న్యూఢిల్లీ: దేశంలోని ఏడు నగరాల్లో అఫోర్డబుల్ కేటగిరీ ( రూ. 40 లక్షల కంటే తక్కువ ధర) ఇండ్ల అమ్మకాలు- 18 శాతం తగ్గి 46,650 యూనిట్లకు పడిపోయాయి. అంతకు ముందు సంవత్సరం ఇదే కాలంలో బడ్జెట్ ఇండ్ల విక్రయాలు 57,060 యూనిట్లుగా ఉన్నాయి. రియల్ ఎస్టేట్ కన్సల్టెంట్ అనరాక్ రిపోర్ట్ ప్రకారం, మొత్తం ఇండ్ల విక్రయాలలో బడ్జెట్ ఇండ్ల వాటా జనవరి–-జూన్‌‌లో 31 శాతం నుంచి 20 శాతానికి పడిపోయింది. మొత్తం ఇండ్ల విక్రయాలు ఈ ఏడాది జనవరి-–జూన్‌‌లో 1,84,000 యూనిట్ల నుంచి 2,28,860 యూనిట్లకు పెరిగాయి.
కరోనా కారణంగా డిమాండ్లో వచ్చిన మార్పులు, డెవలపర్లు, వినియోగదారులు ఎదుర్కొంటున్న అనేక ఇతర సవాళ్ల కారణంగా మొత్తం అమ్మకాలలో బడ్జెట్ ఇండ్ల వాటా తగ్గిపోయిందని అనరాక్ చైర్మన్ అనుజ్ పురి తెలిపారు. భూమి ధర గణనీయంగా పెరిగిందని పేర్కొన్నారు. తక్కువ మార్జిన్ ఇండ్లను నిర్మించడానికి డెవలపర్లకు భూమి దొరకడం కష్టంగా మారుతున్నదని చెప్పారు. . అంతేగాక హౌసింగ్లోన్లపై వడ్డీరేట్లు ఎక్కువగా ఉండటం కూడా ఒక సమస్య అని వివరించారు.
- ఢిల్లీ–-ఎన్‌‌సీఆర్‌‌లో బడ్జెట్ ఇండ్ల అమ్మకాలు ఈ ఏడాది జనవరి–-జూన్ కాలంలో 8,680 యూనిట్లకు పడిపోయాయి. గత సంవత్సరంలో 14,150 యూనిట్లు అమ్ముడయ్యాయి.
- ముంబై మెట్రోపాలిటన్ ప్రాంతంలో అమ్మకాలు 17,650 యూనిట్ల నుంచి 17,470 యూనిట్లకు స్వల్పంగా తగ్గాయి.
- బెంగళూరులో తక్కువ బడ్జెట్ ఇండ్ల విక్రయాలు 3,990 యూనిట్ల నుంచి 3,270 యూనిట్లకు తగ్గాయి.
- పూణేలో ఈ కేటగిరీలో అమ్మకాలు 9,700 యూనిట్లుగా ఉన్నాయి, గత క్యాలెండర్ సంవత్సరం మొదటి అర్ధభాగంలో 11,240 యూనిట్లు అమ్ముడుపోయాయి.
- హైదరాబాద్‌‌లో బడ్జెట్ ఇండ్ల విక్రయాలు 50 శాతానికి పైగా పడిపోయి 1,460 యూనిట్ల నుంచి 720 యూనిట్లకు తగ్గాయి.
- చెన్నైలో బడ్జెట్ ఇండ్ల సేల్స్ 3,170 యూనిట్ల నుంచి 1,820 యూనిట్లకు తగ్గాయి.
- కోల్‌‌కతాలో వీటి అమ్మకాలు గత ఏడాది ఇదే కాలంలో 5,400 యూనిట్ల నుంచి ఈ ఏడాది జనవరి-–జూన్‌‌లో 4,990 యూనిట్లకు తగ్గాయి.
