష్టాలు, నిష్పత్తులు, కాలం–-పని, వేగం–-దూరం, వడ్డీ, సంభావ్యత, సంఖ్యా వ్యవస్థ, క్షేత్రమితి.
• రీజనింగ్, మిలిటరీ ఆప్టిట్యూడ్: అభ్యర్థుల తార్కిక ఆలోచనా శక్తిని అంచనా వేసేందుకు వర్బల్, నాన్- వర్బల్ రీజనింగ్ అంశాలను సిలబస్‌లో పొందుపరిచారు.