మన్ కీ బాత్.. ప్రధాని మోదీ ప్రజలతో మమేకమయ్యే రేడియో ప్రోగ్రాం.. దేశంలో అత్యంత ప్రజాదారణ పొందిన వేదిక కూడా. ఈ ప్రోగ్రాంలో ప్రధాని మోదీ ప్రజలతో దేశాభివృద్ధి, సామాజిక విలువలు, జాతీయ చైతన్యం వంటి అంశాలపై ప్రజలతో తన ఆలోచనలను పంచుకుంటున్నారు. 2014లో ప్రారంభమైన ఈ కార్యక్రమం.. ప్రతి నెలా చివరి ఆదివారం ప్రసారం అవుతూ.. కోట్లాది మంది భారతీయుల హృదయాలను గెలుచుకుంది.
ఎప్పటిలాగే ప్రధాని మోదీ తన 128వ మన్ కీ బాత్ ప్రోగ్రాం ను ఆదివారం (నవంబర్30) న నిర్వహించారు. ఈ కార్యక్రమంలో తెలంగాణలోని కరీంనగర్ ప్రస్తావన తెచ్చారు ప్రధాని మోదీ. కరీంనగర్ లో తయారైన సాంప్రదాయ కళాకృతులు ప్రపంచవ్యాప్తంగా ప్రసిద్ధి చెందాయన్నారు. కరీంనగర్ కళాకృతులన వివిధ దేశాల ప్రధాన మంత్రులకు బహుకరించానని మోదీ తెలిపారు. కరీంనగర్ లో ప్రసిద్ధి చెందిన సాంప్రదాయ సిల్వర్ తో తయారైన బుద్ధుడు ప్రతిమను జపాన్ ప్రధానికి, సంప్రదాయ పూల ఆకృతితో ఉన్న సిల్వర్ మిర్రర్ ను ఇటలీ ప్రధానికి బహుకరించానని ప్రధాని మోదీ చెప్పారు.
గత ఎపిసోడ్ (అక్టోబర్ 22 న) లో ప్రధాని మోదీ భారత గిరిజన నాయకుల స్పూర్తిదాయక జీవితాలను గుర్తు చేసుకున్నారు. ముఖ్యంగా తెలంగాణకు చెందిన గిరిజనోద్యమ నాయకుడు కొమురం భీమ్ గురించి ప్రస్తావిస్తూ, ఆయన త్యాగం, ధైర్యం, నాయకత్వం గురించి సుదీర్ఘంగా మాట్లాడారు. కొమురం భీం గిరిజన సమాజంలో ఓ స్ఫూర్తిదాయక దీప్తి అన్నారు. నిజాం పాలనకు వ్యతిరేకంగా పోరాడిన కొమరం భీమ్ ధైర్యం.. భారత స్వాతంత్ర్య పోరాట చరిత్రలో ఓ కీలక అధ్యాయమని మోదీ గుర్తు చేశారు.
