- మే నెలలో 4.25 శాతంగా నమోదు
రిటైల్ ఇన్ఫ్లేషన్ (ధరల పెరుగుదల) ఈ ఏడాది మే నెలలో 25 నెలల కనిష్ట స్థాయి 4.25 శాతానికి తగ్గింది. ప్రధానంగా ఆహారం, ఇంధనం ధరలు తగ్గాయి.
న్యూఢిల్లీ: రిటైల్ ఇన్ఫ్లేషన్ (ధరల పెరుగుదల) ఈ ఏడాది మే నెలలో 25 నెలల కనిష్ట స్థాయి 4.25 శాతానికి తగ్గింది. ప్రధానంగా ఆహారం, ఇంధనం ధరలు తగ్గాయి. వినియోగదారుల ధరల సూచీ (సీపీఐ) ఆధారిత ఇన్ఫ్లేషన్ గత ఏడాది ఏప్రిల్లో 4.7 శాతం ఉండగా, గత మే నెలలో 7.04 శాతంగా ఉంది. రిటైల్ ఇన్ఫ్లేషన్ తగ్గడం ఇది వరుసగా నాలుగో నెల. వినియోగదారుల ధరల సూచీ (సీపీఐ) ఆధారిత ఇన్ఫ్లేషన్ ఆర్బీఐ కంఫర్ట్ జోన్లో 6 శాతం కంటే తక్కువగా ఉండడం వరుసగా మూడో నెల. 2021 ఏప్రిల్ తరువాత ఇది ఇంత తక్కువగా ఉండటం తొలిసారి. అప్పుడు సీపీఐ రిటైల్ ఇన్ఫ్లేషన్ 4.23 శాతంగా ఉంది. రిటైల్ ఇన్ఫ్లేషన్ ఇరువైపులా 2 శాతం మార్జిన్తో 4 శాతం వద్ద ఉండేలా చూడాలని ప్రభుత్వం ఆర్బీఐని కోరింది. ఆహార ఇన్ఫ్లేషన్ మే నెలలో 2.91 శాతంగా ఉంది. ఏప్రిల్లో 3.84 శాతం కంటే తక్కువగా ఉంది. సీపీఐలో దాదాపు సగం ఫుడ్ సెగ్మెంట్ నుంచే ఉంటుంది. ఇంధనం, లైట్ ఇన్ఫ్లేషన్ ఏప్రిల్లో 5.52 శాతం నుండి 4.64 శాతానికి తగ్గింది. ఆర్బీఐ గత వారం పాలసీ రేట్లను 6.5 శాతంగా (మార్చలేదు) ఉంచింది. ప్రస్తుత ఆర్థిక సంవత్సరానికి సగటు రిటైల్ ఇన్ఫ్లేషన్ 5.1 శాతం ఉండొచ్చని అంచనా వేసింది.
4.2 శాతం పెరిగిన ఐఐపీ
మాన్యుఫాక్చరింగ్, మైనింగ్ సెక్టార్లలో వృద్ధి వల్ల ఈ ఏడాది ఏప్రిల్లో ఇండెక్స్ ఆఫ్ ఇండస్ట్రియల్ ప్రొడక్షన్ (ఐఐపీ) 4.2 శాతం పెరిగింది. ఇదే ఏడాది మార్చిలో ఐఐపీ 1.7 శాతమే ఉంది. గత ఏప్రిల్లో 6.7 శాతం ఉంది. ఈసారి మానుఫ్యాక్చరింగ్ సెక్టార్ అవుట్పుట్ 4.9 శాతం పెరగగా, పవర్ జెనరేషన్ సెక్టార్ అవుట్పుట్ 1.1 శాతం తగ్గింది. మైనింగ్ అవుట్పుట్ 5.1 శాతం పెరిగింది. క్యాపిటల్ గూడ్స్ సెగ్మెంట్ 6.2 శాతం ఎగిసిందని నేషనల్ స్టాస్టిక్స్ ఆఫీస్ తెలిపింది.