ఆర్మీ.. క్రమశిక్షణకు అసలు పేరు. దేశభక్తికి మారుపేరు. పగలు, రాత్రి; ఎండా, వాన; చలి, గిలి… లెక్కచే యకుండా బోర్డర్లో కాపు కాస్తారు. శత్రువుల నుంచి దేశాన్ని కాపాడ తారు. నెలల పాటు ఫ్యామిలీకి దూరంగా గడపాల్సి వచ్చినా ఆ బాధను గుండెల్లోనే దాచుకుంటారు. అయితే ఈ ఒత్తిడితో మానసికంగా కొంత తేడా రావొచ్చు. అందుకే, సైకలాజికల్ హెల్త్ విషయంలో శ్రద్ధ తీసుకోవాలని ఆర్మీ చెబుతోంది.
రూల్స్ గురించి మాట్లాడుకోవాల్సి వస్తే ముందుగా మిలటరీనే ఉదాహరణగా చూపిస్తారు. ‘మిలటరీ రూల్స్ తర్వాతే ఏవైనా..’ అని అంటుంటారు. అక్కడ అంత కఠినంగా, క్రమశిక్షణగా వ్యవహరిస్తారు. దేశ ప్రజలు ‘జై జవాన్’ అని సెల్యూట్ కొట్టేలా సైనికులు ఆదర్శంగా ఉండాలంటే ఆ మాత్రం స్ట్రిక్ట్నెస్లో తప్పు లేదనేది మెజారిటీ అభిప్రాయం. దానికి తగ్గట్లే ఆర్మీ ఎప్పటికప్పుడు కొత్త రూల్స్తో సోల్జర్స్ని తీర్చిదిద్దుతోంది. ఇందులో భాగంగా కొన్ని రూల్స్ని తాజాగా ప్రవేశపెట్టింది. కొత్త నిబంధనల ప్రకారం లెఫ్టినెంట్ కల్నల్స్.. మెంటల్ హెల్త్ని 100 శాతం కాపాడుకోవాలి. ఆల్కహాల్ లేదా మరేరకమైన మత్తు పదార్థాల వల్లనైనా కల్నల్స్ మానసిక ఆరోగ్యం పాడైతే వారికి ‘టైమ్ స్కేల్ కల్నల్స్’గా ప్రమోషన్ ఇవ్వబోమని ఆర్మీ తేల్చి చెప్పింది. దేశ రక్షణకు సంబంధించి ఎంత గొప్ప సేవలందించినా ఇలాంటి రిమార్క్ వస్తే ఆ సేవలన్నీ బూడిదలో పోసిన పన్నీరే అవుతాయని హెచ్చరించింది. మందు తాగే ముందు ఈ విషయాన్ని గుర్తుంచుకోవాలని, హద్దుల్లో ఉండాలని సూచించింది.
పాతికేళ్లకుపైగా సర్వీస్ ఉంటేనే..
లెఫ్టినెంట్ కల్నల్స్ 16–18 ఏళ్ల సర్వీసు పూర్తి చేస్తేనే కల్నల్స్గా ప్రమోషన్ పొందగలుగుతారు. ఒక్కో సారి ఈ రూల్ పాటించినా వేకెన్సీలు లేనప్పుడు, ప్రమోషన్ బోర్డ్ ముందు ఫెయిల్ అయినప్పుడు ప్రమోషన్ రాదు. అలాంటి సందర్భాల్లో 26 ఏళ్ల సర్వీసు కంప్లీట్ అయిన లెఫ్టినెంట్ కల్నల్స్కి ‘టైమ్–స్కేల్ (టీఎస్) కల్నల్స్’ అనే స్పెషల్ ర్యాంక్ ఇస్తారు. ఆయా ఆర్మీ ఆఫీసర్ల ర్యాంకుల ముందు ఇలా ‘టీఎస్’ అనే లెటర్స్ రాయాలంటే సైకలాజికల్ ఫిట్నెస్ ఉండాలని సైన్యం కొత్తగా కండిషన్ పెట్టింది. సవరించిన రూల్స్ని ఆర్మీలోని పర్సనల్ అండ్ సర్వీసెస్ డిపార్ట్మెంట్ ఇటీవలే జారీ చేసింది. అయితే లెఫ్టినెంట్ కల్నల్స్ మానసిక ఆరోగ్యం దెబ్బతినటానికి వేరే కారణాలు గనుక ఉన్నట్లయితే… ప్రమోషన్కి ఆల్కహాల్ అలవాటుకి లింక్ ఉండదని స్పష్టం చేసింది. ఇంటి వద్ద పరిస్థితులు బాగోలేనప్పుడు, కుటుంబ సభ్యులను కోల్పోయినప్పుడు, పోస్ట్–ట్రామాటిక్ స్ట్రెస్ డిజార్డర్ (పీటీఎస్డీ) తలెత్తినప్పుడు మానసికంగా కుంగిపోతే… ‘టైమ్–స్కేల్ (టీఎస్) కల్నల్స్’ ప్రమోషన్పై నిషేధం ఉండదని ఆర్మీ టాప్ ఆఫీసర్ ఒకరు చెప్పారు. తగిన ప్రూఫ్ చూపిస్తే సర్వీస్ రూల్స్ ప్రకారం ప్రమోషన్ లభిస్తుందన్నారు.
ప్రమోషన్ రాకుండానే రిటైర్ అయ్యే ప్రమాదం..
ఆర్మీ ఆఫీసర్ల మెంటల్ హెల్త్ని ఐదు పాయింట్ల సైకలాజికల్ స్కేల్తో నిర్ధారిస్తారు. ఇందులో పాయింట్లు ఎస్1 నుంచి ఎస్5 వరకు ఉంటాయి. వీటిని మిలటరీ సైకియాట్రిస్టులు నిర్ణయిస్తారు. ఎస్1 అంటే ఫుల్ ఫిట్నెస్తో ఉన్నట్లు లెక్క. ఎస్5 అంటే ఎలాంటి ప్రమోషన్కీ అర్హత పొందని పరిస్థితిలో ఉన్నాడని అర్థం. ఎస్2 పాయింట్ సంపాదించినా (మోతాదుకు మించి ఆల్కహాల్ సేవించినా లేక వేరే మత్తు పదార్థం తీసుకున్నా) పదోన్నతి అవకాశాన్ని కోల్పోతాడు. ఎస్2 పాయింట్ వచ్చిన ఆఫీసర్కి యాన్యువల్ కాన్ఫిడెన్షియల్ రిపోర్ట్లు (ఏసీఆర్లు) ఎంత బాగా ఉన్నా పరిగణనలోకి తీసుకోరు. డ్యూటీ పెర్ఫార్మెన్స్, కంటి చూపు, వినికిడి, పూర్తి స్థాయి శారీరక ఆరోగ్యం తదితర ఫిట్నెస్లను తెలిపే రికార్డులేవీ పనికి రావు. సైకలాజికల్ హెల్త్ పరంగా లెఫ్టినెంట్ కల్నల్స్ ఎస్2 స్టేజ్కి దిగజారకూడదు. రిటైరయ్యే వరకు ఒక్క ప్రమోషన్ కూడా పొందలేరు.
ఆర్మీలో ప్రమోషన్ల నిచ్చెన
ఆర్మీలో ఐదు స్థాయిలు ఉంటాయి. అవి.. లెఫ్టినెంట్, కెప్టెన్, మేజర్, లెఫ్టినెంట్ కల్నల్, కల్నల్. మొదటి నాలుగు ర్యాంకులను మిలటరీలో గడిపిన కాలాన్ని బట్టి ఇస్తారు. లెఫ్టినెంట్గా సర్వీసులో చేరి రెండేళ్లు పూర్తి చేస్తే కెప్టెన్ అవుతారు. ఆరేళ్ల అనంతరం మేజర్గా ప్రమోషన్ పొందుతారు. 13 ఏళ్ల సర్వీసు తర్వాత లెఫ్టినెంట్ కల్నల్గా పదోన్నతి లభిస్తుంది. ఉన్నత పదవుల నిచ్చెనలో పైకి వెళుతున్నకొద్దీ ఖాళీలను బట్టి ప్రమోషన్లు వస్తాయి. కల్నల్ అయిన వ్యక్తి సహజంగా బ్రిగేడియర్ ర్యాంక్ పొందటం లేదా రిటైర్ కావటం జరుగుతుంది.
లెఫ్టినెంట్ కల్నల్స్ రెండు రకాల ప్రమోషన్లు పొందుతారు. ఒకటి.. సెలెక్షన్ గ్రేడ్ ప్రమోషన్. రెండు.. టైమ్ స్కేల్ ప్రమోషన్. 16–18 ఏళ్ల కమిషన్డ్ సర్వీస్ పూర్తి చేసినవారు సెలెక్షన్ గ్రేడ్ ప్రమోషన్ పొందొచ్చు. అయితే ఈ దశలో ప్రమోషన్ బోర్డు ముందు హాజరు కావాలి. ఈ రూట్లో 50 శాతం మంది లెఫ్టినెంట్ కల్నల్సే కల్నల్స్గా పదోన్నతి పొందే ఛాన్స్ వస్తుంది. మిగతా 50 శాతం మందికి రాదు. ఇలాంటివారికి 26 ఏళ్ల సర్వీస్ అనంతరం టైమ్ స్కేల్ కల్నల్స్గా హయ్యర్ ర్యాంక్ ఇస్తారు. అది కూడా ఏసీఆర్లు, మెడికల్ ఫిట్నెస్లు బాగుంటేనే.
సైకలాజికల్ హెల్త్ చాలా ముఖ్యం
సాయుధ బలగాల్లో పనిచేసేవారికి సైకలాజికల్ హెల్త్ అనేది చాలా ముఖ్యం. సైనికులు గడ్డ కట్టే చలిలో, జోరు వానలో, మండే ఎండలో, ఎడారుల్లో, అటవీ ప్రాంతాల్లో.. చాలా కష్టమైన వాతావరణాల్లో, తీవ్ర ఒత్తిడిలో పని చేయాల్సి ఉంటుంది. ఈ పరిస్థితులను తట్టుకోలేక కొద్ది మంది సూసైడ్కి పాల్పడుతున్నారు. 2018లో 104 మంది మిలటరీ సిబ్బంది ఆత్మహత్య చేసుకున్నట్లు కేంద్రం ఇటీవల పార్లమెంట్కి తెలిపింది. ఈ నేపథ్యంలో ఆఫీసర్ల ఆరోగ్యాన్ని, ఫిట్నెస్ని దృష్టిలో పెట్టుకొనే కొత్త రూల్స్ తెచ్చామని ఆర్మీ వివరణ ఇచ్చింది.
