న్యూఢిల్లీ: పహల్గాం ఉగ్రదాడికి కౌంటర్గా భారత్ చేపట్టిన ఆపరేషన్ సిందూర్ దెబ్బకు పాకిస్తాన్ ఉగ్ర సంస్థలు సరిహద్దు నుంచి దుకాణం సర్దేశాయని బోర్డర్ సెక్యూరిటీ ఫోర్స్ (BSF) తెలిపింది. భారత్ భయానికి బోర్డర్ నుంచి ఉగ్ర శిబిరాలను పాకిస్తాన్ లోపలికి తరలించాయని వెల్లడించింది. ప్రభుత్వం ఆపరేషన్ సిందూర్-2 ప్రారంభించాలని నిర్ణయించుకుంటే శత్రువుపై దాడికి భారత దళాలు సంసిద్ధంగా ఉన్నాయని స్పష్టం చేసింది.
బీఎస్ఎఫ్ డీఐజీ విక్రమ్ కున్వర్ మీడియాతో మాట్లాడుతూ.. ఆపరేషన్ సిందూర్ సమయంలో సరిహద్దు వెంబడి ఉన్న అనేక ఉగ్రవాద లాంచ్‌ప్యాడ్‌లను బీఎస్ఎఫ్ ధ్వంసం చేసిన తర్వాత పాకిస్తాన్ ప్రభుత్వం ఉగ్ర శిబిరాలను ఇతర ప్రాంతాలకు తరలించిందని తెలిపారు. దాదాపు 12 లాంచ్‌ప్యాడ్‌లు సియాల్‌కోట్, జఫర్వాల్ ప్రాంతాల నుంచి పని చేస్తున్నాయని వెల్లడించారు.
సరిహద్దుకు దూరంగా ఉన్న ఇతర ప్రాంతాలలో దాదాపు 60 లాంచ్‌ప్యాడ్‌ల నుంచి ఉగ్ర కార్యకలాపాలు సాగుతున్నాయని చెప్పారు. లష్కరే తోయిబా, జైషే మహ్మద్ ఉగ్రవాద సంస్థలు గతంలో వేర్వేరు ప్రాంతాల నుంచి కార్యకలాపాలు నిర్వహించేవని, ఇప్పుడు మిశ్రమ గ్రూపుల్లో ఉగ్రవాదులకు శిక్షణ ఇస్తున్నాయని తెలిపారు.
యుద్ధాలలో బీఎస్ఎఫ్కు మంచి అనుభవం: ఐజీ ఆనంద్
బీఎస్ఎఫ్కు యుద్ధాలలో మంచి అనుభవం ఉందని ఐజీ ఆనంద్ అన్నారు. 1965, 1971, 1999 కార్గిల్ యుద్ధం లేదా ఆపరేషన్ సిందూర్ ఏ యుద్ధం చూసుకున్నా.. అన్ని రకాల యుద్ధాలలోనూ బీఎస్ఎఫ్కు మంచి అనుభవం ఉందన్నారు. అది సాంప్రదాయ యుద్ధమైనా.. హైబ్రిడ్ యుద్ధమైనా మేము సిద్ధంగా ఉన్నామని స్పష్టం చేశారు. ప్రభుత్వం ఆపరేషన్ సిందూర్‌ను తిరిగి ప్రారంభించాలని నిర్ణయించుకుంటే బీఎస్ఎఫ్ రెడీగా ఉందని తెలిపారు. ఈ సారి మొదటి సారి కంటే ఎక్కువగా శత్రువుకు నష్టం కలిగిస్తామని ఆసక్తికర వ్యాఖ్యలు చేశారు.
2025, ఏప్రిల్ 22న ప్రకృతి అందాలకు నిలయమైన జమ్ము కాశ్మీర్లో ఉగ్ర దాడి జరిగిన విషయం తెలిసిందే. బైసరన్ మైదానం ప్రాంతంలోని పహల్గాంలో ప్రకృతి అందాలు వీక్షించేందుకు వచ్చిన పర్యాటకులపై పాక్ ప్రేరేపిత ఉగ్రమూకలు బుల్లెట్ల వర్షం కురిపించారు. ఉగ్రవాదుల తూటాలకు 26 మంది టూరిస్టులు బలయ్యారు. కేవలం ఒక వర్గానికి చెందిన వారినే లక్ష్యంగా చేసుకుని ఉగ్రవాదులు ఈ దాడులకు పాల్పడ్డారు. పహల్గాం టెర్రర్ ఎటాక్కు కౌంటర్గా ఇండియా ఆపరేషన్ సిందూర్ చేపట్టింది. ఆపరేషన్ సిందూర్లో భాగంగా పాక్, పీవోకేలోని ఉగ్రవాద స్థావరాలను ఎక్కడికక్కడ నేలమట్టం చేశాయి భారత దళాలు.
