పింఛన్ల పంపిణీ స్పీడప్

• పోస్ట్​ మాస్టర్లకు 5జీ మొబైల్ ఫోన్లు, ఎల్​1 ఫింగర్ ప్రింట్ మెషీన్లు
• ప్రారంభించిన మంత్రి సీతక్క.. రాష్ట్రవ్యాప్తంగా 6,300 మందికి అందజేత 

హైదరాబాద్, వెలుగు: రాష్ట్ర ప్రభుత్వం ‘చేయూత’ సామాజిక భద్రతా పింఛన్ల పంపిణీని స్పీడప్​ చేసింది. ఈ పథకం ద్వారా వృద్ధులు, దివ్యాంగులు, వితంతులు, ఒంట‌‌రి మ‌‌హిళ‌‌లు, హెచ్‌‌ఐవీ, డ‌‌యాలసిస్ బాధితులు, గీత, బీడీ కార్మికులకు ఆర్థిక భరోసా కల్పిస్తోంది. ప్రస్తుతం ప్రభుత్వం చేయూత పథకంలో భాగంగా 11 రకాల పింఛన్లు అందజేస్తోంది. ఇప్పటివరకు పింఛన్ దారుల ధ్రువీకరణ కోసం 2జీ ఆధారిత ఫింగర్ ప్రింట్ పరికరాలను వినియోగించారు.

ఇప్పుడు వాటి స్థానంలో ఆధునిక సాంకేతికతతో కూడిన ఆధార్ ఆధారిత ముఖ గుర్తింపు సాఫ్ట్‌‌వేర్‌‌ను అందుబాటులోకి తీసుకొచ్చారు. ఈ కొత్త విధానం ద్వారా పింఛన్ పంపిణీ మరింత కచ్చితంగా, పారదర్శకంగా అందనున్నది. ఈ కార్యక్రమం కోసం ప్రభుత్వం రూ.15.50 కోట్ల బడ్జెట్‌‌తో 5జీ ఆధారిత ఎల్​1 ఫింగర్ ప్రింట్ పరికరాలు, కొత్త మొబైల్ ఫోన్లను కొనుగోలు చేసింది. ప్రయోగాత్మకంగా కొన్ని జిల్లాల్లో ఈ పరికరాలను ప్రభుత్వం వినియోగించింది. ఆశించిన ఫలితాలు రావడంతో బ్రాంచ్ పోస్టుమాస్టర్లకు స్మార్ట్ మొబైల్ ఫోన్లు, పరికరాలు పంపిణీ చేస్తున్నది. 

స్మార్ట్​ ఫోన్లు పంపిణీ చేసిన మంత్రి సీతక్క

ములుగు జిల్లాలోని పస్రా మండల కేంద్రంలో మంత్రి సీతక్క.. కలెక్టర్ టీఎస్ దివాకర్ తో కలిసి స్మార్ట్ మొబైల్ ఫోన్లు, పరికరాల పంపిణీని లాంఛనంగా ప్రారంభించారు. రాష్ట్రవ్యాప్తంగా 6,300 మంది పోస్టుమాస్టర్లకు పరికరాలను అందజేయనున్నారు. ఫేస్ రికగ్నిషన్ సాఫ్ట్‌‌వేర్‌‌ను టీజీ ఆన్​లైన్​ను ప్రత్యేకంగా అభివృద్ధి చేసింది. కొత్త సాంకేతిక పరిజ్ఞానం వల్ల పింఛన్ దారుల ధ్రువీకరణ సమయం మూడు సెకన్లకు తగ్గి, పింఛన్లు వేగంగా పంపిణీ అవుతాయి. దీంతో లబ్ధిదారులు ఎక్కువసేపు వేచి ఉండాల్సిన అవసరం లేకుండా వెనువెంట‌‌నే తమ పింఛన్లు అందుకుంటారు. 

వ్యవసాయ కూలీలు, వృద్ధులు, వేలిముద్రలు చెరిగిన వంటి వారికి ముఖగుర్తింపు యాప్ ఎంతో మేలు చేస్తోంది. ప్రజల జీవన ప్రమాణాలను మెరుగుపరిచే దిశగా ఈ పథకం డిజిటల్ రూపాంతరం పొందడం ద్వారా పింఛన్ పంపిణీ వ్యవస్థలో పారదర్శకత, వేగం పెరిగి పింఛన్ దారులకు సత్వర సేవలు అందుతాయని మంత్రి సీతక్క పేర్కొన్నారు.  పింఛన్​దారుల  సమస్యలను దృష్టిలో పెట్టుకొని ఈ నూతన విధానాన్ని ప్రవేశపెట్టినట్లు మంత్రి చెప్పారు.