న్యూఢిల్లీ: ఆపరేషన్ సిందూర్ సమయంలో భారతదేశం గణనీయమైన సంయమనం ప్రదర్శించిందని కేంద్ర రక్షణ శాఖ మంత్రి రాజ్నాథ్ సింగ్ అన్నారు. భారత దళాలు పాకిస్తాన్ కేంద్రంగా ఉన్న ఉగ్రవాద శిబిరాలను ఎక్కడికక్కడ నేలమట్టం చేశాయని తెలిపారు. ఆపరేషన్ సిందూర్ తర్వాత కూడా పాకిస్తాన్ తమ మొండి వైఖరితో సరిహద్దులో శాంతిని నెలకొల్పలేదని విమర్శించారు.
పాకిస్తాన్తో ఉద్రిక్తతల నేపథ్యంలో కంట్రీ వైడ్గా చేపట్టిన మాక్ డ్రిల్స్ సమయంలో దేశ ప్రజలు తాము ప్రజా సేవకులమని చూపించారని కొనియాడారు. భవిష్యత్తులో తలెత్తే ఏ పరిస్థితికైనా ప్రతి ఒక్కరూ మానసికంగా సిద్ధంగా ఉండాలని ఆసక్తికర వ్యాఖ్యలు చేశారు. కాగా, భవిష్యత్తులో తలెత్తే ఏ పరిస్థితికైనా ప్రతి ఒక్కరూ మానసికంగా సిద్ధంగా ఉండాలని రాజ్నాథ్ సింగ్ చేసిన కామెంట్ కొత్త చర్చకు దారి తీసింది.
రక్షణ శాఖ మంత్రి వ్యాఖ్యలు ఆపరేషన్ సిందూర్ 2.0 ఊహాగానాలకు మరింత ఆజ్యం పోశాయి. ఆపరేషన్ సిందూర్ 2.0కి సిద్ధంగా ఉన్నామని బార్డర్ సెక్యూరిటీ ఫోర్స్ (BSF) ప్రకటించిన కొన్ని నిమిషాల్లోనే.. భవిష్యత్ పరిణామాలకు సిద్ధంగా ఉండాలని రాజ్నాథ్ సింగ్ పేర్కొనడం తీవ్ర చర్చనీయాంశంగా మారింది. బీఎస్ఎఫ్, రాజ్నాథ్ సింగ్ వ్యాఖ్యలతో కేంద్ర ప్రభుత్వం ఆపరేషన్ సిందూర్ 2.0కి సిద్ధమవుతోందా..? అనే అనుమానాలు వ్యక్తం అవుతున్నాయి.
2025లో బోర్డర్ సెక్యూరిటీ ఫోర్స్ (BSF) సాధించిన విజయాలు, ఆపరేషన్ సిందూర్‌లో పోషించిన చురుకైన పాత్ర గురించి శనివారం (నవంబర్ 29) విలేకరుల సమావేశంలో బీఎస్ఎఫ్ వెల్లడించింది. ఆపరేషన్ సిందూర్ సమయంలో సరిహద్దు వెంబడి ఉన్న అనేక ఉగ్రవాద లాంచ్‌ప్యాడ్‌లను బీఎస్ఎఫ్ ధ్వంసం చేసిన తర్వాత పాకిస్తాన్ ప్రభుత్వం ఉగ్ర శిబిరాలను ఇతర ప్రాంతాలకు తరలించిందని తెలిపింది. దాదాపు 12 లాంచ్‌ప్యాడ్‌లు సియాల్‌కోట్, జఫర్వాల్ ప్రాంతాల నుంచి పని చేస్తున్నాయని వెల్లడించింది. సరిహద్దుకు దూరంగా ఉన్న ఇతర ప్రాంతాలలో దాదాపు 60 లాంచ్‌ప్యాడ్‌ల నుంచి ఉగ్ర కార్యకలాపాలు సాగుతున్నాయని చెప్పింది.
లష్కరే తోయిబా, జైషే మహ్మద్ ఉగ్రవాద సంస్థలు గతంలో వేర్వేరు ప్రాంతాల నుంచి కార్యకలాపాలు నిర్వహించేవని, ఇప్పుడు మిశ్రమ గ్రూపుల్లో ఉగ్రవాదులకు శిక్షణ ఇస్తున్నాయని తెలిపింది. ప్రభుత్వం ఆపరేషన్ సిందూర్-2 ప్రారంభించాలని నిర్ణయించుకుంటే శత్రువుపై దాడికి బీఎస్ఎఫ్ సంసిద్ధంగా ఉందని స్పష్టం చేసింది. బీఎస్ఎఫ్ ఈ ప్రకటన చేసిన నిమిషాల్లోనే.. భవిష్యత్తులో తలెత్తే ఏ పరిస్థితికైనా ప్రతి ఒక్కరూ మానసికంగా సిద్ధంగా ఉండాలని డిఫెన్స్ మినిస్టర్ రాజ్నాథ్ సింగ్ పేర్కొనడం ఆపరేషన్ సిందూర్ 2.0 ఊహాగానాలకు ఆజ్యం పోశాయి.
