- జపాన్ కంపెనీ ‘సైన్స్’ ఆవిష్కరణ
- 15 నిమిషాల్లో ఫుల్ బాడీ క్లీన్ చేస్తదని వెల్లడి
- ఒక్కో మెషిన్ రూ.3.5 కోట్లు.. ఇప్పటికే ఆర్డర్ పెట్టిన యూఎస్ రిసార్ట్
ఒసాకా(జపాన్): బట్టలు ఉతికే మెషిన్తో స్ఫూర్తి పొందారో లేక బద్దకస్తుల కోసమని డిజైన్ చేశారో తెలియదు కానీ జపాన్లోని ‘సైన్స్’ కంపెనీ హ్యూమన్ వాషింగ్ మెషిన్ను తయారుచేసింది. క్యాప్సుల్ ఆకారంలో ఉండే ఈ మెషిన్ ‘మనుషులను ఉతికి ఆరేస్తుంది’ అని ఆ కంపెనీ ప్రతినిధి చెబుతున్నారు.
హ్యూమన్ వాషర్ ఆఫ్ ది ఫ్యూచర్ గా చెబుతున్న ఈ వాషింగ్ మెషిన్ మీ శరీరాన్నే కాదు మనసునూ శుభ్రం చేస్తుందని అంటున్నారు. శరీరాన్ని శుభ్రం చేస్తూనే మైండ్ను రిలాక్స్ చేసే సంగీతాన్ని వినిపిస్తుందని, 15 నిమిషాల్లో శరీరం మొత్తం పరిశుభ్రమవుతుందని చెప్పారు. జపాన్ లో కొనసాగుతున్న వరల్డ్ ఎక్స్ పోలో ఈ మెషిన్ ను ప్రదర్శనకు ఉంచగా ఇప్పటి వరకు 2 కోట్ల మంది విజిట్ చేశారట. ఈ మెషిన్ అంచనా ధర దాదాపు 3.5 కోట్ల రూపాయలు ఉండవచ్చని ప్రచారం జరుగుతోంది.
దీనికున్న ప్రత్యేకత కారణంగా కేవలం 50 మెషిన్లు మాత్రమే తయారుచేయనున్నట్లు పేర్కొంది. ఇప్పటికే రెండు ఆర్డర్లు అందుకున్నట్లు వెల్లడించింది. అమెరికాకు చెందిన ఓ రిసార్ట్ తో పాటు జపాన్ కు చెందిన ఎలక్ట్రానిక్స్ రిటైల్ కంపెనీ యమడా డెన్ కూడా ఈ హ్యూమన్ వాషింగ్ మెషిన్ కోసం ఆర్డర్ పెట్టిందట.
ఎలా పనిచేస్తుందంటే..
మెషిన్లోకి అడుగుపెట్టి లోపల ఉన్న బెడ్పై పడుకుంటే చాలు.. ఆటోమేటిక్ వాష్ మొదలవుతుంది. మైక్రోబబుల్స్ నుంచి వాటర్ మీద పడుతూ శరీరాన్ని శుభ్రం చేయడం మొదలు పెడుతుంది. అదే సమయంలో మెషిన్ లోని సెన్సర్లు ఆరోగ్య పరిస్థితిని ఎప్పటికప్పుడు గమనిస్తూ ఉంటాయి.
మరోవైపు మంద్రస్థాయిలో సంగీతం వినిపిస్తూ మైండ్ ను ప్రశాంతంగా ఉంచేందుకు తోడ్పడుతుంది. స్నానం పూర్తయ్యాక ఆటోమేటిక్ డ్రయర్ ద్వారా శరీరంపై ఉన్న తడిని ఆరిపోయేలా చేస్తుంది. ఈ ప్రాసెస్ మొత్తం 15 నిమిషాల్లో పూర్తవుతుంది. ఆపై పూర్తిగా శుభ్రమైన శరీరంతో బయటకు అడుగుపెడతారని కంపెనీ చెబుతోంది.
