జనసమీకరణపై దృష్టి పెట్టండి: పొన్నం
హైదరాబాద్, వెలుగు: హైదరాబాద్లో నాలుగు రోజుల పాటు సీఎం రేవంత్ రెడ్డి వివిధ అభివృద్ధి పనులకు శంకుస్థాపన చేయనున్నారని మంత్రి పొన్నం ప్రభాకర్ వెల్లడించారు. జన సమీకరణ చేసి సీఎం టూర్ను సక్సెస్ చేయాలని సూచించారు. బుధవారం గాంధీభవన్లో అసెంబ్లీ ఎన్నికల్లో పోటీ చేసిన అభ్యర్థులు, హైదరాబాద్ జిల్లా కీలక నేతలతో పొన్నం ప్రభాకర్ సమావేశమై మాట్లాడారు.
‘‘అల్వాల్ టిమ్స్ హాస్పిటల్ దగ్గర రాజీవ్ రహదారి ఎలివేటెడ్ కారిడార్ ఏర్పాటుకు సీఎం శంకుస్థాపన చేస్తారు. బంజారాహిల్స్లో అంబేద్కర్ భవన్, బైరామల్గూడ ఫ్లై ఓవర్, ఓల్డ్ సిటీలో మెట్రో విస్తరణకు శంకుస్థాపన చేయనున్నారు’’అని పొన్నం తెలిపారు. డీసీసీ అధ్యక్షులు మీటింగ్లు నిర్వహించి సీఎం ప్రోగ్రామ్లను సక్సెస్ చేయాలని కోరారు.
పొన్నం వర్సెస్ అజారుద్దీన్
అక్బరుద్దీన్ ఒవైసీ స్కూల్కు వెళ్లి పొన్నం ప్రభాకర్ చాయ్ తాగడాన్ని జూబ్లీహిల్స్ ఇన్చార్జ్ అజారుద్దీన్ తప్పుబట్టారు. దీనిపై పొన్నం స్పందించారు. ‘‘చాంద్రాయణ్గుట్ట అసెంబ్లీ నియోజకవర్గంలో కొన్ని అభివృద్ధి కార్యక్రమాల ఓపెనింగ్కు వెళ్లాను. అక్బరుద్దీన్ ఒవైసీ మర్యాదపూర్వకంగా ఆహ్వానించారు. వెళ్లి చాయ్ తాగితే తప్పేంటి? నాకు హైదరాబాద్లో ఉన్న ఎమ్మెల్యేలందరూ సమానమే’’అని వివరణ ఇచ్చారు. దీంతో ఇరువురి మధ్య చిన్నపాటి గొడవ జరగడంతో.. మీటింగ్ మధ్యలో నుంచే పొన్నం ప్రభాకర్ సెక్రటేరియెట్కు వెళ్లిపోయారు. అజారుద్దీన్ అతిగా స్పందించారని, ఇది పెద్ద ఇష్యూనే కాదని కాంగ్రెస్ నేతలు అన్నారు.
