- బాయ్కాట్ అంశంపై ఐసీసీతో పాక్ బోర్డు చర్చలు
- అనివార్య పరిస్థితుల వల్లే ఇండియాతో ఆడలేమని వెల్లడి
- వాణిజ్య నష్టాలకు బాధ్యత వహించాలని ఐసీసీ హెచ్చరిక
న్యూఢిల్లీ: టీ20 వరల్డ్ కప్లో భాగంగా ఈ నెల 15న కొలంబోలో జరగాల్సిన ఇండో–-పాక్ హైఓల్టేజ్ పోరును బాయ్కాట్ చేయాలన్న నిర్ణయంపై పాకిస్తాన్ క్రికెట్ బోర్డు (పీసీబీ) యూ-టర్న్ తీసుకునే సూచనలు కనిపిస్తున్నాయి. తమ ప్రభుత్వ ఆదేశాల మేరకు ఇండియాతో ఆడబోమని ప్రకటించిన పీసీబీ ఇప్పుడు ఐసీసీతో సంప్రదింపులు మొదలుపెట్టింది. నిబంధనలను అతిక్రమిస్తే ఐసీసీ నుంచి ఎదురయ్యే తీవ్రమైన ఆర్థిక, చట్టపరమైన పర్యవసానాలను వివరిస్తూ ఐసీసీ ఇప్పటికే పీసీబీకి ఈ మెయిల్ ద్వారా స్పష్టమైన సమాచారం అందించింది.
తమ ప్రభుత్వం జారీ చేసిన నిషేధాజ్ఞల వల్ల టీమిండియాతో ఆడలేకపోతున్నామని, దీనిని అనివార్య పరిస్థితిగా (ఫోర్స్ మజూర్) గుర్తించాలని పీసీబీ కోరుతోంది. ఈ ఫోర్స్ మజూర్ నిబంధన ప్రకారం.. యుద్ధం, ప్రకృతి వైపరీత్యాలు లేదా ప్రభుత్వాల ఆకస్మిక నిర్ణయాల వంటి నియంత్రించలేని కారణాల వల్ల మాత్రమే మినహాయింపు లభిస్తుంది. అయితే, పాక్ వాదనను ఐసీసీ దీనిని తోసిపుచ్చింది. ఇండియాతో మ్యాచ్ ఆడే విషయంలో ప్రభుత్వం నుంచి మినహాయింపు పొందేందుకు బోర్డు పరంగా చేసిన ప్రయత్నాలేమిటో నిరూపించాలని డిమాండ్ చేసింది.
ఒకే టోర్నీలో మిగతా జట్లతో ఆడుతూ కేవలం ఇండియాతోనే ఆడకపోవడం నిబంధనలకు విరుద్ధమని స్పష్టం చేసింది. ఈ మొండివైఖరి వల్ల కలిగే వాణిజ్య నష్టాలకు పీసీబీనే పూర్తి బాధ్యత వహించాల్సి ఉంటుందని, ఇది భవిష్యత్తులో పాక్ క్రికెట్ ఉనికికే ప్రమాదకరమని ఐసీసీ హెచ్చరించింది. ఐసీసీ నుంచి వచ్చిన కఠినమైన హెచ్చరికల నేపథ్యంలో, పీసీబీ ఇప్పుడు ఘర్షణ కంటే సంప్రదింపులకే మొగ్గు చూపుతున్నట్టు తెలుస్తోంది.
