- తెలంగాణ ప్రజలవి దిష్టి కళ్లు అనడం కరెక్ట్ కాదు
- ఏపీపై ప్రేముంటే ఇక్కడి ఆస్తులు అమ్ముకోవాలి
- జడ్చర్ల ఎమ్మెల్యే అనిరుధ్ రెడ్డి
జడ్చర్ల టౌన్, వెలుగు : ‘తెలంగాణ ప్రజలవి దిష్టి కళ్లు’ అంటూ మాట్లాడిన ఏపీ డిప్యూటీ సీఎం పవన్ కల్యాణ్ తెలంగాణ ప్రజలకు క్షమాపణ చెప్పాలని జడ్చర్ల ఎమ్మెల్యే జనంపల్లి అనిరుధ్‌‌‌‌రెడ్డి డిమాండ్‌ చేశారు. పవన్‌‌‌‌కు ఏపీపై ప్రేమ ఉంటే తెలంగాణలో ఉన్న ఆస్తులు అమ్ముకొని విజయవాడ వెళ్లిపోవాలని, అలా చేయకుండా కొత్తగా ఇక్కడ ఆస్తులు ఎందుకు కొంటున్నారని నిలదీశారు. చిరంజీవికి తమ్ముడు కాకపోయి ఉంటే ఆయన యాక్టర్ అయ్యేవారా ? అని ప్రశ్నించారు.
శనివారం ఆయన స్థానికంగా మీడియాతో మాట్లాడారు. 2019లో ఏపీలో జరిగిన ఎన్నికల్లో ఒంటరిగా పోటీ చేసిన పవన్ కల్యాణ్ చిత్తుగా ఓడిపోయారని గుర్తు చేశారు. 2024లో ఒంటరిగా పోటీ చేయకుండా చంద్రబాబునాయుడుతో పొత్తు పెట్టుకొని గెలిచి, పదవి తెచ్చుకున్నారని, పొత్తు లేకుండా ఒంటరిగా పోటీ చేస్తే పవన్ సత్తా ఏమిటో తెలిసేదన్నారు. తెలంగాణ ప్రజలదిష్టి తగిలి గోదావరి ప్రాంతం ఆగమైపోయిందని మాట్లాడటం కరెక్ట్ కాదన్నారు.
పదిహేనేండ్ల తర్వాత సీఎం అవుతానంటున్న పవన్ కల్యాణ్.. 70 ఏండ్ల వయసులో సీఎం అయి చేసేదేముంటుందని ఎద్దేవా చేశారు. అప్పటిదాకా ఎదురుచూడడం ఎందుకు వచ్చే ఎన్నికల్లో ఒంటరిగా పోటీ చేసి గెలవాలని సవాల్‌ చేశారు. ఏపీలో జగన్‌ గెలిస్తే టీడీపీ, జనసేన, బీజేపీ వాళ్లంతా హైదరాబాద్ కు వచ్చి తలదాచుకుంటారని, టీడీపీ గెలిస్తే వైసీపీ వాళ్లు హైదరాబాద్‌‌‌‌లో దాక్కుంటారని ఎద్దేవా చేశారు.
రాంచరణ్‌, అల్లుఅర్జున్‌ తెలంగాణ అమ్మాయిలనే పెండ్లి చేసుకున్నారని గుర్తు చేశారు. సినిమా టిక్కెట్ ధరలు పెంచాలంటే అందులో 20 శాతాన్ని సినీ కార్మికులకు ఇవ్వాలన్న సీఎం రేవంత్‌‌‌‌రెడ్డి నిర్ణయానికి హ్యాట్యాప్‌ అని చెప్పారు.
