న్యూఢిల్లీ: స్మార్ట్ పరికరాల తయారీ సంస్థ శామ్సంగ్ వరుసగా నాలుగో క్వార్టర్లో మనదేశ స్మార్ట్‌‌‌‌ఫోన్ మార్కెట్‌‌‌‌లో 17.2 శాతం వాటాతో మరోసారి మొదటిస్థానంలో నిలిచింది. ఏ, ఎం సిరీస్‌ ఫోన్ల అమ్మకాలు దూసుకెళ్లడంతో ఈ దక్షిణ కొరియా కంపెనీ మార్కెట్చాంపియన్గా నిలిచింది. భారీగా డిస్కౌంట్లు ఇవ్వడం, ఆఫ్లైన్లోనూ అమ్మకాలు పెంచుకోవడం ఇందుకు కారణాలు.
మార్కెట్ పరిశోధన సంస్థ కౌంటర్ పాయింట్ రిపోర్ట్ ప్రకారం.. సెప్టెంబరు క్వార్టర్లో ఐఫోన్ మేకర్ యాపిల్ ఎగుమతులు ఆల్టైం హైకి చేరాయి. ఈసారి ఇది 25 లక్షల యూనిట్లను అమ్మింది. రెడ్మీ 12 సిరీస్‌ ఫోన్లకు బలమైన డిమాండ్ ఉండటం, ఆఫ్‌‌‌‌లైన్ విస్తరణ వల్ల షావోమీ రెండోస్థానంలో నిలిచింది. ఇది 16.6 శాతం మార్కెట్ వాటా దక్కించుకుందని కౌంటర్ పాయింట్ రీసెర్చ్ అనలిస్ట్ శుభమ్ సింగ్ చెప్పారు. ఈ క్వార్టర్లో 5జీ స్మార్ట్‌‌‌‌ఫోన్ షిప్‌‌‌‌మెంట్ల వాటా 53 శాతానికి చేరుకుంది. రూ. 10వేల-–15వేల సెగ్మెంట్లో లాంచ్‌‌‌‌లను పెంచడం ద్వారా ఒరిజినల్ ఎక్విప్మెంట్ మేకర్లు (ఓఈఎంలు) భారీ వృద్ధిని సాధించాయి.
ఈ విభాగంలో 5జీ ఫోన్ల వ్యాప్తి 35 శాతానికి చేరుకుంది. ఇది సంవత్సరం క్రితం కాలంలో 7 శాతంగా ఉంది. 2023 మూడవ క్వార్టర్లో ఓఈఎంలు కొత్త డివైజ్లను లాంచ్ చేయడంపై దృష్టి సారించాయి. రాబోయే పండుగ సీజన్‌‌‌‌కు సిద్ధం కావడానికి తగిన ఏర్పాట్లు చేసుకున్నాయి. పెద్ద ఎత్తున 5జీ ఫోన్లను లాంచ్ చేశాయి. తక్కువ ధరకే అధిక ర్యామ్ గల ఫోన్లను అందించాయని కౌంటర్ పాయింట్ రీసెర్చ్, సీనియర్ రీసెర్చ్ అనలిస్ట్ శిల్పి జైన్ తెలిపారు.
ఖరీదైన ఫోన్లకు మస్తు గిరాకీ..
రూ. 45వేల కంటే ఎక్కువ ధర ఉన్న స్మార్ట్‌‌‌‌ఫోన్‌‌‌‌ల అమ్మకాలు పెరుగుతూనే ఉన్నాయి. తాజా క్వార్టర్లో సులభతరమైన ఫైనాన్సింగ్, ఆఫర్ల కారణంగా అల్ట్రా- ప్రీమియం సెగ్మెంట్ సంవత్సరానికి 44 శాతం వృద్ధిని సాధించింది. అల్ట్రా -ప్రీమియం సెగ్మెంట్లో ఫోల్డబుల్స్‌ ఫోన్లకు ఎక్కువ ఆదరణ ఉంది. ఈ విభాగంలోకి మరిన్ని ఓఈఎంలు వస్తున్నాయి. భవిష్యత్తు వారికి ఆశాజనకంగా కనిపిస్తోంది. ఇటీవల వన్ప్లస్ కూడా ఫోల్డబుల్ ఫోన్ను లాంచ్ చేసింది. ఈసారి యాపిల్ 34 శాతం వార్షిక వృద్ధిని నమోదు చేసింది.
ప్రపంచంలోని రెండవ అతిపెద్ద స్మార్ట్‌‌‌‌ఫోన్ మార్కెట్ అయిన ఇండియా ప్రీమియమైజేషన్ ప్రారంభమైందని కౌంటర్ పాయింట్ తెలిపింది. వన్ప్లస్ రూ. 30వేలు–-రూ. 45వేల ధరల విభాగంలో అగ్ర బ్రాండ్‌‌‌‌గా ఉంది. వన్ప్లస్11ఆర్ బలమైన అమ్మకాలను సాధించింది. ఈ సెగ్మెంట్లో 29 శాతం వాటా సాధించిందని కౌంటర్ పాయింట్ రీసెర్చ్ వెల్లడించింది.
