- ఒక్కో పోస్టుకు 1,000 మందికి పైగా పోటీ
- ఇది ప్రభుత్వ వైఫల్యం.. యువత భవిష్యత్తు అంధకారమే: ప్రతిపక్షాలు
పాట్నా: బిహార్లో 935 అసిస్టెంట్ ఎడ్యుకేషన్ డెవలప్‌‌‌‌‌‌‌‌మెంట్ ఆఫీసర్ (ఏఈడీవో) పోస్టుల కోసం 9.8 లక్షల మంది దరఖాస్తు చేసుకున్నారు. ఒక్కో పోస్టుకు సగటున 1,000 మందికి పైగా పోటీ పడుతున్నారు. ఉద్యోగాలకు ఈ స్థాయిలో దరఖాస్తులు రావడం బిహార్ పబ్లిక్ సర్వీస్ కమిషన్ (బీపీఎస్సీ) చరిత్రలోనే రికార్డు.
ఇది బిహార్ యువతలో ఉద్యోగ ఆకాంక్షను స్పష్టం చేస్తున్నది. అలాగే ఈ అంశం బిహార్ ఉద్యోగాలు, నిరుద్యోగంపై పెద్ద చర్చను లేవనెత్తించింది. ఆగస్టు 27 నుంచి సెప్టెంబర్ 26 వరకు దరఖాస్తులు స్వీకరించారు. ఎలిజిబిలిటీ సులభంగా ఉండటం, లెవెల్ 5 జీతం కారణంగా ఈ పోస్టులకు ఇంత డిమాండ్ ఏర్పడినట్టు చెప్తున్నారు. బీపీఎస్సీ ఎగ్జామినేషన్ కంట్రోలర్ సునీల్ కుమార్ మాట్లాడుతూ ఇంత భారీగా దరఖాస్తులు రావడాన్ని సర్కార్ఉద్యోగం అంటే యువతలో ఉన్న క్రేజ్గా పేర్కొన్నారు.
ఎలాంటి అవాంతరాలు లేకుండా పరీక్ష నిర్వహిస్తామని తెలిపారు. ప్రతిపక్ష ఆర్జేడీ, కాంగ్రెస్పార్టీలు ఉద్యోగాలకు ఇంత భారీ పోటీని ‘ప్రభుత్వ వైఫల్యం’గా విమర్శిస్తున్నాయి. ‘‘935 పోస్టులకు 9.8 లక్షలు అంటే ఉద్యోగాలు చాలా తక్కువ, ఎన్డీయే పాలనలో రాష్ట్ర యువత భవిష్యత్తు అంధకారమే’’ అని పేర్కొన్నాయి.
మరిన్ని ఉద్యోగాలు సృష్టించాలని డిమాండ్ చేశాయి. ‘నితీశ్ ప్రభుత్వం గతంలో పారదర్శక రిక్రూట్‌‌‌‌‌‌‌‌మెంట్‌‌‌‌‌‌‌‌తో లక్షలాది ఉద్యోగాలు ఇచ్చింది. భవిష్యత్తులో మరిన్ని రిక్రూట్మెంట్లు చేస్తుంది’ అని జేడీయూ పార్టీ పేర్కొంది.
