జైపూర్: రాజస్తాన్లోని భిల్వారా జిల్లా కరేడా పరిధిలో ఓ వింత ఘటన జరిగింది. ఆదివారం రాత్రి ఓ వ్యక్తి ప్రధాని మోదీ ముఖం ఉన్న మాస్క్ ధరించి, ఇనుప రాడ్తో ఓ మొబైల్ షాప్ తాళం పగలగొట్టడానికి ట్రై చేశాడు. ఎంత ప్రయత్నించినా తాళం రాకపోవడంతో వెనుతిరిగాడు. ఈ దృశ్యాలన్నీ షాప్ సీసీటీవీ కెమెరాలో రికార్డయ్యాయి.
పగటిపూట అదే వ్యక్తి మాస్క్ లేకుండా, అదే డ్రెస్తో ఆ ఏరియాలో తిరిగినట్లు ఇతర సీసీటీవీ ఫుటేజీల ద్వారా గుర్తించామని ఎస్హెచ్ఓ పూరన్ మాల్ మీనా తెలిపారు. కాగా, అదే రాత్రి అక్కడికి 800 మీటర్ల దూరంలో ఉన్న మరో మొబైల్ షాపులో చోరీ జరిగిందని ఎస్హెచ్వో వెల్లడించారు. అయితే అక్కడ సీసీటీవీ ఫుటేజీ లేకపోవడంతో, ఆ చోరీకి పాల్పడింది కూడా ఇతనేనా కాదా అనేది పోలీసులు ఇంకా కన్ఫర్మ్ చేయలేదు. ప్రస్తుతం నిందితుడి కోసం పోలీసులు గాలిస్తున్నారు.
