- ఎమ్మెల్యే రసమయి బాలకిషన్
తిమ్మాపూర్, వెలుగు : గత ప్రభుత్వాల హయాంలో పేదలు గుడిసెల్లో జీవించారని, తాను ఎమ్మెల్యే అయ్యాకనే వారికి ఇండ్లు, ఇండ్ల స్థలాలకు పట్టాలు వచ్చాయని ఎమ్మెల్యే రసమయి బాలకిషన్ అన్నారు. మంగళవారం తిమ్మాపూర్ మండలం మొగిలిపాలెం, నేదునూర్ గ్రామాల్లో పలు అభివృద్ధి కార్యక్రమాలను ఆయన ప్రారంభించారు. ఈ సందర్భంగా ఎమ్మెల్యే మాట్లాడుతూ ఏ ప్రభుత్వాలు ఇవ్వని పథకాలను కేసీఆర్ ప్రభుత్వం అమలు చేస్తోందన్నారు. కార్యక్రమంలో నేదునూర్ సర్పంచ్ శంకర్, ఎంపీటీసీ కొమురయ్య, సర్పంచుల సంఘం మండలాధ్యక్షుడు జితేందర్ రెడ్డి, వైస్ఎంపీపీ ల్యాగల వీరారెడ్డి, లీడర్లు దేవేందర్ రెడ్డి, సర్పంచులు వెంకటేశ్వరరావు, అంజయ్య పాల్గొన్నారు.
కాగా మొగిలిపాలెంలో అభివృద్ధి పనుల శంకుస్థాపన సందర్భంగా స్థానిక సర్పంచ్ సుస్మిత రెడ్డికి సమాచారం ఇవ్వలేదు. దీనిపై ఆమె మాట్లాడుతూ తాను ప్రతిపక్ష పార్టీకి చెందిన సర్పంచ్ కావడం వల్లే తనను పిలవకుండా అవమానించారని ఆరోపించారు. ఎమ్మెల్యేకు సమస్య చెప్పుకునేందుకు వస్తే పోలీసులు తమను నెట్టేశారని కాంగ్రెస్ ఎస్సీ సెల్ మండలాధ్యక్షుడు రెడ్డిగారి రాజుతోపాటు పలువురు లీడర్లు ఆరోపించారు. నేదునూర్ గ్రామంలో పవర్ ప్లాంట్ కోసం భూములు కోల్పోయి జీవనోపాధి లేక గ్రామస్తులు ఇబ్బందులు పడుతున్నారని ఆరోపించారు.
