వరల్డ్ కప్ లో టీమిండియా ఫైనల్ సమరానికి సిద్ధమైంది. ఆస్ట్రేలియాతో ఆదివారం(నవంబర్ 19) జరగనున్న ఫైనల్ ల్లో టైటిల్ కోసం తలపడుతుంది. ఈ మ్యాచ్ కోసం బీసీసీఐ ఇప్పటికే అన్ని ఏర్పాట్లు చేసింది. ఈ గ్రాండ్ ఫైనల్ తో దేశమంతటా సందడి నెలకొంది. దేశవ్యాప్తంగా ఈ మ్యాచ్ చూడడం కోసం బిగ్ స్క్రీన్లను రెడీ చేస్తున్నారు. అహ్మదాబాద్ లోని నరేంద్ర మోడీ స్టేడియంలో ఈ మ్యాచ్ జరగనుండగా పశ్చిమ బెంగాల్ ముఖ్యమంత్రి మమతా బెనర్జీ, బీజీపీ పార్టీపై కీలక వ్యాఖ్యలు చేసింది.
బీజేపీ నేతృత్వంలోని కేంద్ర ప్రభుత్వం భారత క్రికెట్ జట్టుతో సహా దేశవ్యాప్తంగా వివిధ సంస్థలను కాషాయ రంగులోకి మార్చడానికి ప్రయత్నిస్తోందని పశ్చిమ బెంగాల్ ముఖ్యమంత్రి మమతా బెనర్జీ శుక్రవారం ఆరోపించారు. సెంట్రల్ కోల్‌కతాలోని పోస్టా బజార్‌లో జగద్ధాత్రి పూజ ప్రారంభోత్సవంలో బెనర్జీ మాట్లాడుతూ, క్రికెట్ జట్టు ప్రాక్టీస్ జెర్సీలలో మాత్రమే కాకుండా మెట్రో స్టేషన్ల పెయింటింగ్‌లో కూడా బిజెపి కాషాయ రంగును ప్రవేశపెట్టిందని ఆరోపించారు.
ఈ సందర్భంగా తన అసమ్మతిని వ్యక్తం చేస్తూ " బీజేపీ దేశమంతటా కాషాయ రంగుతో నింపేయాలని ప్రయత్నిస్తున్నారు. మన భారత ఆటగాళ్లను చూసి మేము గర్విస్తున్నాము. ప్రపంచ కప్ గెలుస్తారని మేము నమ్ముతున్నాము. కానీ వారు (బిజెపి) అక్కడ కూడా కాషాయ రంగులను తీసుకువచ్చారు. భారత క్రికెటర్లందరూ కుంకుమపువ్వు రంగులో ఉన్న జెర్సీలలో ప్రాక్టీస్ చేస్తున్నారు. మెట్రో స్టేషన్‌లకు కుంకుమ రంగు పూశారు. అని మమతా బెనర్జీ పేర్కొన్నారు.
