నడుములు పోతున్నయ్​.. బండ్లు ఖరాబైతున్నయ్​..

• నడుములు పోతున్నయ్​.. బండ్లు ఖరాబైతున్నయ్​..
• రంబుల్​ స్ట్రిప్స్​ తీసెయ్యండి
• ట్విట్టర్​లో మంత్రి కేటీఆర్​, జీహెచ్​ఎంసీకి విజ్ఞప్తులు
• ఫ్లై ఓవర్లు, ప్రధాన జంక్షన్లలో ఇంచు ఎత్తులో  స్ట్రిప్స్​
• అమెరికా వంటి దేశాల్లో అర ఇంచుతోనే స్ట్రిప్స్​
• బండ్లు, కార్ల పాడై వాహనదారుల జేబులకు చిల్లు 
• ప్రెగ్నెంట్లు, దివ్యాంగులకు తీవ్ర ఇబ్బందులు

హైదరాబాద్, వెలుగు : రంబుల్​ స్ట్రిప్స్​.. రయ్యిన దూసుకెళ్లే బండ్లకు కళ్లెం వేసేందుకు, ప్రమాదాలను తగ్గించేందుకు హైదరాబాద్​ రోడ్ల మీద వేసిన మినీ స్పీడ్​ బ్రేకర్లివి. ఉద్దేశం మంచిదే అయినా.. వాటితో జనం గోసపడుతున్నరు. స్పీడు తగ్గుడేమో గానీ.. ఒళ్లు గుల్ల అయిపోతున్నది.. బండ్లు ఖరాబైతున్నయ్... మామూలు రోడ్ల నుంచి ఫ్లై ఓవర్ల దాకా  సిటీ మొత్తం ఇదే సమస్య. అంగుళం ఎత్తుతో స్ట్రిప్స్​ వేయడం వల్ల వేగంగా వెళ్లే బైకులు షేక్​ అయిపోయి.. వాటిని నడిపేవారి గుండెలు బయటకొచ్చినంత పనైతున్నది.

వెన్నుపూసలు వణికిపోతున్నాయి. మరీ ముఖ్యంగా బైక్స్​, స్కూటర్స్​ నడిపే గర్భిణులు, దివ్యాంగులకు రంబుల్​ స్ట్రిప్స్​ప్రాబ్లమ్స్​ క్రియేట్​ చేస్తున్నాయి. బండిని ఎంత స్లో చేసినా.. రంబుల్​ స్ట్రిప్స్​ ఎత్తు ఎక్కువగా ఉండడం వల్ల వాహనదారుల బాడీపై తీవ్ర ప్రభావం పడుతోంది. దీంతో కొన్ని స్కూటర్స్​, బైక్స్​ స్కిడ్​ అవుతున్నాయి. బాడీనే కాదు.. బండ్లు, కార్ల సస్పెన్షన్లు ఖరాబయ్యి వాటి రిపేర్లకు వేలకు వేలు ఖర్చవుతోంది. దీనిపై పలువురు నెటిజన్లు ట్విట్టర్​ వేదికగా గ్రేటర్ హైదరాబాద్​ మున్సిపల్​ కార్పొరేషన్​ (జీహెచ్​ఎంసీ)పై ఆగ్రహం వ్యక్తం చేస్తున్నారు. నగరంలోని రోడ్లపై నుంచి రంబుల్​ స్ట్రిప్స్​ను తీసెయ్యాలని డిమాండ్​చేస్తున్నారు. ఈ పోస్టులను  మంత్రి కేటీఆర్​కూ ట్యాగ్​ చేస్తున్నారు. రంబుల్​ స్ట్రిప్స్​ స్థానంలో ఒకట్రెండు స్పీడ్​ బ్రేకర్లు వేసినా నష్టం లేదని, స్పీడ్​ను తగ్గించేందుకు ఇతర మార్గాలను చూడాలని సూచిస్తున్నారు.  సిటీలోని ఫ్లై ఓవర్ల పైనుంచి వెళ్లడం కన్నా గుంతల రోడ్డు మీద వెళ్లడమే నయమని అంటున్నారు. 

హైవేల మీద పెట్టాల్సిన స్ట్రిప్స్​..

రంబుల్​ స్ట్రిప్స్ హైవేల మీద ఓవర్​ స్పీడ్​తో వెళ్తున్న వెహికల్స్​ను కంట్రోల్​ చేసేందుకు ఉద్దేశించినవి. ఇప్పటికే హైవేల మీద ఈ తెల్లటి చారల స్ట్రిప్స్​ వేశారు. వెహికల్స్​ రద్దీ, వేగం బాగా పెరిగినందున  సిటీలోనూ వీటిని వేస్తున్నారు. మూడేండ్ల కిందట వేగంతో దూసుకొచ్చిన కారు బయో డైవర్సిటీ ఫ్లై ఓవర్​పై నుంచి పడిపోవడంతో ఓ మహిళ చనిపోయింది. ఫ్లై ఓవర్​ను ఓపెన్​ చేసిన కొన్నాళ్లకే ఈ ప్రమాదం జరగడం.. అప్పటికి మూల మలుపుల్లో ఎలాంటి సైన్​ బోర్డ్స్​ లేకపోవడంతో రాష్ట్ర ప్రభుత్వం నష్ట నివారణ చర్యలకు ఉపక్రమించింది. ఈ క్రమంలోనే ప్రమాదాలను తగ్గించేందుకు జీహెచ్​ఎంసీ అధికారులు రోడ్లు, ఫ్లై ఓవర్లపై రంబుల్ స్ట్రిప్స్​ వేసే ఐడియాను అమలు చేస్తున్నారు.    

పావు కిలోమీటరు డిస్టెన్స్​లో నాలుగైదు చోట్ల..  

రంబుల్​ స్ట్రిప్స్​ ఏర్పాటు చేసే క్రమంలో శాస్త్రీయత లోపించిందనే విమర్శలు వినిపిస్తున్నాయి. ఒక్కో చోట ఒక్కో ఎత్తులో ఉంటుండడం.. వాటిపై జనానికి అవగాహన లేకపోవడంతో ఇబ్బందులు ఎదురవుతున్నాయి. కొన్ని చోట్ల తక్కువ ఎత్తుతో ఐదారు రంబుల్​ స్ట్రిప్స్​ వేస్తుంటే.. మరికొన్ని చోట్ల మాత్రం ఎక్కువ ఎత్తుతో పదికిపైగా రంబుల్​ స్ట్రిప్స్​ను వేస్తున్నారు. ఇటీవలే ప్రారంభించిన నాగోల్​ ఫ్లై ఓవర్​నే తీసుకుంటే.. దాని స్టార్టింగ్​, ఎండింగ్​లలో ఒకేచోట పదిహేను వరకు స్ట్రిప్స్​ను వేశారు. కేవలం పావు కిలోమీటరు డిస్టెన్స్​లోపల  నాలుగైదు చోట్ల రంబుల్​స్ట్రిప్స్​ను వేయడం వల్ల వాహనదారులు ఇబ్బందిపడుతున్నరు. ఇది ఒక్క నాగోల్​ ఫ్లైఓవర్​కే పరిమితమైపోలేదు. నగరంలో చాలాచోట్ల వాటిని ఏర్పాటు చేశారు.

బైకులే కాదు.. బస్సులు, కార్లలో  వెళ్లినా..

రోడ్డు  ప్రమాదాలు జరిగే అవకాశమున్న మూల మలుపులు, జంక్షన్లు, యూ టర్న్​లకు సమీపంలో మాత్రమే రంబుల్​ స్ట్రిప్స్​ను వేయాల్సి ఉన్నా.. ఎక్కడ పడితే అక్కడ వేయడం వల్ల ఇబ్బంది కలుగుతోంది. ఇలాంటి స్ట్రిప్స్​ మీద నుంచి వెళ్తే ప్రెగ్నెన్సీ తో ఉన్న మహిళలకు ఇబ్బంది  కలిగే అవకాశం ఉంటుందని డాక్టర్లు హెచ్చరిస్తున్నారు. బైక్స్, స్కూటర్స్​ నడిపే వారికి  వెన్నుపూస, డిస్క్​వంటి ప్రాబ్లమ్స్​ వస్తాయని అంటున్నారు. బస్సులో వెళ్లినా, కార్లో వెళ్లినా రంబుల్​ స్ట్రిప్స్​ వల్ల ఏర్పడే వైబ్రేషన్​ తీవ్ర స్థాయిలోనే ఉంటోంది. దీనివల్లే తన కారు సస్పెన్షన్​ పాడైపోయి రూ.60 వేలు ఖర్చు పెట్టాల్సి వచ్చిందని ఓ బాధితుడు వాపోయాడు.

అమెరికాలో రంబుల్​ స్ట్రిప్స్​ వేయడం ఆపేశారు 

రోడ్డును కొద్దిగా తవ్వి సిమెంట్​తో రంబుల్​ స్ట్రిప్స్​ అచ్చుపోస్తుంటారు. లేదంటే  రోడ్డు మీదే వైట్​ పెయింట్​తో నేరుగా స్ట్రిప్స్​ వేస్తారు. అమెరికా వంటి దేశాల్లో రంబుల్​ స్ట్రిప్స్​ ఎత్తు పావు ఇంచు నుంచి అర ఇంచులోపే ఉండాలనే నిబంధనలు ఉన్నాయి. ఇక వెడల్పునూ 2 నుంచి 12 అంగుళాల వరకే ఫిక్స్​ చేశారు. అమెరికాలో హైవేల మీదే వాటిని ఏర్పాటు చేస్తుంటారు. గతంలో సిటీల లోపల రంబుల్ ​స్ట్రిప్స్​ వేసినప్పుడు..అక్కడి ప్రజలు అభ్యంతరాలు వ్యక్తం చేసిన సందర్భాలున్నాయి. దీంతో అమెరికాలో సిటీల లోపల, రెసిడెన్షియల్​ ఏరియాలకు దగ్గర్లో వాటిని వేయడం ఆపేశారు.