- గత పాలకులు పంచాయతీలను విస్మరించారు: మంత్రి వివేక్ వెంకటస్వామి
- కేసీఆర్ చేసిన అప్పులకు ప్రతి నెలా 5 వేల కోట్ల మిత్తి కడ్తున్నం
- జనవరిలో ఒక్కో సెగ్మెంట్కు 3,500 చొప్పున ఇండ్లు
- చెన్నూరు, భీమారం, జైపూర్, మందమర్రి మండలాల్లో మంత్రి ప్రచారం
కోల్బెల్ట్/ జైపూర్, వెలుగు: కాంగ్రెస్ బలపరిచిన సర్పంచ్ అభ్యర్థులను గెలిపించుకుంటే గ్రామాల్లో అభివృద్ధి వేగంగా జరుగుతుందని రాష్ట్ర కార్మిక, గనుల శాఖ మంత్రి వివేక్ వెంకటస్వామి అన్నారు. సోమవారం చెన్నూరు నియోజకవర్గ పరిధిలోని చెన్నూరు, భీమారం, జైపూర్, మందమర్రి మండలాల పరిధిలోని పంచాయతీల్లో మంత్రి ప్రచారం నిర్వహించారు. కాంగ్రెస్ తరఫున నిలబెట్టిన వారిని గెలిపిస్తే సీఎం రేవంత్రెడ్డి వద్దకు వెళ్లి గ్రామాల అభివృద్ధికి ఎక్కువ నిధులు తెచ్చుకునే అవకాశం ఉంటుందన్నారు. రాష్ట్రంలో 17 లక్షల ఇందిరమ్మ ఇండ్లు నిర్మిస్తున్నామని, జనవరిలో ఒక్కో నియోజకవర్గానికి మరో 3,500 చొప్పున ఇండ్లు మంజూరవుతాయని చెప్పారు. బీఆర్ఎస్ పాలనలో ఎవరికీ డబుల్బెడ్రూమ్ ఇండ్లు అందలేదని, రేషన్కార్డులు ఇవ్వలేదని విమర్శించారు. ఎంపీటీసీ, జడ్పీటీసీ ఎన్నికలపై ఈ నెల 20 తర్వాత క్లారిటీ వస్తుందన్నారు.
ప్రతి నెలా 5 వేల కోట్ల మిత్తి కడ్తున్నం
బీఆర్ఎస్ హయాంలో గ్రామ పంచాయతీలను పట్టించుకోలేదని, కమీషన్ల కోసం రాష్ట్రాన్ని అప్పులపాలు చేశారని మంత్రి వివేక్ మండిపడ్డారు. కేసీఆర్ రూ.8 లక్షల కోట్ల అప్పులు చేస్తే, దానిపై ప్రభుత్వం ప్రతినెలా రూ.5 వేల కోట్లు మిత్తిగా కడుతున్నదన్నారు. బీఆర్ఎస్పాలన అవినీతిమయమని, కేసీఆర్, కేటీఆర్ సొంత ఆస్తులను పెంచుకున్నారని ఆరోపించారు. మిషన్ భగీరథ పేరిట రూ.60 వేల కోట్లు దోచుకున్నారని, ప్రజలకు చుక్కనీరు ఇవ్వలేదన్నారు. ఆర్థిక పరిస్థితి బాలేకున్నా ఇచ్చిన హామీలను అమలు చేస్తున్నామని, ఆరు గ్యారంటీల అమలుతో ప్రజలు సంతోషంగా ఉన్నారని చెప్పారు. మహిళలకు రూ.21వేల కోట్ల వడ్డీలేని రుణాలిచ్చామని, పెట్రోల్ బంకులు మంజూరు చేశామని చెప్పారు.
రూ.200 కోట్లతో అభివృద్ధి
చెన్నూరు నియోజకవర్గంలో అభివృద్ధి పనుల కోసం సర్కార్రూ.200 కోట్లు మంజూరు చేసిందని మంత్రి తెలిపారు. రెండేండ్లలో విద్య, వైద్యం కోసం ఎక్కువ నిధులు కేటాయించామన్నారు. చెన్నూరు మండలం సోమనపల్లిలో రూ.200 కోట్లతో యంగ్ఇండియా ఇంటిగ్రేటెడ్ స్కూల్ను నిర్మిస్తున్నామన్నారు. భీమారంలో మెరుగైన వైద్య సేవలను అందుబాటులోకి తీసుకొచ్చేందుకు హాస్పిటల్ నిర్మించి .. అంబులెన్స్ఏర్పాటు చేశామన్నారు. కాకా వెంకట స్వామి కుటుంబం ఎల్లప్పుడు ప్రజలకు సేవలు చేస్తున్నదని, అధికారంలో ఉన్నా లేకున్నా విశాక ట్రస్ట్ ద్వారా ప్రజల అవసరాలు తీరుస్తున్నామన్నారు. కాంగ్రెస్బలపరిచిన సర్పంచ్ అభ్యర్థులందరిని గెలిపిస్తే గ్రామాల్లో రూ.కోటి వరకు ఫండ్స్ మంజూరు చేస్తామని, అధిక సంఖ్యలో ఇందిరమ్మ ఇండ్లు మంజూరు చేస్తానని హామీ ఇచ్చారు.
జైపూర్ పవర్ ప్లాంట్లో స్థానికులకే ఉద్యోగావకాశాలు
కాకా వెంకటస్వామి పెద్దపల్లి ఎంపీగా ఉన్నప్పుడు జైపూర్ లో 1200 మెగావాట్ల సింగరేణి థర్మల్ పవర్ ప్లాంట్ ఏర్పాటుకు కృషి చేశారని మంత్రి గుర్తు చేశారు. మరో 800 మెగావాట్ల మూడో ప్లాంటుకు వచ్చేనెలలో శంకుస్థాపన చేస్తామన్నారు. ఇందులో 80 శాతం ఉద్యోగాలు స్థానికులకే ఇస్తామన్నారు. సింగరేణిలో కొత్త బొగ్గు గనులు తీసుకొచ్చేందుకు సర్కార్చర్యలు తీసుకుంటున్నదని, చెన్నూరు నియోజకవర్గానికి ఒక గని వస్తుందన్నారు. చెన్నూర్లో ఏటీసీ సెంటర్ను ఏర్పాటు చేయనున్నట్టు తెలిపారు.
